ལྷ་རྫས་ཀྱི་རིན་པོ་ཆེའི་རྒྱན་སྣ་ཚོགས་ཀྱི་ཕུང་པོ་དང་། ཁ་ཟས་དང་སྤྱན་གཟིགས་སྣ་ཚོགས་ཀྱི་ཕུང་པོ་དང་། ཞིམ་པའི་མཆོག་ཁྱད་པར་དུ་འཕགས་པ་རྣམ་པ་སྣ་ཚོགས་ཀྱི་ཕུང་པོ་དགོད་པ་དང་། དངར་བའི་ཐབས་སྣ་ཚོགས་ཀྱི་ཡུལ་དུ་བཀོད་པ་མཐོང་ངོ་། །ལྷ་རྫས་ཀྱི་ཤིང་རྟ་རིན་པོ་ཆེ་བྱེ་བ་བརྒྱ་སྟོང་དུ་མ་དང་། ལྷ་རྫས་ཀྱི་སིལ་སྙན་བྱེ་བ་བརྒྱ་སྟོང་དུ་མ་དང་། ལྷ་རྫས་ཀྱི་སྤོས་ཀྱི་རྣམ་པ་བརྒྱ་སྟོང་དུ་མ་དང་། ནད་ཀྱི་རྐྱེན་སྨན་དང་། ཡོ་བྱད་ཀྱི་ཕུང་པོ་དུ་མ་དང་། ཡོ་བྱད་ཀྱི་ཁྱད་པར་ཐམས་ཅད་ཀྱི་ཕུང་པོ་སྤྱད་དུ་རུང་ཞིང་ཁ་ན་མ་ཐོ་བ་མེད་པ་མང་པོ་སེམས་ཅན་རྣམས་ཅི་དགའ་བར་སྤྱོད་དུ་གཟུད་པའི་ཕྱིར་བཤམས་ཏེ། བཀོད་པ་དང་། བ་བཞོན་གསེར་གྱི་རུ་མྱིག་ཅན་སྟོང་ཕྲག་དུ་མ། འོ་མ་བྲེས་འཇལ་བ་མང་པོ་ཡང་སེམས་ཅན་ཕོངས་པ་རྣམས་ཡོངས་སུ་བསྡུ་བའི་ཕྱིར་བཀོད་པ་མཐོང་ངོ་། བུ་མོ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་བཞིན་བཟང་བ། ཤིན་ཏུ་མཛེས་པ་ལྟ་ན་སྡུག་པ། རྒྱན་ཐམས་ཅད་ཀྱིས་རྣམ་པར་ཀླུབས་པ། ལྷ་རྫས་ཀྱི་གོས་རིན་པོ་ཆེ་གྱོན་པ། ལྷ་རྫས་ཀྱི་ཙན་དན་སྦྲུལ་གྱི་སྙིང་པོས་ལུས་བྱུགས་པ། སྒྱུ་རྩལ་དྲུག་ཅུ་རྩ་བཞིའི་ཚུལ་ཤེས་པ། འདོད་པའི་སྤྱོད་པ་དང་། ཆོ་ག་ཐམས་ཅད་ལ་མཁས་པ་དག་ཀྱང་བསྩོགས་ཤིང་བཀོད་པར་མཐོང་ངོ་། །དེའི་མདུན་ན་ཇི་ལྟ་བ་དེ་བཞིན་དུ་སེམས་ཅན་རྣམས་ཡོངས་སུ་བསྡུ་བ་དང་། སེམས་ཅན་རྣམས་ཡོངས་སུ་གཟུང་བ་དང་། སེམས་ཅན་རྣམས་དགའ་བ་བསྐྱེད་པ་དང་། སེམས་ཅན་རྣམས་སྤྲོ་བ་བསྐྱེད་པ་དང་། སེམས་ཅན་རྣམས་ཀྱི་ཡིད་དང་བར་བྱ་བ་དང་། སེམས་ཅན་རྣམས་ཀྱི་སེམས་ཤིན་ཏུ་བདེ་བར་བྱ་བ་དང་། སེམས་ཅན་རྣམས་ཀྱི་ཉོན་མོངས་པ་རྣམ་པར་ཞི་བར་བྱ་བ་དང་། སེམས་ཅན་རྣམས་ཆོས་ཀྱི་རང་བཞིན་གྱི་དོན་ལ་ཡོངས་སུ་དགོད་པ་དང་། སེམས་ཅན་རྣམས་ཐམས་ཅད་མཁྱེན་པ་ཉིད་དུ་དོན་མཉམ་པར་བྱ་བ་དང་། སེམས་ཅན་རྣམས་གཞན་ལ་འཁུ་བ་རྣམ་པར་བཟློག་པར་བྱ་བ་དང་། ལུས་དང་ངག་གིས་ངན་དུ་སྤྱོད་པ་ཐམས་ཅད་རྣམ་པར་བཟློག་པ་དང་། སེམས་ཅན་རྣམས་ཀྱི་ལྟ་བའི་ཟུག་རྔུ་ཡང་དག་པར་དབྱུང་བ་དང་། སེམས་ཅན་རྣམས་ཀྱི་ལམ་ཡོངས་སུ་སྦྱང་བའི་ཕྱིར། སྲང་དང་ལམ་གྱི་བཞི་མདོ་དང་། ལམ་གྱི་སུམ་མདོ་དང་། སྒོ་དང་ཁྱམས་དག་ནའང་དེ་བཞིན་ཏེ།