དགེ་སློང་རྒྱ་མཚོའི་སྤྲིན་གྱིས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལེགས་སོ་ལེགས་སོ། །རིགས་ཀྱི་བུ་དགེ་བའི་རྩ་བ་མ་བསྐྱེད་པའི་སེམས་ཅན་རྣམས་ནི་བྱང་ཆུབ་ཏུ་སེམས་ཀྱང་མི་སྐྱེ་བའི་དགེ་བའི་རྩ་བ་སྒོ་ཀུན་ཏུ་སྣང་བ་རབ་ཏུ་ཐོབ་པ་དང་། ཐབས་ཀྱི་སྙིང་པོ་དང་ལྡན་པའི་ལམ་གྱི་ཏིང་ངེ་འཛིན་གྱི་ཡེ་ཤེས་སྣང་བས་རབ་ཏུ་སྣང་བར་འགྱུར་བ་དང་། བསོད་ནམས་ཀྱི་རྒྱ་མཚོའི་ཚོགས་རྒྱ་ཆེན་པོ་བསྩགས་པ་དང་། དཀར་པོའི་ཚོགས་ཐམས་ཅད་ཀྱི་རྒྱུན་མི་འཆད་པ་དང་། དགེ་བའི་བཤེས་གཉེན་ཐམས་ཅད་བཀུར་བས་ཡོངས་སུ་སྐྱོ་བ་མེད་པ་དང་། ལུས་དང་སྲོག་ལ་འཕངས་པ་མི་རྩི་བ་དང་། དངོས་པོར་འཛིན་པ་ཐམས་ཅད་དང་བྲལ་བ་དང་། མཐོན་དམན་མེད་པའི་ས་ལྟར་སེམས་མཉམ་པ་དང་། རང་བཞིན་གྱི་སྙིང་རྗེ་ཆེ་ཞིང་བྱམས་པར་སེམས་པ་དང་ལྡན་པ་དང་། སྲིད་པའི་ལམ་གྱི་རྒྱུད་ཐམས་ཅད་དུ་གནས་པར་འདུག་པ་དང་། དེ་བཞིན་གཤེགས་པའི་ཡུལ་ལ་མངོན་པར་མོས་པའི་སེམས་ཅན་རྣམས་བྱང་ཆུབ་ཏུ་སེམས་སྐྱེ་སྟེ། འདི་ལྟར་སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་སྙིང་རྗེ་ཆེན་པོའི་སེམས་དང་འགྲོ་བ་ཐམས་ཅད་ལ་སྙོམས་པར་ནན་ཏན་དུ་བྱ་བའི་ཕྱིར་བྱམས་པ་ཆེན་པོའི་སེམས་དང་། འགྲོ་བ་ཐམས་ཅད་ཀྱི་སྡུག་བསྔལ་གྱི་ཕུང་པོ་ཞི་བར་བྱ་བའི་ཕྱིར་བདེ་བའི་སེམས་དང་། མི་དགེ་བའི་ཆོས་ཐམས་ཅད་ལས་རྣམ་པར་བཟློག་པའི་ཕྱིར་ཕན་པའི་སེམས་དང་། འཇིགས་པ་ཐམས་ཅད་ལས་ཡོངས་སུ་བསྲུང་བའི་ཕྱིར་སྙིང་བརྩེ་བའི་སེམས་དང་། བསྒྲིབས་པ་ཐམས་ཅད་རྣམ་པར་བཟློག་པའི་ཕྱིར་ཆགས་པ་མེད་པའི་སེམས་དང་། ཆོས་ཀྱི་དབྱིངས་ཐམས་ཅད་རྒྱས་པར་དགང་བའི་ཕྱིར། རྒྱ་ཆེན་པོའི་སེམས་དང་ནམ་མཁའི་དབྱིངས་ཀུན་ཏུ་གཞོལ་ཞིང་ཀུན་ཏུ་འགྲོ་བར་བྱ་བའི་ཕྱིར་མཐའ་ཡས་པའི་སེམས་དང་། དེ་བཞིན་གཤེགས་པ་ཐམས་ཅད་མཐོང་ཞིང་རྣམ་པར་དམིགས་པར་བྱ་བའི་ཕྱིར་དྲི་མ་མེད་པའི་སེམས་དང་།