ལུས་ཐམས་ཅད་ཀྱིས་ཕབ་སྟེ། ཕྱག་བྱས་ནས་ལངས་ཏེ། དྲང་སྲོང་འཇིགས་མཆོག་དབྱངས་ལ་ལན་བརྒྱ་སྟོང་དུ་མར་བསྐོར་བ་བྱས་ནས་མདུན་དུ་འདུག་སྟེ། ཐལ་མོ་སྦྱར་ནས་ཡིད་དུ་འོང་བའི་ཚུལ་གྱིས་ཡིད་དུ་འོང་བའི་ཚིག་བརྗོད་དེ། འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་། རྗེས་སུ་བསྟན་པ་མཛད་དོ་ཞེས་ཐོས་ན། འཕགས་པ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཤད་དུ་གསོལ། དེ་ནས་དྲང་སྲོང་འཇིགས་མཆོག་དབྱངས་ཀྱིས་བྲམ་ཟེའི་བྱིས་པ་སྟོང་ཕྲག་བཅུ་པོ་དེ་དག་ལ་བལྟས་ཏེ། འདི་སྐད་ཅེས་སྨྲས་སོ། །བྱིས་པ་དག་རིགས་ཀྱི་བུ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། སེམས་ཅན་ཐམས་ཅད་འཇིགས་པ་མེད་པ་ལ་མགྲོན་དུ་གཉེར་ཏོ། །རིགས་ཀྱི་བུ་འདི་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་སྟ་གོན་དུ་གནས་པ་སྟེ། ཡེ་ཤེས་རྒྱ་མཚོ་ལ་མངོན་དུ་གྱུར་པའོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་གྱི་ཆར་བཏུང་བར་འདོད་པའོ། །ཆོས་ཀྱི་ཚུལ་རྒྱ་མཚོ་ཐམས་ཅད་ལ་འཇུག་པར་འདོད་པའོ། །ཡེ་ཤེས་ཀྱི་སྣང་བ་ཆེན་པོ་ལ་གནས་པར་འདོད་པའོ། །སྙིང་རྗེ་ཆེན་པོའི་སྤྲིན་བསྡུ་བར་འདོད་པའོ། །ཆོས་ཀྱི་ཆར་ཆེན་པོ་མངོན་པར་དབབ་པར་འདོད་པའོ། །ཡེ་ཤེས་ཆེན་པོའི་ཟླ་བ་འཇིག་རྟེན་དུ་ཤར་བར་བྱས་ཏེ། ཉོན་མོངས་པའི་གདུང་བ་ཐམས་ཅད་རབ་ཏུ་གཞིལ་བར་འདོད་པའོ། །སེམས་ཅན་ཐམས་ཅད་ཀྱི་དགེ་བའི་རྩ་བ་རྣམ་པར་སྤེལ་བར་འདོད་པའོ། །དེ་ནས་བྲམ་ཟེའི་བྱིས་པ་སྟོང་ཕྲག་བཅུ་པོ་དེ་དག་གིས་མེ་ཏོག་དྲི་ཞིམ་ལ་ཡིད་དུ་འོང་ཞིང་ཁ་དོག་སྣ་ཚོགས་དང་ལྡན་པ་མང་པོས་ཚོང་དཔོན་གྱི་བུ་ནོར་བཟངས་ལ་གཏོར་ཏོ།