ཡེ་ཤེས་དང་རྣམ་པར་ཐར་པ་ཤིན་ཏུ་འཕགས་པའི་གནས་ཀྱི་སྤྱོད་ཡུལ་ཅན། འདོད་ཆགས་དང་བྲལ་བའི་མཐར་ཕྱིན་པའི་ཡེ་ཤེས་ཀྱི་ལུས་དང་ལྡན་པ། སྲིད་པའི་རྒྱ་མཚོ་ཐམས་ཅད་ལས་གྱེན་དུ་འཕགས་པ། འགྲོ་བ་ཐམས་ཅད་ལ་ཡང་དག་པའི་མཐའ་རྣམ་པར་སྟོན་པ། ཆོས་རྒྱ་མཚོ་ཤེས་རབ་སྣང་བའི་དཀྱིལ་འཁོར་ཅན། ཏིང་ངེ་འཛིན་གང་ཆེན་མཚོ་དང་ལྡན་པའི་དབྱིངས་ལ་ཤིན་ཏུ་མཉམ་པར་བཞག་ཅིང་། སྙིང་རྗེ་ཆེན་པོ་རབ་ཏུ་སེམས་པ། ཆོས་ཀྱི་ཚུལ་སྒྱུ་མའི་རྣམ་པ་འདི་ལྟ་བུ་རབ་ཏུ་རྟོགས་པ། འཇིག་རྟེན་གྱི་ཁམས་ཐམས་ཅད་ལ་རྨི་ལམ་ལྟ་བུར་ཞུགས་པ། དེ་བཞིན་གཤེགས་པ་མཐོང་བ་ཐམས་ཅད་མིག་ཡོར་ལྟ་བུར་ཁོང་དུ་ཆུད་པ། སྒྲ་སྐད་དང་དབྱངས་ཐམས་ཅད་སྒྲ་བརྙན་ལྟ་བུར་རྣམ་པར་རིག་པ། ཆོས་ཐམས་ཅད་མངོན་པར་སྒྲུབ་པའི་ཡེ་ཤེས་སྤྲུལ་པ་ལྟ་བུ་རབ་ཏུ་རྟོགས་པ། ཁྱད་པར་དུ་འཕགས་པའི་སྨོན་ལམ་ཤིན་ཏུ་བསྩགས་པ། ཡེ་ཤེས་ཀྱི་དཀྱིལ་འཁོར་ཀུན་ནས་དག་པའི་མཁས་པ་དང་ལྡན་པ། སེམས་ཤིན་ཏུ་ཞི་ཞིང་རབ་ཏུ་ཞི་བ་དང་ལྡན་པ་གཟུངས་ཀྱི་རྒྱུད་ཐམས་ཅད་ཀྱི་ཡུལ་དང་ལྡན་པ། ཏིང་ངེ་འཛིན་གྱི་སྟོབས་ཀྱིས་དོགས་པ་མེད་པར་ཀུན་ནས་རབ་ཏུ་གནོན་པ་ཆོས་ཀྱི་དབྱིངས་ཀྱི་གནས་ཀྱི་མཐར་ཕྱིན་པའི་མིག་དང་ལྡན་པ། ཆོས་ཐམས་ཅད་ལ་དམིགས་པ་མེད་པར་རྣམ་པར་སྤྱོད་པ་རབ་ཏུ་ཐོབ་པ་ཤེས་རབ་རྒྱ་མཚོ་མཐའ་ཡས་པ་ལ་རྣམ་པར་སྤྱོད་པ། ཡེ་ཤེས་ཀྱི་ཕ་རོལ་ཏུ་ཕྱིན་པའི་ཕ་རོལ་ཏུ་སོང་བ། ཤེས་རབ་ཀྱི་ཕ་རོལ་ཏུ་ཕྱིན་པའི་སྟོབས་དང་། ཤུགས་ཐོབ་པ། རྫུ་འཕྲུལ་གྱི་ཕ་རོལ་ཏུ་ཕྱིན་པས་འགྲོ་བ་ཐམས་ཅད་ཀྱི་ཕ་རོལ་ཏུ་ཕྱིན་པ་ཏིང་ངེ་འཛིན་གྱི་ཕ་རོལ་ཏུ་ཕྱིན་པ་དབང་དུ་གྱུར་པ། དེ་བཞིན་གཤེགས་པ་ཐམས་ཅད་ཀྱི་དོན་མཁས་པ་ལ་ཕྱིན་ཅི་ལོག་མེད་པའི་ཡེ་ཤེས་དང་ལྡན་པ། ཆོས་ཀྱི་མཛོད་དབྱེ་བའི་ཆོ་ག་ལ་མཁས་པ། ངེས་པའི་ཚིག་ཤེས་པ་ལ་མངོན་པར་མཁས་པ། སྤོབས་པའི་སྟོབས་དང་། ཆོས་ཀྱི་སྤྲིན་ཟད་མྱི་ཤེས་པ་དང་ལྡན་པ། མྱི་འཇིགས་པས་ཁྱུ་མཆོག་དང་སེང་གེའི་ང་རོ་འབྱིན་པ།