མྱི་འཇིགས་པས་ཁྱུ་མཆོག་དང་སེང་གེའི་ང་རོ་འབྱིན་པ། གནས་མེད་པའི་ཆོས་ཀྱི་དགའ་བ་ལ་དགའ་བས་མོས་པ། ཆོས་ཐམས་ཅད་ལ་རབ་རིབ་མྱེད་པའི་མྱིག་གིས་ལྟ་བ། འཇིག་རྟེན་ཐམས་ཅད་ཀྱི་འབྱུང་བ་དང་། འཇིག་པ་ཤེས་པའི་ཟླ་བར་གྱུར་པ། ཤེས་རབ་ཀྱི་དཀྱིལ་འཁོར་གྱིས་བདེན་པའི་ཚུལ་ཐམས་ཅད་ལ་རྣམ་པར་སྤྱོད་པའི་འོད་ཟེར་ཅན། ཡེ་ཤེས་ཀྱི་རྡོ་རྗེ་བསོད་ནམས་ཀྱི་ཁོར་ཡུག་ཏུ་གྱུར་པ། དཔེར་བྱ་བ་ཐམས་ཅད་ལས་ཤིན་ཏུ་འདས་པ། ཆོས་ཐམས་ཅད་ལ་དབང་པོ་དང་ཡེ་ཤེས་ཀྱི་མྱུ་གུ་རབ་ཏུ་སྐྱེས་པ། དཔའ་བའི་རྒྱལ་མཚན་དང་ལྡན་པ། བདུད་ཐམས་ཅད་ཀྱི་རྒྱལ་མཚན་རབ་ཏུ་སྙོལ་བ་ལ་དཔའ་བ་ཡེ་ཤེས་མཐའ་ཡས་པའི་དཀྱིལ་འཁོར་གྱི་གཟི་བརྗིད་ཅན། འགྲོ་བ་ཐམས་ཅད་ལས་མངོན་པར་འཕགས་པའི་ལུས་དང་ལྡན་པ། ཆོས་ཐམས་ཅད་ལ་ཤེས་རབ་སྒྲིབ་པ་མེད་པར་ཟད་པ་དང་། མྱི་ཟད་པའི་མཐའི་ཡེ་ཤེས་ཀྱིས་རྣམ་པར་སངས་རྒྱས་པ། ཡང་དག་པའི་མཐའི་ཀུན་གྱི་མཐར་ཕྱིན་པ་ལ་གནས་པ། མཚན་མ་མེད་པ་ལ་རྣམ་པར་ལྟ་བའི་ཡེ་ཤེས་ཀྱི་མྱིག་མངོན་སུམ་ཅན། བྱང་ཆུབ་སེམས་དཔའི་སྤྱོད་པ་ཐམས་ཅད་མངོན་པར་བསྒྲུབ་པའི་རྒྱུ་ལ་མཁས་པ། མྱི་གཉིས་པའི་ཡེ་ཤེས་ཀྱི་སྤྱོད་ཡུལ་དང་ལྡན་པ་འཇིག་རྟེན་གྱི་རྒྱུད་ཐམས་ཅད་ལ་རྣམ་པར་ལྟ་བ། སངས་རྒྱས་ཀྱི་ཞིང་གི་རྒྱུད་གནས་མྱེད་པ་ལ་ཐམས་ཅད་དུ་གཟུགས་བརྙན་སྣང་བར་གྱུར་པ། ཆོས་ཐམས་ཅད་ལ་མུན་པ་དང་རྣམ་པར་བྲལ་བ་ཡེ་ཤེས་ཀྱི་དཀྱིལ་འཁོར་མུན་པ་མྱེད་པ་ལ་རབ་ཏུ་ཞུགས་པ། ཕྱོགས་ཀུན་ཏུ་ཆོས་ཀྱི་སྣང་བ་རབ་ཏུ་བཀྱེ་བ། འགྲོ་བ་ཐམས་ཅད་ཀྱི་བསོད་ནམས་ཀྱི་ཞིང་མཆོག་ཏུ་གྱུར་པ། ཐོས་པ་དང་མཐོང་བ་དང་། སྨོན་ལམ་དོན་ཡོད་པའི་ཟླ་བ། བསོད་ནམས་ཀྱི་རི་རབ་འཇིག་རྟེན་ཐམས་ཅད་ལས་མངོན་པར་འཕགས་པ། ཕས་ཀྱི་རྒོལ་བའི་ཚོགས་ཐམས་ཅད་ཚར་གཅོད་པ་ལ་ཤིན་ཏུ་དཔའ་བ། སངས་རྒྱས་ཀྱི་ཞིང་ཐམས་ཅད་དུ་སྒྲ་སྐད་དང་དབྱངས་ཀྱི་ང་རོ་འབྱིན་པ།