འདི་ལྟ་བུའི་ལྟས་མཐོང་བ་དག་ལས་ན་གདོན་མི་ཟ་བར་དེང་ཉིད་དུ་བདག་རྒྱལ་པོར་འགྱུར་རོ་སྙམ་མོ། །ཡང་དེའི་སྐབས་སུ་གྲོང་ཁྱེར་གྱི་མི་དང་། བློན་པོ་དང་། ཡུལ་གྱི་མི་རྣམས་ཀྱིས་ཚོལ་བའི་མི་རྣམས་ལ་ཐོས་ནས་མགུ་བར་གྱུར་ཏེ། ཐམས་ཅད་འདུས་ནས་རྒྱལ་སྲིད་ཀྱི་དབང་བསྐུར་བའི་ཡོ་བྱད་ཁྱེར་ཏེ་སྐྱེད་མོས་ཚལ་དེར་དོང་ངོ་། །དེ་ནས་རེ་ཞིག་ན་ལྷའི་འབྱོར་པ་དེ་དག་མཐོང་སྟེ། མཐོང་ནས་ཀྱང་མཆོག་ཏུ་ཡ་མཚན་དུ་གྱུར་ཏོ། །གཞོན་ནུ་བསོད་ནམས་སྟོབས་ཀྱང་དེ་དག་མཐོང་ནས་ལྷའི་པད་མ་ཆེན་པོ་དེ་དག་ཉིད་ལ་སྐྱིལ་མོ་ཀྲུང་བཅས་ཏེ་འདུག་གོ། །དེ་ནས་གཞོན་ནུ་བསོད་ནམས་སྟོབས་ཀྱི་བསོད་ནམས་དག་གིས་བསྐུལ་ནས་རྒྱལ་པོ་ཆེན་པོ་བཞིས་ཆེ་བ་ལ་འོས་པའི་ལྷའི་སེང་གེའི་ཁྲི་ཕུལ་ལོ། །ལྷའི་དབང་པོ་བརྒྱ་བྱིན་ནི་གདུགས་དཀར་པོ་དང་རྔ་ཡབ་ནོར་བུའི་ཡུ་བ་ཅན་འབུལ་ལོ། །སུམ་ཅུ་རྩ་གསུམ་གྱི་ལྷ་རྣམས་ནི་ལྷའི་བླ་རེ་རིན་པོ་ཆེ་སྣ་ཚོགས་ཀྱིས་སྤྲས་པ་འགྲེམས་སོ། །རླུང་གཏོང་བ་དང་བར་སྣང་ལ་གནས་པའི་ལྷ་རྣམས་ནི་ལྷའི་མེ་ཏོག་རྣམ་པ་སྣ་ཚོགས་ཀྱི་ཆར་འབེབས་སོ། །རྒྱལ་ཆེན་བཞིའི་རིས་ཀྱི་ལྷ་རྣམས་ནི་ལྷའི་རིན་པོ་ཆེའི་ཆར་འབེབས་ཤིང་ལྷའི་རོལ་མོའི་སྒྲ་རྣམས་ཀྱང་སྒྲོགས་སོ། །གོས་ཀྱང་འཐོར་རོ། །རྒྱལ་པོའི་ཕོ་བྲང་འཁོར་དང་། སྐྱེད་མོས་ཚལ་དང་། ནགས་ཚལ་དུ་བཅས་པ་དེ་དག་ཐམས་ཅད་ཀྱང་རྡོ་དང་། གསེག་མ་དང་། གྱོ་མོ་མེད་པར་བྱས་ཏེ་བཞག་གོ། །རྒྱལ་མཚན་དང་བ་དན་ནི་བསྒྲེང་། དར་གྱི་ལྡ་ལྡིའི་ཆུན་པོ་ནི་ཀུན་ཏུ་བྲེས། དྲི་ཞིམ་པོའི་བདུག་པའི་སྣོད་ནི་བཏགས། མེ་ཏོག་སྣ་ཚོགས་ནི་གཏོར་ཏེ་ལྷའི་གནས་འདྲ་ཞིང་། ལྷའི་བུ་ལས་སྣ་ཚོགས་ཅན་གྱིས་ནི་གཞོན་ནུ་བསོད་ནམས་སྟོབས་ཡོངས་སུ་ལོངས་སྤྱོད་པའི་ཕྱིར་བརྒྱ་བྱིན་གྱི་བཀས་སྐྱེད་མོས་ཚལ་དེར་ལྷའི་ཁང་པ་བརྩེགས་པ་ཆེན་པོ་རིན་པོ་ཆེ་སྣ་བཞི་ལས་བྱས་པ་རྣམ་པ་སྣ་ཚོགས་དང་ལྡན་པ་ཞིག་སྤྲུལ་ཏོ། །དེ་ནས་གྲོང་ཁྱེར་གྱི་མི་དང་། བློན་པོ་དང་། ཡུལ་གྱི་མི་དེ་དག་གིས་ལྷའི་འབྱོར་པ་དེ་དག་མཐོང་ནས་ངོ་མཚར་དུ་གྱུར་རྨད་དུ་གྱུར་ཏེ། གུས་པར་བསྒྲིམ་པས་ཚམ་ཚོམ་མེད་པར་གཞོན་ནུ་བསོད་ནམས་སྟོབས་ལྷའི་སེང་གེའི་ཁྲི་ལ་བཞུགས་སུ་གསོལ་ནས་བཀུར་སྟི་ཆེན་པོས་རྒྱལ་སྲིད་ཀྱི་དབང་བསྐུར་བས་དབང་བསྐུར་རོ། །དགེ་སློང་དག་དབང་བསྐུར་མ་ཐག་ཏུ་གཞོན་ནུ་བསོད་ནམས་སྟོབས་ཀྱི་ལུས་ལས་སྣང་བ་གང་གིས་ཉི་མའི་དཀྱིལ་འཁོར་གྱི་འོད་མེད་པར་བྱས་ཏེ།