།སངས་རྒྱས་སྤྲིན་དང་འདྲ་བ་སྤྲོ། །འདི་ནི་བསྒོམས་པ་ཙམ་གྱིས་ནི། །སེམས་ཅན་རྣམས་ནི་དབང་དུ་སྡུད། །རྡོ་རྗེ་སེམས་དཔའ་དེ་བཞིན་གཤེགས། །བཅོམ་ལྡན་རྡོ་རྗེ་ཅན་གྱིས་གསུངས། །ནམ་མཁའི་ཁམས་ཀྱི་ནང་སོན་པར། །ཉི་མའི་དཀྱིལ་འཁོར་ངེས་བསམ་བྱ། །བྃ་ལས་ཡོངས་གྱུར་ལྷ་མོ་ནི། །ཁ་དོག་སེར་མོ་ཆེར་འབར་མ། །ཞལ་གསུམ་མ་ལ་སྤྱན་གསུམ་ཉིད། །ཁྲོ་བཅས་ཞལ་ནི་འཛུམ་པ་དང་། །རྒྱན་རྣམས་ཀུན་གྱིས་ཤིན་ཏུ་བརྒྱན། །ཕྱག་དྲུག་སར་བའི་ལང་ཅོ་མ། །གཡས་པའི་ཕྱག་ན་རྡོ་རྗེ་དང་། །གཉིས་བ་ན་ནི་དགྲ་སྟ་ཉིད། །གསུམ་པ་ན་ནི་མདའ་གསོར་མ། །གཡོན་པ་ན་ནི་སྡིག་མཛུབ་ཞགས། །གཉིས་པར་ཤིང་ལོའི་རྔ་ཡབ་དང་། །གསུམ་པར་གཞུ་ནི་འཛིན་པ་ཉིད། །མེ་ཏོག་གིས་ནི་ཐོར་ཚུགས་དཀྲིས། །པདྨ་དཀར་པོ་གནས་པ་དང་། །འོད་ཟེར་དམར་པོས་བརྒྱན་པ་མ། །ཁྲོ་བོ་འབར་བའི་སྤྲོ་བ་འབབ། །ཁྲོ་བོ་འབར་བས་ཀུན་སྐྲག་ཅིང་། །བསྲེགས་ཤིང་སྐྱེ་དགུ་གཟས་ཟིན་གང་། །ཁྲོ་བོ་འབར་བས་སྨོན་པ་དང་། །མི་བསྐྱོད་པ་ཡིས་མགོ་བོ་མནན། །དཀར་པོ་རིགས་ལྔའི་སངས་རྒྱས་ཡང་། །བདུད་རྩི་རབ་ཏུ་ཆར་འབེབས་པ། །སྔར་བཞིན་གཡས་དང་གཞན་པའི་ཞལ། །འདི་འདྲའི་སྒྱུ་མ་ཀུན་གཞིའི་ཕྱིར། །དེ་ལྟར་རྣལ་འབྱོར་པ་ཡིས་བསྒོམ། །ནད་ཐམས་ཅད་འཇོམས་པར་བྱེད་པའི་རི་ཁྲོད་མ་ཤིང་ལོ་ཅན་ཞེས་བྱ་བ་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་ཆེན་པོས་བཀའ་སྩལ་ཏོ། །རྡོ་རྗེ་ཁྲོ་བོ་བསྒོམ་པ་ནི། །ལྷ་མོ་སྐལ་བ་ཆེན་མོ་ཉོན། །ཁྲོ་བོའི་སྐུར་ནི་བླངས་ནས་ནི། །ཁྲོ་བོའི་རྒྱལ་པོ་བསྒོམ་པར་བྱ། །ཞལ་བཞི་པ་ལ་ཕྱག་བཞི་པ། །ཇི་སྲིད་དེ་བཞིན་ཕྱག་འབུམ་ཉིད། །ཁྲོ་བོ་ཆེན་པོ་ལུས་དཀར་བ། །དེ་མདོག་མཚོན་ཆ་འཛིན་མར་ནི། །རྡོ་རྗེ་ཕག་མོ་བརྟག་པར་བྱ། །དཔའ་བོ་ཐོད་པའི་ཕྲེང་བ་ཅན། །ཐལ་བས་ལུས་ལ་བྱུགས་པ་དང་། །ཕྱག་རྒྱ་ལྔ་ཡིས་རྣམ་པར་བརྒྱན། །མདུང་རྩེ་རལ་པའི་ཅོད་པན་མཚན། །ཞལ་གྱི་མཆེ་བ་ཅུང་ཟད་གཙིགས། །ཡི་དགས་ཆེན་པོ་གདན་མཛད་པ།