།དེ་ནས་བྲམ་ཟེའི་བྱིས་པ་སྟོང་ཕྲག་བཅུ་པོ་དེ་དག་གིས་མེ་ཏོག་དྲི་ཞིམ་ལ་ཡིད་དུ་འོང་ཞིང་ཁ་དོག་སྣ་ཚོགས་དང་ལྡན་པ་མང་པོས་ཚོང་དཔོན་གྱི་བུ་ནོར་བཟངས་ལ་གཏོར་ཏོ། །མངོན་པར་གཏོར་ཏོ། །རབ་ཏུ་གཏོར་ཏོ། །མངོན་པར་ཕྱག་འཚལ་ཏོ། །དེ་ལྟར་བཏུད་དེ་ཕྱག་འཚལ་ནས། གཡས་ཕྱོགས་སུ་བསྐོར་བ་བྱས་ཏེ། ཚིག་འདི་སྐད་དུ་བརྗོད་དོ། །འདི་ནི་སེམས་ཅན་ཐམས་ཅད་ཡོངས་སུ་སྐྱོབ་པར་འགྱུར་རོ། །སེམས་ཅན་དམྱལ་བའི་སྡུག་བསྔལ་ཐམས་ཅད་རབ་ཏུ་ཞི་བར་བགྱིད་པར་འགྱུར་རོ། །བྱོལ་སོང་གི་སྐྱེ་གནས་ཀྱི་ལམ་གྱི་རྒྱུད་ཐམས་ཅད་རྣམ་པར་གཅོད་པར་འགྱུར་རོ། །གཤིན་རྗེའི་འཇིག་རྟེན་གྱི་ལམ་གྱི་རྒྱུད་ཐམས་ཅད་རྣམ་པར་བཟློག་པར་འགྱུར་རོ། །མི་ཁོམ་པའི་སྒོ་ཐམས་ཅད་གཅོད་པར་འགྱུར་རོ། །སྲེད་པའི་རྒྱ་མཚོ་ཡོངས་སུ་སྐེམས་པར་འགྱུར་རོ། །སྲིད་པའི་འཆིང་བ་གཅོད་པར་འགྱུར་རོ། །སྡུག་བསྔལ་གྱི་ཕུང་པོ་རྣམ་པར་བཟློག་པར་འགྱུར་རོ། །མ་རིག་པའི་མུན་པ་སེལ་བར་འགྱུར་རོ། །བསོད་ནམས་ཀྱི་ཁོར་ཡུག་གིས་འཇིག་རྟེན་ཡོངས་སུ་བསྐོར་བར་འགྱུར་རོ། །ཡེ་ཤེས་རིན་པོ་ཆེའི་འབྱུང་གནས་སུ་ཡོངས་སུ་སྟོན་པར་འགྱུར་རོ། །ཡེ་ཤེས་ཀྱི་ཉི་མ་འཆར་བར་བགྱིད་པར་འགྱུར་རོ། །ཆོས་ཀྱི་མིག་རྣམ་པར་སྦྱོང་བར་འགྱུར་རོ། །འཇིག་རྟེན་རྣམས་ལ་མཉམ་པ་དང་མི་མཉམ་པ་ཡང་དག་པར་སྟོན་པར་འགྱུར་རོ། །དེ་ནས་དྲང་སྲོང་འཇིགས་མཆོག་དབྱངས་ཀྱིས་བྱིས་པ་དེ་དག་ལ་འདི་སྐད་ཅེས་སྨྲས་སོ། །བྱིས་པ་དག་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ནི་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་ཐམས་ཅད་ཀྱི་བདེ་བ་རབ་ཏུ་བསྐྱེད་དེ། རིམ་གྱིས་ཐམས་ཅད་མཁྱེན་པ་ཉིད་ཀྱང་འཐོབ་པར་འགྱུར་རོ། །བྱིས་པ་དག་རིགས་ཀྱི་བུ་འདིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་སྟེ། དེ་བས་ན་འདི་ནི་སངས་རྒྱས་ཀྱི་ཡོན་ཏན་ཐམས་ཅད་ཀྱིས་ཡོངས་སུ་སྦྱོང་བར་འགྱུར་རོ། །དེ་ནས་དྲང་སྲོང་འཇིགས་མཆོག་དབྱངས་ཀྱིས། ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ།