ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་བོ་ནི་བྱང་ཆུབ་སེམས་དཔའི་རྣམ་པར་ཐར་པ་གཞན་གྱི་མི་ཐུབ་པའི་རྒྱལ་མཚན་ཐོབ་པའོ། །ནོར་བཟངས་ཀྱིས་སྨྲས་པ། བྱང་ཆུབ་སེམས་དཔའི་རྣམ་པར་ཐར་པ་གཞན་གྱིས་མི་ཐུབ་པ་འདིའི་ཡུལ་ཇི་ལྟ་བུ་ཞིག་མཆིས། །དེ་ནས་དྲང་སྲོང་འཇིགས་མཆོག་དབྱངས་ཀྱིས་ལག་པ་གཡས་པ་བརྐྱང་སྟེ། ཚོང་དཔོན་གྱི་བུ་ནོར་བཟངས་ཀྱི་མགོ་ལ་བྱུགས་ནས་ལག་པ་གཡས་པས་བཟུང་ངོ་། །ཚོང་དཔོན་གྱི་བུ་ནོར་བཟངས་ལ་དྲང་སྲོང་འཇིགས་མཆོག་དབྱངས་ཀྱིས་ལག་པ་གཡས་པས་བཟུང་མ་ཐག་ཏུ་དེའི་མོད་ལ་ཚོང་དཔོན་གྱི་བུ་ནོར་བཟངས་ཀྱིས། ཕྱོགས་བཅུར་སངས་རྒྱས་ཀྱི་ཞིང་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་མཐོང་བར་གྱུར་ཏེ། དེ་དག་གི་དེ་བཞིན་གཤེགས་པ་སངས་རྒྱས་ཀྱི་ཞིང་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་ཞབས་ཀྱི་དྲུང་ན་བདག་ཉིད་འདུག་པར་ཤེས་པར་གྱུར་ཏོ། །སངས་རྒྱས་ཀྱི་ཞིང་དེ་དག་ཀྱང་རྣམ་པ་གྲངས་མེད་པར་རྣམ་པར་དག་པའི་རྒྱན་དང་ལྡན་པར་མཐོང་ངོ་། །དེ་དག་ནའང་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་ཁ་དོག་སྣ་ཚོགས་ཅན་རྒྱན་རྣམ་པ་ཐ་དད་པ་དང་ལྡན་པ་དག་འཁོད་པ་མཐོང་ངོ་། །འཁོར་གྱི་དཀྱིལ་འཁོར་རྒྱ་མཚོ་དེ་དག་ན་འང་དེ་བཞིན་གཤེགས་པའི་སྐུ་མཚན་དང་དཔེ་བྱད་བཟང་པོ་འབར་བས་བརྒྱན་པ་དག་བཞུགས་པ་མཐོང་ངོ་། །དེ་དག་ལས་ཀྱང་ཚིག་དང་ཡི་གེ་གཅིག་ལས་ཀྱང་ཕྱིར་ཕྱོགས་པ་མེད་པར་ཆོས་བསྟན་པ་ཉན་ཏོ། །དེ་བཞིན་གཤེགས་པའི་ཆོས་ཀྱི་འཁོར་ལོ་དེ་དག་ཀྱང་ཕན་ཚུན་མ་འདྲེས་པར་ཡང་དག་པར་འཛིན་ཏོ། །ཆོས་ཀྱི་སྤྲིན་གྱི་ཆར་སེམས་ཅན་གྱི་བསམ་པ་སྣ་ཚོགས་ལ་འབབ་པ་དེ་དག་ཀྱང་ཡང་དག་པར་འཛིན་ཏོ། །དེ་བཞིན་གཤེགས་པ་དེ་དག་གི་སྔོན་གྱི་སྨོན་ལམ་མོས་པ་སྣ་ཚོགས་ཀྱི་སྟོབས་ཀྱིས་རྣམ་པར་སྦྱངས་པ་རྒྱ་མཚོ་ལ་ཡང་ཞུགས་སོ། །སངས་རྒྱས་ཀྱི་ཡང་དག་པར་བསྡུ་བ་སྨོན་ལམ་སྣ་ཚོགས་རྒྱ་མཚོས་རྣམ་པར་དག་པ་རྒྱ་མཚོ་དེ་དག་ལ་ཡང་ཞུགས་སོ།