དགེ་སློང་རྒྱ་མཚོའི་སྤྲིན་གང་ན་བ་དེར་ཕྱིན་ནས། དགེ་སློང་རྒྱ་མཚོའི་སྤྲིན་གྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དགེ་སློང་རྒྱ་མཚོའི་སྤྲིན་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། དགེ་སློང་རྒྱ་མཚོའི་སྤྲིན་གྱི་མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་ཞུགས་ཏེ། བླ་ན་མེད་པའི་ཡེ་ཤེས་རྒྱ་མཚོ་ལ་འཇུག་པར་འཚལ་ན། ཇི་ལྟར་བྱང་ཆུབ་སེམས་དཔའ་རྣམས་འཇིག་རྟེན་གྱི་རྒྱུད་ལས་ཕྱིར་ལྡོག་ཅིང་དེ་བཞིན་གཤེགས་པའི་རིགས་སུ་འགྲུབ་པར་འགྱུར་བ་དང་། འཁོར་བའི་རྒྱ་མཚོ་ལས་རྒལ་ཞིང་ཐམས་ཅད་མཁྱེན་པའི་རྒྱ་མཚོར་འཇུག་པར་འགྱུར་བ་དང་། བྱིས་པ་སོ་སོའི་སྐྱེ་བོའི་ས་ལས་གྱེན་དུ་འཕགས་པར་འགྱུར་ཞིང་། དེ་བཞིན་གཤེགས་པའི་རིགས་སུ་འགྲུབ་པར་འགྱུར་བ་དང་། འཁོར་བའི་རྒྱུད་ལས་ལྡོག་པར་འགྱུར་ཞིང་། བྱང་ཆུབ་སེམས་དཔའི་སྤྱོད་པའི་རྒྱུད་དུ་འཇུག་པར་འགྱུར་བ་དང་། འཁོར་བའི་རྒྱ་མཚོ་རྒྱུད་ཀྱི་འཁོར་ལོ་ལས་ཕྱིར་ལྡོག་ཅིང་བྱང་ཆུབ་སེམས་དཔའི་སྤྱོད་པ་དང་། སྨོན་ལམ་གྱི་འཁོར་ལོར་འཇུག་པར་འགྱུར་བ་དང་། བདུད་ཀྱི་དཀྱིལ་འཁོར་ཐམས་ཅད་རབ་ཏུ་འཇོམས་ཤིང་སངས་རྒྱས་ཀྱི་དཀྱིལ་འཁོར་འབྱུང་བ་ཐམས་ཅད་རབ་ཏུ་སྟོན་པ་དང་། སྲིད་པའི་རྒྱ་མཚོ་ཡོངས་སུ་སྐེམས་ཤིང་སྙིང་རྗེ་ཆེན་པོའི་མཚོ་རྣམ་པར་འཕེལ་བར་བྱེད་པ་དང་། མི་ཁོམ་པ་དང་ངན་སོང་དང་། ངན་འགྲོ་དང་ལོག་པར་ལྟུང་བ་ཐམས་ཅད་ཀྱི་སྒོ་གཅོད་ཅིང་། མཐོ་རིས་དང་མྱ་ངན་ལས་འདས་པའི་སྒོ་འབྱེད་པ་དང་། ཁམས་གསུམ་གྱི་གྲོང་ཁྱེར་གྱི་སྒོ་རྣམ་པར་གཅོད་ཅིང་ཐམས་ཅད་མཁྱེན་པ་ཉིད་ཀྱི་ཕོ་བྲང་གི་སྒོ་རྣམ་པར་འབྱེད་པ་དང་། ཡོ་བྱད་ཐམས་ཅད་ཀྱི་སྲེད་པ་རྣམ་པར་སྤོང་ཞིང་འགྲོ་བ་ཐམས་ཅད་བསྡུ་བའི་སྨོན་ལམ་ཡོངས་སུ་བསྐྱེད་པར་འགྱུར་བ་མ་འཚལ་ལོ། །དེ་སྐད་ཅེས་སྨྲས་པ་དང་། དགེ་སློང་རྒྱ་མཚོའི་སྤྲིན་གྱིས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ།