ཆོས་ངེས་པར་བརྟགས་པ་ལ་ཤིན་ཏུ་མོས་པས་སེམས་ཅན་གང་དང་ཕྲད་ཀྱང་། དགེ་བའི་བཤེས་གཉེན་རྟག་ཏུ་འདྲི་ཞིང་མཐར་གྱིས་གྲོང་ཁྱེར་གྱི་ལམ་གྱི་སུམ་མདོའི་དྲུང་ཞིག་དུ་ཕྱིན་ནས་ཀུན་ཏུ་བལྟས་ན། གྲོང་ཁྱེར་གྱི་ལམ་གྱི་སུམ་མདོའི་དབུས་ཀྱི་མཆོད་རྟེན་གྱི་ཁང་པ་ནས་ཧ་ཅང་ཡང་མི་རིང་བ་ཞིག་ན། རྒྱན་ཆེན་པོ་དང་ལྡན་པའི་ཁྲི་ཆེན་པོ་བཻ་ཌྰུཪྻ་སྔོན་པོའི་རྐང་པ་བཀྱེ་བ། བཻ་ཌྰུཪྻ་དཀར་པོའི་སེང་གེས་བླངས་པ། འཛམ་བུ་ཆུ་ཀླུང་གི་གསེར་གྱི་ལྕགས་པོད་ཀྱི་དྲ་བ་ལེགས་པར་བཏགས་པ། ལྷ་རྫས་ལས་ཀྱང་འདས་པའི་རིན་པོ་ཆེའི་སྟན་སྣ་ཚོགས་བཏིང་བ། རིན་པོ་ཆེའི་འབྲུ་གྲངས་མེད་པས་རྣམ་པར་བརྒྱན་པ། ནོར་བུ་རིན་པོ་ཆེའི་རྒྱན་བསམ་གྱིས་མི་ཁྱབ་པའི་དྲ་བས་ཀུན་ནས་ཁེབས་པ། འཛམ་བུ་ཆུ་ཀླུང་གི་གསེར་གྱི་སྣམ་བུ་ལ། ལྷ་རྫས་རིན་པོ་ཆེ་སྣ་ཚོགས་ཀྱི་གུར་ཤིན་ཏུ་སྤ་བར་བཀྱེ་བའི་གནམ་ཡོལ་བྲེས་པ། ནོར་བུ་རིན་པོ་ཆེ་ཡིད་བཞིན་གྱི་རྒྱལ་པོའི་པད་མོའི་སྙིང་པོ་དང་ལྡན་པ། དེ་ལྟུ་བུའི་ཆོས་ཀྱི་ཁྲི་ཆེན་པོ་ལ་རྒྱལ་པོ་འོད་ཆེན་པོ་མྱི་ཆེན་པོའི་མཚན་སུམ་ཅུ་རྩ་གཉིས་ཀྱིས་ལུས་ཤིན་ཏུ་བརྒྱན་པ་དཔེ་བྱད་བཟང་པོ་སྣ་ཚོགས་བརྒྱད་ཅུ་ཐམ་པས་ལུས་ཤིན་ཏུ་མཛེས་པ་གསེར་གྱི་རི་བོ་ལྟར་རིན་པོ་ཆེ་སྣ་ཚོགས་རྣམ་པར་བཀོད་པས་རྣམ་པར་མཛེས་པ་ཉི་མའི་དཀྱིལ་འཁོར་ལྟར་གཟི་བརྗིད་རབ་ཏུ་འབར་བ། ཟླ་བ་ཉ་ཞིང་རྒྱས་པའི་དཀྱིལ་འཁོར་ལྟར་ལྟ་ན་བཟང་བ། ཚངས་པ་ལྟར་ཚངས་པའི་འཁོར་གྱི་ནང་ན་རྣམ་པར་མཛེས་པ། རྒྱ་མཚོ་ལྟར་ཟབ་མོའི་ཆོས་དང་ཡོན་ཏན་མཐའ་ཡས་པའི་རིན་པོ་ཆེའི་ཚོགས་དང་ལྡན་པ། སྤྲིན་ཆེན་པོ་ལྟར་ཆོས་ཀྱི་རང་བཞིན་གྱི་འབྲུག་སྒྲ་སྒྲོག་པ། ནམ་མཁའ་ལྟར་ཆོས་ཀྱི་ཚུལ་གྱི་སྐར་མའི་ཚོགས་ཀྱིས་བརྒྱན་པ། རི་རབ་ལྟར་ཁ་དོག་བཞི་པོའི་སེམས་ཅན་རྒྱ་མཚོའི་སེམས་ལ་གཟུགས་བརྙན་རབ་ཏུ་སྣང་བ་རིན་པོ་ཆེའི་གླིང་ལྟར་གཞི་ཡེ་ཤེས་སྣ་ཚོགས་རིན་པོ་ཆེས་ཡོངས་སུ་གང་བ་དེ་སྐྱིལ་མོ་ཀྲུང་དུ་འདུག་པ་མཐོང་ངོ་། །དེའི་མདུན་ན་ཡང་གསེར་དང་ནོར་བུ་དང་མུ་ཏིག་དང་། བཻཌཱུརྱ་དང་དུང་དང་མན་ཤེལ་དང་བྱི་རུ་དང་། ས་ལེ་སྦྲམ་དང་དངུལ་རིན་པོ་ཆེའི་ཕུང་པོ་དང་། ལྷ་རྫས་ཀྱི་གོས་ཁ་དོག་སྣ་ཚོགས་ཀྱི་ཕུང་པོ་དང་། ལྷ་རྫས་ཀྱི་རིན་པོ་ཆེའི་རྒྱན་སྣ་ཚོགས་ཀྱི་ཕུང་པོ་དང་།