ཐག་རིང་པོ་ནས་བྱང་ཆུབ་སེམས་དཔའ་བྱམས་པ་ལ་ལུས་ཐམས་ཅད་ཀྱིས་ཕབ་སྟེ་ཕྱག་བྱས་སོ། །དེ་ནས་བྱང་ཆུབ་སེམས་དཔའ་བྱམས་པས་ཚོང་དཔོན་གྱི་བུ་ནོར་བཟངས་ལ་བལྟས་ཏེ། འཁོར་ཀུན་ལ་ལག་པ་གཡས་པས་བསྟན་ནས་ཡང་དག་པའི་ཡོན་ཏན་གྱིས་བསྔགས་ཏེ་ཚིགས་སུ་བཅད་པ་འདི་དག་སྨྲས་སོ། །ལྟོས་ཤིག་བསམ་པ་ཡོངས་སུ་དག་པ་འདི། །ནོར་བཟངས་ནོར་རྣམས་རབ་ཏུ་བརྟན་པའི་བུ། །བྱང་ཆུབ་སྤྱོད་པ་དམ་པ་ཡོངས་ཚོལ་ཞིང་། །མཁས་པ་ངའི་དྲུང་དུ་ཉེ་བར་འོངས། །ལེགས་པར་འོངས་སམ་སྙིང་རྗེ་བྱམས་བྱུང་ཁྱོད། །བྱམས་པའི་དཀྱིལ་འཁོར་ཡངས་པ་ལེགས་འོངས་སམ། །ལེགས་པར་འོངས་སམ་བལྟ་ན་རབ་ཞི་བ། །སྤྱད་པ་སྤྱོད་ཚེ་དུབ་པར་མ་གྱུར་ཏམ། །རྣམ་དག་བསམ་ལྡན་ཚུར་ཤོག་འོངས་པ་ལེགས། །སྐྱོ་མེད་ཡིད་ལྡན་ཚུར་ཤོག་འོངས་པ་ལེགས། །དབང་པོ་མ་ཞུམ་ཚུར་ཤོག་འོངས་པ་ལེགས། །མཁས་པ་སྤྱོད་ཚེ་དུབ་པ་མེད་གྲང་ངོ་། །ཆོས་རྣམས་ཐམས་ཅད་རྣམ་ཕྱེའི་དོན་བྱུང་བ། །འགྲོ་བ་ཐམས་ཅད་རྣམ་གདུལ་རབ་བརྩོན་པ། །བཤེས་གཉེན་ཐམས་ཅད་བསྙེན་བཀུར་རབ་ཞུགས་པ། །བརྟུལ་ཞུགས་མི་གཡོ་བརྟན་པ་ཁྱོད་འོངས་ལེགས། །དགེ་བའི་ལམ་གྱིས་འོངས་པ་བདེར་འོངས་སམ། །ཡོན་ཏན་ལམ་ལ་གནས་པ་བདེར་འོངས་སམ། །རྒྱལ་བའི་ལམ་ལ་ཞུགས་པ་བདེར་འོངས་སམ། །ལམ་རྣམས་གང་དུའང་ངལ་བར་མ་གྱུར་ཏམ། །ཡོན་ཏན་རང་བཞིན་ཚུར་ཤོག་བདེར་འོངས་སམ། །དགེ་བས་མངོན་བརླན་ཚུར་ཤོག་བདེར་འོངས་སམ། །མཐའ་ཡས་སྤྱོད་ཡུལ་ལེགས་པར་བདེར་འོངས་སམ། །འགྲོ་བ་ཀུན་ན་ཁྱོད་མཐོང་ཤིན་ཏུ་དཀོན། །ཐོབ་དང་མ་ཐོབ་མཉམ་པའི་ཡིད་ལྡན་པ། །སྨད་དང་སྡུག་བསྔལ་མ་གྲགས་རྣམ་པར་སྤངས། །འཇིག་རྟེན་ཆོས་ལ་ཨུཏ་པལ་པད་མོ་བཞིན། །ཡིད་ལ་འཁྲུལ་མེད་ལེགས་པར་བདེར་འོངས་སམ། །གཡོ་དང་སྒྱུ་བྲལ་བསམ་པ་དགེ་ལྡན་པ། །ང་རྒྱལ་དྲེགས་མེད་སྣོད་ཀྱི་དམ་པ་པོ། །ཁྲོ་དང་འཚིག་མེད་ཁེངས་ཤིང་འགྱིང་བ་མེད། །