།ཁྱུ་མཆོག་དེ་དག་འདི་ན་གནས། །བདེ་གཤེགས་རྣམས་ལས་ཆོས་ཀྱི་རྒྱ་མཚོ་ཡང་དག་འཐུང་། །ཡེ་ཤེས་རྒྱ་མཚོར་རབ་ཏུ་ཞུགས། །མི་ཟད་ཡོན་ཏན་རྣམས་ཀྱི་ཕ་རོལ་ཕྱིན། །འདི་ན་ཞིང་རྣམས་ཀུན་གྲངས་དང་། །བསྐལ་པའི་གྲངས་དང་དེ་བཞིན་ཆོས་ཀྱི་གྲངས་རྣམས་དང་། །རྒྱལ་བ་ཀུན་གྱི་མཚན་གྱི་གྲངས། །སྒྲིབ་མེད་སེམས་དཔའ་རྣམ་པར་དགོངས་པ་མཛད། །རྒྱལ་སྲས་དེ་དག་འདི་ན་གནས། །དུས་གསུམ་ཞིང་མང་འགྲངས་པ་ཐམས་ཅད་མ་ལུས་པར། །དེ་དག་སྐད་ཅིག་གཅིག་གིས་ཀྱང་། །ཡོངས་སུ་འབྱུང་དང་འཇིག་པ་རྣམ་པར་འབྱེད། །རྒྱལ་སྲས་དེ་དག་འདི་ན་གནས། །རྒྱལ་བའི་སྤྱོད་པ་སྨོན་ལམ་འགྲོ་བའི་དབང་པོ་རྣམས། །གནས་ན་རྣམ་པར་སྤྱོད་བྱེད་ཀྱང་། །རྒྱལ་སྲས་བློ་ལ་ཐོགས་པ་མེད་པས་མཐོང་། །རྡུལ་ཕྲན་གཅིག་ལ་གང་ཡོད་པའི། །འཁོར་རྣམས་རྒྱ་མཚོ་ཞིང་མང་སེམས་ཅན་དེ་བཞིན་དུ། །བསྐལ་པ་རྡུལ་ཕྲན་ཀུན་མཉམ་པ། །སྒྲིབ་པ་མེད་པར་མཐོང་བ་རྣམས་ཀྱིས་མཐོང་། །རྡུལ་ཕྲན་ཀུན་རྩེར་དེ་བཞིན་དུ། །འཁོར་དང་ཞིང་དང་བསྐལ་པ་ཐམས་ཅད་མ་ལུས་པར། །ཀུན་ཀྱང་གཟུགས་བརྙན་ཐབས་ཚུལ་དུ། །ཤིན་ཏུ་རྣམ་ཕྱེ་ཡོངས་སུ་མཐོང་བ་ཡིན། །འདི་ནས་དེ་དག་ཆོས་རྣམས་ཀྱི། །རང་བཞིན་ཞིང་རྣམས་ཀུན་དང་དུས་དང་བསྐལ་པ་དང་། །ཡང་དག་སངས་རྒྱས་དེ་བཞིན་ཏེ། །རང་བཞིན་དངོས་བྲལ་འབྱུང་བའི་ཚུལ་གྱིས་མཁྱེན། །འདི་གནས་སེམས་ཅན་མཉམ་ཉིད་དང་། །ཆོས་རྣམས་མཉམ་པ་ཉིད་དང་སངས་རྒྱས་མཉམ་ཉིད་དང་། །ཞིང་དང་སྨོན་ལམ་མཉམ་པ་ཉིད། །དུས་གསུམ་མཉམ་པ་ཉིད་ལའང་དེ་བཞིན་འཇུག །སེམས་ཅན་ཁྲག་ཁྲིག་རྣམ་པར་འདུལ། །སངས་རྒྱས་ཁྲག་ཁྲིག་རྣམས་ཀྱང་དེ་བཞིན་གཞན་མཆོད་བྱེད། །གཞན་རྣམས་ཆོས་ལ་རྣམ་པར་རྟོག །འོན་ཀྱང་བརྟན་པ་གནས་མཆོག་འདི་ན་འཁོད། །བསྐལ་པ་ཁྲག་ཁྲིག་མང་པོས་ཀྱང་། །དེ་དག་སྨོན་ལམ་ཡེ་ཤེས་ཡུལ་བློའི་རྣམ་པ་དག །བདག་གིས་བརྗོད་པར་མི་ནུས་ཏེ། །མཐའ་ཡས་བློ་མངའ་རྣམས་ཀྱི་ཤིན་ཏུ་ཡངས།