།མཐའ་ཡས་བློ་མངའ་རྣམས་ཀྱི་ཤིན་ཏུ་ཡངས། །དེ་དག་སྨད་པ་མི་མངའ་བ། །བསྒྲིབས་མེད་སྤྱོད་ཡུལ་རབ་ལ་ཤིན་ཏུ་དགྱེས་པ་ཡི། །ཕོ་བྲང་འདི་ལ་ཐལ་སྦྱར་ཏེ། །བདག་ཀྱང་ལུས་བཏུད་གུས་པར་ཕྱག་འཚལ་ལོ། །རྒྱལ་བའི་སྲས་ཀྱི་ཐུ་བོ་སྟེ། །བསྒྲིབས་མེད་སྤྱོད་པ་མངའ་བ་འཕགས་པ་བྱམས་པ་དེ། །རྣམ་དག་བློ་མངའ་དཔེ་མེད་ལ། །དེ་ཡི་རྗེས་སུ་བསམས་ཏེ་ཕྱག་འཚལ་ལོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་ཀྱིས་བརྒྱན་པའི་སྙིང་པོ་ན་འཁོད་པའི་བྱང་ཆུབ་སེམས་དཔའ་རྣམས་ལ། དེ་དག་དང་བྱང་ཆུབ་སེམས་དཔའི་བསྟོད་པ་གཞན་ཚད་མེད་པ་དག་གིས་ཀྱང་། མངོན་པར་བསྟོད་དེ་ཤིན་ཏུ་བཏུད་ནས་ཕྱག་འཚལ་ཏེ། རབ་ཏུ་གུས་པར་བལྟས་ནས་རིམ་གྲོར་བྱས་ཏེ། མངོན་དུ་བྱས་ནས་མཆོད་དེ་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོའི་སྒོ་ན། བྱང་ཆུབ་སེམས་དཔའི་སེམས་དཔའ་ཆེན་པོ་བྱམས་པ་ལ་བལྟ་བར་ནི་མོས། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་ཕྲད་པར་ནི་དགའ་ཞིང་སྡོད་སྡོད་པ་ལས་དེས་བྱང་ཆུབ་སེམས་དཔའ་བྱམས་པ་ཁང་པ་བརྩེགས་པ། དེའི་ཕྱི་རོལ་གྱི་ཕྱོགས་གཞན་ཞིག་ནས་སྲོག་ཆགས་བརྒྱ་སྟོང་དུ་མའི་འཁོར་དང་། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོའི་དབང་པོ་དུ་མས་མདུན་དུ་བྱས་ཏེ། གཡས་གཡོན་ནས་བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་རྣམས་ཀྱིས་ཕྱག་བྱ་ཞིང་ཡུལ་དེ་ན་གནས་པ་གཉེན་བཤེས་སུ་འོང་བའི་བྲམ་ཟེ་བརྒྱ་སྟོང་མང་པོས་བསྐོར་ཅིང་མདུན་དུ་བྱས་ཏེ། ཁང་པ་བརྩེགས་པ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོ་ལོགས་སུ་འོང་བ་མཐོང་ནས་དགའ་རངས་ཏེ། མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། བྱང་ཆུབ་སེམས་དཔའ་བྱམས་པ་གང་ན་བ་དེར་ལོགས་སུ་མངོན་དུ་བལྟས་ཏེ། ཐག་རིང་པོ་ནས་བྱང་ཆུབ་སེམས་དཔའ་བྱམས་པ་ལ་ལུས་ཐམས་ཅད་ཀྱིས་ཕབ་སྟེ་ཕྱག་བྱས་སོ།