བ་སྤུ་རེ་རེ་ནས་གཡས་ཕྱོགས་སུ་གྱེན་དུ་འཁྱིལ་བ། ཤིང་ནྱ་གྲོ་དའི་རྒྱལ་པོ་ལྟར་ཆུ་ཞེང་གབ་པ། ལུས་མཚན་དང་དཔེ་བྱད་བཟང་པོས་ཤིན་ཏུ་བརྒྱན་པ། མྱིག་མྱི་འགེབས་ཤིང་མི་རྒོད་པ། དྲན་པ་ཉེ་བར་གནས་པ། རིའི་རྒྱལ་པོ་ཁ་བ་ཅན་ལྟར་རྩྭ་དང་། ནགས་ཚལ་དང་། སྨན་དང་ཤིང་ཕྲན་སྣ་ཚོགས་ཀྱིས་བརྒྱན་པ། བློ་ཤིན་ཏུ་ཡངས་པ། ཡེ་ཤེས་ཀྱི་སྤྱོད་ཡུལ་དང་། ཡུལ་ལ་ཐུབ་པ་མྱེད་པ། དབྱངས་ཀྱི་དཀྱིལ་འཁོར་གྱི་རྒྱན་སྤྲིན་གྱི་སྒྲ་ལྟ་བུ་དང་ལྡན་པ། གཡོ་བ་དང་། རློམ་སེམས་དང་། གཡེང་བ་དང་སྤྲོས་པ་ཐམས་ཅད་དང་བྲལ་བའི་སེམས་དང་ལྡན་པ། ཡེ་ཤེས་ཀྱི་སྤྱོད་ཡུལ་མ་འདྲེས་པ། སངས་རྒྱས་ཀྱི་ཡུལ་རྒྱ་ཆེན་པོའི་སྣང་བ་ཐོབ་པ། སེམས་ཅན་ཐམས་ཅད་ཡོངས་སུ་སྨྱིན་པར་བྱ་བ་དང་། གདུལ་བའི་བསམ་པ་རྒྱུན་མྱི་འཆད་པ། སྙིང་རྗེ་ཆེན་པོའི་དཀྱིལ་འཁོར་ཤིན་ཏུ་ཡངས་པ་སྐྱེས་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་ཡོངས་སུ་གཟུང་བ་དང་། སེམས་ཅན་ཐམས་ཅད་ཀྱི་ཡེ་ཤེས་སྣང་བ་ཡང་དག་པར་བསྐྱེད་པའི་ཕྱིར། དེ་བཞིན་གཤེགས་པའི་ཚུལ་རྗེས་སུ་དྲན་ཞིང་འགྲོ་བ་ཐམས་ཅད་ཀྱི་དོན་དུ་འཆག་པ་ལ་ཞུགས་ཏེ། དྲག་དལ་མྱེད་ཅིང་པད་རལ་མེད་ལ་ཤིན་ཏུ་མཛེས་པར་འཆག་པ། གནས་གཙང་མའི་ལྷའི་གོས་དང་ལྡན་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མྱི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་དང་། མྱི་དང་མྱི་མ་ཡིན་པས་བསྐོར་ཅིང་འདུག་པ་མཐོང་ངོ་། །དགེ་སློང་བལྟ་ན་མཛེས་པ་དེ་འཆག་པའི་ཚེ། ཕྱོགས་མངོན་དུ་གྱུར་པའི་ཕྱོགས་ཀྱི་ལྷ་རྣམས་ཕྱོགས་ཀྱི་དཀྱིལ་འཁོར་ཡོངས་སུ་བསྒྲུབ་པ་བྱེད་དོ། །རྐང་གིས་འགྲོ་བའི་ལྷ་རྣམས་རིན་པོ་ཆེའི་པདྨོས་གོམ་པ་འདོར་བའི་ཚེ། ཡོངས་སུ་བླང་བར་བྱེད་དོ། །མྱེའི་ལྷ་སྣང་བའི་དཀྱིལ་འཁོར་ཟད་མྱི་ཤེས་པ་རྣམས་ཀྱང་། མུན་པ་དང་རབ་རིབ་རྣམ་པར་སེལ་ཏོ། །འཛམ་བུ་རྒྱལ་མཚན་གྱི་ནགས་ཚལ་གྱི་ལྷ་རྣམས་ཀྱང་མེ་ཏོག་མང་པོའི་ཆར་མངོན་པར་འབེབས་སོ།