ལྷས་ཀྱི་འཁོར་དང་། དྲང་སྲོང་དགེ་བ་སྦྱོང་བའི་གནས་ཀྱི་འཁོར་དང་། ཡུལ་དང་ཕྱོགས་ཀྱི་འཁོར་དང་། ཆུའི་རྒྱུད་ཀྱི་འཁོར་དང་། རིའི་སལ་སུལ་གྱི་འཁོར་དང་། ནགས་ཚལ་ཆེན་པོའི་འཁོར་དག་ཏུ་དགེ་སློང་བལྟ་ན་སྡུག་པ་ཡོངས་སུ་ཚོལ་ཚོལ་བ་ལས་དེས་དགེ་སློང་བལྟ་ན་སྡུག་པ་ནགས་ཚལ་སྟུག་པོ་ཞིག་ན། གཞོན་ཞིང་དར་ལ་བབ་པ། གཟུགས་མཛེས་ཤིང་སྡུག་ལ་བལྟ་བ་ཡིད་དུ་འོང་བ། སྐྲ་མཐོན་ཏིང་གཡས་ཕྱོགས་སུ་འཁྱིལ་བ་དང་ལྡན་པ། མགོ་གདུགས་ལྟར་འདུག་པ། གཙུག་ཏོར་གྱི་སྤྱི་བོ་ཅན། འཕྲལ་བ་ཡངས་པ། མྱིག་དཀར་ནག་འབྱེས་ཤིང་རིད་ལ། རྫི་མ་བའི་རྫི་མ་ལྟར་འདུག་པ། སྣའི་དབྱིབས་ལེགས་ཤིང་བཟང་ལ། རན་པར་མཛེས་པ་དང་ལྡན་པ། མཆུ་མཚལ་ལྟར་མདོག་བཟང་ཤིང་ཤིན་ཏུ་ལེགས་པ་དང་ལྡན་པ། སོ་མཉམ་ཞིང་ཐགས་བཟང་ལ། ཤིན་ཏུ་དཀར་བ་བཞི་བཅུ་ཚང་བ་དང་ལྡན་པ། འགྲམ་པའི་ལྷ་ང་སེང་གེ་ལྟར་འདུག་པ། མཁུར་བ་ཤས་གང་ཞིང་རྒྱས་པ། སྨྱིན་ཚུགས་གཞུ་ལྟར་འདུག་ཅིང་རིང་ལ། ཤིན་ཏུ་མཛེས་པ། མཛོད་སྤུ་ཟླ་བའི་ཁ་དོག་ལྟར་འདུག་པའི་ཐིག་ལེ་ཅན། རྣ་ཤལ་རིང་ཞིང་ལྷོད་པར་འཕྱང་བ། ཟླ་བ་ཉ་བ་ལྟར་བཞིན་མདངས་དང་ལྡན་ཞིང་ཤིན་ཏུ་བཟང་བ། མགུལ་ཟླུམ་ཞིང་དུང་ལྟར་མཛེས་པ། སྙིང་ཀ་དཔལ་གྱི་བེའུས་བརྒྱན་པ། རོ་སྟོད་སེང་གེའི་རོ་སྟོད་ལྟར་འདུག་པ། ཐལ་གོང་ཤིན་ཏུ་རྒྱས་པ། དཔུང་མ་གོའི་ལྷུན་ལེགས་ཤིང་ཟླུམ་པ། ལག་པ་རིང་ལ། དྲ་བས་འབྲེལ་པའི་སོར་མོ་ཅན། རྐ་ལག་འཁོར་ལོས་བརྒྱན་པ། རྐ་ལག་འཇམ་ཞིང་གཞོན་ལ་ཤས་རྒྱས་པ། བདུན་ཤིན་ཏུ་མཐོ་བ། རྐེད་པ་རྡོ་རྗེ་ལྟར་འདུག་པ། ལུས་ཆེ་ཞིང་དྲང་བ། བརླ་ཟླུམ་པ། ཕོ་མཚན་གསང་བའི་སྦུབས་ན་འདུག་པ། བྱིན་པ་རི་དགས་ཨེ་ནེ་ཡའི་བྱིན་པ་ལྟར་འདུག་པ། སོར་མོ་རིང་བ། རྐང་པའི་རྟིང་བ་ཡངས་པ། འོད་འདོམ་གང་བ་དང་ལྡན་པ། མདོག་གསེར་གྱི་ཁ་དོག་ལྟར་འདུག་པ། བ་སྤུ་རེ་རེ་ནས་གཡས་ཕྱོགས་སུ་གྱེན་དུ་འཁྱིལ་བ།