རིན་པོ་ཆེ་སྣ་ཚོགས་བརྒྱ་ཕྲག་སྟོང་གི་དྲ་བས་ཀུན་ནས་ཡོག་པ། ཀླུ་ཡི་དབང་པོ་བརྒྱ་སྟོང་ཕྲག་བཅུས་སྤོས་ཆུའི་ཆར་མངོན་པར་ཕབ་པ། ནམ་མཁའ་ལྡིང་གི་དབང་པོ་བརྒྱ་སྟོང་ཕྲག་བཅུས་དར་དང་རིན་པོ་ཆེའི་ལྡ་ལྡི་དང་སེ་མོ་དོ་མང་པོ་མཆུས་བཟུང་ཞིང་རབ་ཏུ་སྤྱངས་པ་མིའམ་ཅིའི་དབང་པོ་བརྒྱ་སྟོང་ཕྲག་བཅུས་ཕན་པའི་སེམས་ཀྱིས་ཀུན་ནས་བལྟ་བ། ལྟོ་འཕྱེ་ཆེན་པོའི་དབང་པོ་བརྒྱ་སྟོང་ཕྲག་བཅུས་འཁོར་ནས་མངོན་པར་འདུད་པ། སྲིན་པོའི་དབང་པོ་བརྒྱ་སྟོང་ཕྲག་བཅུས་ལུས་འདུད་ཅིང་མངོན་པར་མཆོད་པ། དྲི་ཟའི་དབང་པོ་བརྒྱ་སྟོང་ཕྲག་བཅུས་རོལ་མོ་དང་གླུ་སྣ་ཚོགས་སྙན་པས་བསྟོད་ཅིང་མཆོད་པ། ལྷའི་དབང་པོ་བརྒྱ་སྟོང་ཕྲག་བཅུས་ལྷ་རྫས་ཀྱི་མེ་ཏོག་དང་། སྤོས་དང་ཕྲེང་བ་དང་། བདུག་སྤོས་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། ལྷའི་བ་དན་གྱི་སྤྲིན་གྱི་ཆར་མངོན་པར་ཕབ་པ། ཚངས་པའི་དབང་པོ་བརྒྱ་སྟོང་ཕྲག་བཅུས་སྤྱི་བོས་གཏུགས་ཏེ། ཕྱག་འཚལ་ཞིང་མཆོད་པ། གནས་གཙང་མའི་རིས་ཀྱི་ལྷ་བརྒྱ་སྟོང་ཕྲག་བཅུས་ཐལ་མོ་སྦྱར་ཅིང་ཕྱག་བྱ་བ། མིའི་དབང་པོ་འཁོར་ལོས་སྒྱུར་བ་བརྒྱ་སྟོང་ཕྲག་བཅུས་རིན་པོ་ཆེ་བདུན་གྱིས་བསུ་ཞིང་མངོན་པར་མཆོད་པ། རྒྱ་མཚོའི་ལྷ་བརྒྱ་སྟོང་ཕྲག་བཅུས་མངོན་པར་མཐོན་ཅིང་ཕྱག་བྱ་བ། ནོར་བུ་རིན་པོ་ཆེ་སྐར་མའི་དད་བརྒྱ་སྟོང་ཕྲག་བཅུས་འོད་ཟེར་གྱི་རྒྱན་གྱིས་རབ་ཏུ་སྣང་བར་བྱས་པ། ནོར་བུ་རིན་པོ་ཆེ་བསོད་ནམས་ཀྱིས་དག་པ་བརྒྱ་སྟོང་ཕྲག་བཅུས་མཁོས་སུ་ཕེབས་པར་འཕེལ་བས་རབ་ཏུ་བརྒྱན་པ། ནོར་བུ་རིན་པོ་ཆེ་རྣམ་པར་སྣང་བ་བརྒྱ་སྟོང་ཕྲག་བཅུས་སྙིང་པོ་རབ་ཏུ་གསལ་བར་བྱས་པ། ནོར་བུ་རིན་པོ་ཆེ་དཔལ་གྱི་སྙིང་པོ་བརྒྱ་སྟོང་ཕྲག་བཅུས་དཔལ་ཆེན་པོ་ཤིན་ཏུ་འབར་བར་གྱུར་པ། ནོར་བུ་རིན་པོ་ཆེའི་མཛོད་སྣང་བ་བརྒྱ་སྟོང་ཕྲག་བཅུས་མཐའ་ཡས་པར་སྣང་བར་བྱས་པ། ནོར་བུ་རིན་པོ་ཆེ་འཛམ་བུའི་ཆུ་ཀླུང་བརྒྱ་སྟོང་ཕྲག་བཅུས་ཡོངས་སུ་སྟོན་པར་གནས་པས་རབ་ཏུ་བརྒྱན་པ། ནོར་བུ་རིན་པོ་ཆེ་རྡོ་རྗེའི་སེང་གེ་བརྒྱ་སྟོང་ཕྲག་བཅུས་ཐུབ་པ་མེད་པར་བརྒྱན་པ།