སངས་རྒྱས་ཀྱི་ཞིང་ཐམས་ཅད་དུ་སྒྲ་སྐད་དང་དབྱངས་ཀྱི་ང་རོ་འབྱིན་པ། སངས་རྒྱས་ཐམས་ཅད་ཀྱི་སྐུ་མཐོང་བས་མྱི་ངོམས་པ། སངས་རྒྱས་ཀྱི་སྐུའི་གཟུགས་བརྙན་གྱི་དབང་བསྒྱུར་བ་དང་ལྡན་པ། འགྲོ་བ་གདུལ་བ་དང་མཐུན་པའི་ལུས་སུ་བྱིན་གྱིས་རློབ་པ། ཞིང་འབྱམ་ཀླས་པ་ཐམས་ཅད་དུ་ལུས་གཅིག་གིས་རྒྱས་པར་འགེངས་པ། མངོན་པར་འདུ་བྱ་བ་མྱེད་པའི་རྫུ་འཕྲུལ་གྱི་དཀྱིལ་འཁོར་ཡོངས་སུ་དག་པ། ཐོགས་པ་མྱེད་པར་འགྲོ་བའི་ཡེ་ཤེས་ཆེན་པོའི་ཐེག་པའི་གྲུ་དང་ལྡན་པ། ཡེ་ཤེས་ཀྱི་དཀྱིལ་འཁོར་གྱིས་ཆོས་ཀྱི་དབྱིངས་ཐམས་ཅད་དུ་ལུས་རབ་ཏུ་སྣང་བ། ཡེ་ཤེས་ཀྱི་ཉི་མ་འགྲོ་བ་ཐམས་ཅད་དུ་ཤར་བ། འགྲོ་བ་ཐམས་ཅད་བསམ་པ་ཇི་ལྟ་བ་བཞིན་དུ་དགའ་བའི་ཁ་དོག་དང་ལྡན་པ། འགྲོ་བ་ཐམས་ཅད་ཀྱི་བསམ་པ་དང་། དབང་པོ་རབ་ཏུ་རྟོགས་པའི་ཡེ་ཤེས་ཅན། ཆོས་ཐམས་ཅད་བསྒྲིབས་པ་མེད་པའི་ཡུལ་ཁོང་དུ་ཆུད་པ། ཆོས་ཐམས་ཅད་ཀྱི་རང་བཞིན་སྐྱེ་བ་མེད་པ་རྣམ་པར་རིག་པ་ཕྲ་བ་དང་ཡངས་པ་ཕན་ཚུན་དུ་ཡོངས་སུ་བསྡུ་བ་ལ་དབང་བསྒྱུར་བ་སངས་རྒྱས་ཀྱིས་ཟབ་མོའི་ཚུལ་ངེས་པར་རྟོགས་པ། དོན་ཟབ་མོའི་ཚིག་དང་། ཡི་གེའི་ཐ་སྙད་ལ་མཁས་པ། ཚིག་དང་ཡི་གེ་དང་། དོན་མྱི་ཟད་པ་རབ་ཏུ་བརྗོད་པ། མདོ་སྡེ་རྒྱ་མཚོ་ཐམས་ཅད་ཚིག་གཅིག་ཏུ་ཆུད་པར་རབ་ཏུ་སྟོན་པ། གཟུངས་དང་ཡེ་ཤེས་ཀྱི་ལུས་རྒྱ་ཆེན་པོ་བྱིན་གྱིས་རློབ་པ། བསྐལ་པ་མཐའ་ཡས་པར་ཡོངས་སུ་འཛིན་པའི་གཟུངས་དང་ལྡན་པའི་བྱིན་གྱི་རླབས་ཅན། སེམས་ཀྱི་སྐད་ཅིག་གཅིག་གིས་བསྐལ་པ་བརྗོད་དུ་མྱེད་པར་གནས་པ། རབ་ཏུ་རྟོགས་པའི་ཡེ་ཤེས་ཅན། སེམས་ཀྱི་སྐད་ཅིག་གཅིག་གིས་དུས་གསུམ་ཤེས་པས། འཇིག་རྟེན་ཐམས་ཅད་མངོན་པར་ཤེས་པ། ཆོས་ཀྱི་གཟུངས་ཀྱིས་སངས་རྒྱས་ཀྱི་ཆོས་རྒྱ་མཚོ་མཐའ་ཡས་པ་དྲན་ཞིང་སྤོབས་པ་འགྲོ་བ་ཐམས་ཅད་ཀྱིས་ཡེ་ཤེས་པར་འགྱུར་བའི་ཐབས་ཀྱིས་ཆོས་ཀྱི་འཁོར་ལོ་བསྐོར་བ་ལས་ཕྱིར་མྱི་ལྡོག་པ། སངས་རྒྱས་ཀྱི་ཡུལ་ལ་ཡེ་ཤེས་སྣང་བ་རབ་ཏུ་ཐོབ་པ། གྱ་ནོམ་པར་སྣང་བའི་ཏིང་ངེ་འཛིན་ལ་རྟག་ཏུ་མཉམ་པར་བཞག་པ།