།འཛམ་བུ་རྒྱལ་མཚན་གྱི་ནགས་ཚལ་གྱི་ལྷ་རྣམས་ཀྱང་མེ་ཏོག་མང་པོའི་ཆར་མངོན་པར་འབེབས་སོ། །སའི་ལྷ་མི་གཡོ་བའི་སྙིང་པོ་ཅན་རྣམས་ཀྱང་རིན་པོ་ཆེའི་འབྱུང་གནས་མང་པོ་སྟོན་ཏོ། །ནམ་མཁའི་ལྷ་ཀུན་ནས་སྣང་བའི་དཔལ་དང་ལྡན་པ་རྣམས་ཀྱང་ནམ་མཁའི་དབྱིངས་ཡོངས་སུ་བརྒྱན་པ་བྱེད་དོ། །རྒྱ་མཚོའི་ལྷ་དཔལ་ཀུན་ནས་འབྱུང་བ་རྣམས་ཀྱང་རིན་པོ་ཆེ་དམ་པ་མང་པོས་མངོན་པར་འཐོར་ཏོ། །རི་རབ་ཀྱི་ལྷ་དྲི་མ་མེད་པའི་སྙིང་པོ་ཅན་རྣམས་ཀྱང་ཐལ་མོ་སྦྱར་ཅིང་ཕྱག་འཚལ་ཏོ། །རླུང་གི་ལྷ་ཐོགས་པ་མེད་པའི་སྟོབས་ཅན་རྣམས་ཀྱང་། སྤོས་དང་། བདུག་སྤོས་དང་། མེ་ཏོག་འཐོར་བའི་རླུང་རབ་ཏུ་འགྱེད་དོ། །མཚན་མོའི་ལྷ་གནས་པར་བྱེད་པ་ལུས་ཤིན་ཏུ་བརྒྱན་པ་རྣམས་ཀྱང་ལུས་ཤིན་ཏུ་བཏུད་ཅིང་ཕྱག་འཚལ་ཏོ། །ཉིན་མོའི་ལྷ་རྟག་ཏུ་སད་པར་བྱེད་པའི་དཀྱིལ་འཁོར་ཅན་རྣམས་ཀྱང་ནོར་བུ་རིན་པོ་ཆེ་ཕྱོགས་སྣང་བར་བྱེད་པའི་རྒྱལ་མཚན་ཐོགས་ཤིང་། སྣང་བ་བསྐྱེད་པའི་ཕྱིར་ནམ་མཁའི་དབྱིངས་ལ་འཁོད་དོ། །དེ་ནས་ཚོང་དཔོན་གྱི་བུ་ནོར་བཟངས་དགེ་སློང་བལྟ་ན་སྡུག་པ་གང་ན་བ་དེར་ཕྱིན་ནས། དགེ་སློང་བལྟ་ན་སྡུག་པའི་རྐང་པའི་བོལ་གཉིས་ལ་སྤྱི་བོས་གཏུགས་ཏེ་ཕྱག་འཚལ་ནས། དགེ་སློང་བལྟ་ན་སྡུག་པའི་རྐང་པའི་བོལ་གཉིས་ལ་བཞིན་སྦྱར་ཏེ། ལེགས་པར་ཕྱིན་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས། བྱང་ཆུབ་སེམས་དཔའི་སྤྱོད་པ་ཡོངས་སུ་ཚོལ་བ་ཞིག་ལགས་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། འཕགས་པ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེས་སྨྲས་པ། རིགས་ཀྱི་བུ། ཁོ་བོ་ནི་ཚེས་བཏབ་ན་དར་ལ་བབ་པ། རབ་ཏུ་བྱུང་བས་བཏབ་ན་གསར་དུ་ཞུགས་པ་སྟེ། རིགས་ཀྱི་བུ།