།བཅུ་བཞི་པ་ན་ནི་སྡིགས་མཛུབ་བོ། །བཅྭ་ལྔ་པ་ན་ནི་བ་དན་ལྕེ་གསུམ་པའོ། །བཅུ་དྲུག་པ་ན་ནི་རླུང་གི་རས་སོ། །གཉིས་ཀྱིས་ནི་གླང་པོའི་པགས་པ་འཛིན་པའོ། །ཞབས་གཡས་པའི་འོག་ཏུ་ནི་མི་དང་། །མ་ཧེ་དང་། གླང་དང་། །བོང་བུ་དང་། རྔ་མོ་དང་། ཁྱི་དང་། ལུག་དང་། ཅེ་སྦྱང་ངོ་། །ཞབས་གཡོན་པའི་འོག་ཏུ་ནི་བྱ་རྒོད་དང་། འུག་པ་དང་། ཁྭ་དང་། ནེ་ཙོ་དང་། ཁྲ་དང་། མན་ཏྲི་དང་། བྱ་རྒོད་ཆེན་པོ་དང་། བྱ་ལོང་ངོ་། །དེ་ལྟར་གྱུར་པའི་རྡོ་རྗེ་འཇིགས་བྱེད་བསམ་གཏན་ནམ་འདྲིར་གཞུག་པར་བྱའོ། །དེའི་འོག་ཏུ་དུར་ཁྲོད་ཆེན་པོ་སྲིན་པོ་དང་། ཞིང་སྐྱོང་བ་དང་། རོ་ལངས་དང་ལྡན་པ་དང་། གསལ་ཤིང་གིས་ཕུག་པའི་སྐྱེས་བུ་དང་། བསྲེགས་པའི་སྐྱེས་བུ་དང་། མདུང་གིས་ཕུག་པ་དང་། ཁྭ་དང་། བྱ་དུ་མ་དང་། ཁྱི་དང་ལྡན་པར་ཧ་ཧས་ཀུན་ཏུ་ཁྱབ་པར་བྱེད་པ་དེ་ལྟར་ཆོ་གས་རྣལ་འབྱོར་པས་བསྒོམ་པར་བྱའོ། །དྲག་ཤུལ་གྱི་ལས་ཐམས་ཅད་རབ་ཏུ་གྲུབ་པར་བྱེད་པ་ཞེས་བྱ་བ་རྡོ་རྗེ་འཇིགས་བྱེད་ཆེན་པོ་འདི་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་མཱྃ་ལས་ཡེ་ཤེས་སྐྱེས། །འོད་ཟེར་ཅན་ནི་སྣང་བྱེད་དོ། །རྟ་བདུན་དག་གི་ཤིང་རྟར་གནས། །འབར་བའི་དཀྱིལ་འཁོར་འཇིགས་བྱེད་མ། །ཞལ་གསུམ་མ་ལ་སྤྱན་གསུམ་མ། །ཕྱག་དྲུག་མདོག་ནི་སེར་མོ་མཚུངས། །གཡས་པ་སྔོན་པོར་གྱུར་པ་དང་། །གཡོན་པ་ཀུན་ད་ཟླ་བ་མཚུངས། །འོད་ཟེར་དུ་མའི་འོད་གསལ་མ། །ཕྱོགས་བཅུ་སྲུང་བ་རྩོམ་པ་མོ། །ཞལ་ནི་རྣམ་པར་འཛུམ་པ་དང་། །སྒེག་ཅིང་ཤིན་ཏུ་ལང་ཚོ་བབ། །སྣ་ཚོགས་གོས་ལ་སོགས་པ་དང་། །རྒྱན་རྣམས་ཀུན་གྱིས་རྒྱན་བྱེད་མ། །དབུ་རྒྱན་རྫོགས་པའི་སངས་རྒྱས་ལྔ། །ཐོར་ཚུགས་མེ་ཏོག་དག་གིས་སྤྲས། །གཡས་པའི་ཕྱག་ན་རྡོ་རྗེ་སྟེ། །གཉིས་པ་ཁབ་ནི་སྐུད་པ་ཅན། །གསུམ་པར་མདའ་ནི་གསོར་བ་སྟེ། །གཡོན་པ་ལ་ནི་སྡིགས་མཛུབ་ཞགས། །ཨ་ཤོ་ཀ་ཡི་ཡལ་ག་གཉིས། །གསུམ་པ་ལ་ནི་གཞུ་ཉིད་དེ། །ཀུན་དུ་འོད་ཟེར་སྣ་ཚོགས་ནི། །སངས་རྒྱས་སྤྲིན་དང་འདྲ་བ་སྤྲོ།