ཁྱིམ་བདག་ཟླ་བ་བཟང་པོ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ཁྱིམ་བདག་ཟླ་བ་བཟང་པོའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་མཐར་གྱིས་གྲོང་ཁྱེར་རི་དགས་ཀྱི་གནས་གང་ན་བ་དེར་སོང་སྟེ། ཁྱིམ་བདག་མི་ཕམ་སྡེ་གང་ན་བ་དེར་ཕྱིན་ནས། ཁྱིམ་བདག་མི་ཕམ་སྡེའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མདུན་དུ་འདུག་ནས་ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ། །ཞེས་བདག་གིས་ཐོས་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཀའ་སྩལ་དུ་གསོལ། སྨྲས་པ། རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའི་རྣམ་པར་ཐར་པ་མྱི་ཟད་པའི་མཚན་ཉིད་ཅེས་བྱ་བ་ཐོབ་སྟེ་དེ་ཐོབ་པས་ནི། སངས་རྒྱས་མི་ཟད་པ་མཐོང་བའི་གཏེར་རབ་ཏུ་ཐོབ་པར་འགྱུར་ཏོ། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ཀྱི་ཆོས་ཀྱི་ཡུལ་གྲུ་ན་བྲམ་ཟེ་ཞི་འཛིན་མཆོག་ཅེས་བྱ་བ་ཞིག་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཁྱིམ་བདག་མྱི་ཕམ་སྡེའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཁྱིམ་བདག་མི་ཕམ་སྡེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། ཁྱིམ་བདག་མི་ཕམ་སྡེའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་མཐར་གྱིས་ཆོས་ཀྱི་ཡུལ་གྲུར་སོང་ནས། བྲམ་ཟེ་ཞི་འཛིན་མཆོག་གང་ན་བ་དེར་ཕྱིན་ཏེ། བྲམ་ཟེ་ཞི་འཛིན་མཆོག་གི་རྐང་པ་གཉིས་ལ་སྤྱི་བོས་ཕྱག་འཚལ་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ།