དེ་བཞིན་གཤེགས་པ་ཐམས་ཅད་མཐོང་ཞིང་རྣམ་པར་དམིགས་པར་བྱ་བའི་ཕྱིར་དྲི་མ་མེད་པའི་སེམས་དང་། དུས་གསུམ་གྱི་དམིགས་པ་མ་ལུས་པར་ཡེ་ཤེས་ཀྱིས་རྒྱས་པར་དགང་བའི་ཕྱིར་རྣམ་པར་དག་པའི་སེམས་དང་། ཐམས་ཅད་མཁྱེན་པའི་ཡེ་ཤེས་རྒྱ་མཚོ་ལ་འཇུག་པར་བྱ་བའི་ཕྱིར་ཡེ་ཤེས་ཀྱི་སེམས་ཀྱང་སྐྱེ་བར་འགྱུར་རོ། །རིགས་ཀྱི་བུ་ཁོ་བོས་ནི་ཕྱོགས་ཀྱི་ལྗོངས་རྒྱ་མཚོའི་སྒོ་འདིར་ལོ་བཅུ་གཉིས་སུ་རྒྱ་མཚོ་ཆེན་པོ་འདི་ལ་དམིགས་ཏེ། མངོན་དུ་བྱས་ནས་འདི་ལྟར་རྒྱ་མཚོ་རྒྱ་ཆེ་ཞིང་ཚད་མེད་པ་ལ་རྗེས་སུ་བསམ་པ་དང་། དྲི་མ་མེད་ཅིང་དང་བ་དང་། ཟབ་ཅིང་གཏིང་དཔག་དཀའ་བ་དང་། བགས་ཀྱིས་གཞོལ་ཞིང་ལེགས་པར་གནས་པ་དང་། རིན་པོ་ཆེའི་འབྱུང་གནས་དུ་མས་རྣམ་པར་བརྒྱན་པ་དང་། ཆུའི་ཕུང་པོ་ཚད་མེད་པ་དང་། ཁ་དོག་རྣམ་པ་ཐ་དད་པ་མང་ཞིང་བསམ་གྱིས་མི་ཁྱབ་པ་དང་། འབྱུང་པོ་མཐའ་ཡས་པའི་གནས་སུ་གྱུར་པ་དང་སྲོག་ཆགས་མང་པོ་སྣ་ཚོགས་ཀྱི་རྟེན་དུ་གྱུར་པ་དང་། སྤྲིན་ཆེན་པོའི་ཆར་ཡོངས་སུ་འཛིན་པ་དང་། གང་ཞིང་འབྲི་བར་འགྱུར་བ་མེད་པ་ལ་རྗེས་སུ་སེམས་པར་བྱེད་ཅིང་གནས་ཏེ། རིགས་ཀྱི་བུ་དེ་ལ་ཁོ་བོས་འདི་སྙམ་དུ་བསམ་མོ། །འཇིག་རྟེན་གྱི་ཁམས་འདི་ན་རྒྱ་མཚོ་ཆེན་པོ་འདི་བས་ཀྱང་འཕགས་པར་རྒྱ་ཆེ་ལ་འདི་བས་ཀྱང་ཡངས་ཤིང་འདི་བས་ཀྱང་ཚད་མེད་ལ། འདི་བས་ཀྱང་ངོ་མཚར་དང་ལྡན་པ་ལ་ལ་ཞིག་ཡོད་དམ་སྙམ་སྟེ། དེ་ལྟར་ཁོ་བོ་ཚུལ་བཞིན་དུ་བསམ་པ་ཡིད་ལ་བྱེད་པ་ལ་བརྩོན་པར་གནས་པའི་ཚེ། རྒྱ་མཚོ་ཆེན་པོའི་འོག་གི་གཞི་ལས་པད་མོ་ཆེན་པོ་ནོར་བུ་རིན་པོ་ཆེ་ཨིནྡྲ་ནཱི་ལ་ཐུབ་པ་མེད་ཅིང་རྡོ་རྗེ་ལྟ་བུར་སྲ་བའི་ཆུ་བ་ཅན། ནོར་བུ་རིན་པོ་ཆེ་བཻཌཱུཪྻ་དམ་པའི་རྒྱན་དང་ལྡན་པ། འཛམ་བུ་ཆུ་ཀླུང་གི་གསེར་ལྟར་དྲི་མ་མེད་པའི་ལོ་མ་རྒྱ་ཆེན་པོ་ཅན། དུས་དང་མཐུན་པའི་ཙན་དན་གྱི་སྙིང་པོའི་རྒྱན་གྱིས་བརྒྱན་པ། རིན་པོ་ཆེ་ཨ་སྨ་གར་བྷའི་ཟེ་བ་ཅན། རྒྱ་མཚོ་ཙམ་དུ་ཡངས་ཤིང་རྒྱ་ཆེ་བ་ལྷ་མ་ཡིན་གྱི་དབང་པོ་བརྒྱ་སྟོང་ཕྲག་བཅུས་སྡོང་པོའི་ལྷུན་ནས་བཟུང་བ། རིན་པོ་ཆེ་སྣ་ཚོགས་བརྒྱ་ཕྲག་སྟོང་གི་དྲ་བས་ཀུན་ནས་ཡོག་པ།