རྒྱལ་པོར་འོས་པའི་སེམས་ཅན་ཚོལ་བ་ལ་ཞུགས་ཏེ་ཚོལ་བའི་མི་ཀུན་ཏུ་བཀྱེའོ། །གཞོན་ནུ་བསོད་ནམས་སྟོབས་ཀྱང་རྒྱལ་པོར་འགྱུར་བའི་སྔོན་གྱི་དགེ་བའི་རྩ་བ་རྣམས་ཀྱིས་བསྐུལ་ནས་དེའི་ཚེ་སྟེན་གྲོགས་དག་དང་ལྷན་ཅིག་ཏུ་ཕྱི་རོལ་གྱི་སྐྱེད་མོས་ཚལ་དུ་སོང་ངོ་། །སོང་ནས་དེ་ལ་བཀྲ་ཤིས་པའི་ལྟས་རྣམས་བྱུང་སྟེ། ནམ་མཁའ་ལས་ཆུའི་རྒྱུན་མགོ་བོར་བབ་ཅིང་། བྱ་ཁ་དོག་སྣ་ཚོགས་པ་དག་གཡས་ཕྱོགས་ནས་སྐོར་བར་བྱེད་ལ། ཁྱེའུ་དང་བུ་མོ་དག་ཀྱང་རྒྱལ་བའི་སྒྲ་སྒྲོགས་པར་བྱེད་དེ། སེམས་སྤྲོ་བ་དང་བཅས་ཤིང་ཡིད་བདེ་བར་གྱུར་པས་གནས་སོ། །གཞོན་ནུ་དེ་ཡང་བ་སྤུའི་ཁུང་བུ་ཐམས་ཅད་ཟིང་ཞེས་བྱེད་དོ། །ས་གཞི་ཡང་རྡོ་དང་། གསེག་མ་དང་། གྱོ་མོ་མེད་པར་གྱུར་ཏོ། །དེའི་ལུས་ཀྱང་ཤིན་ཏུ་ཡང་བར་གྱུར་ཏོ། །དགའ་ཞིང་ཡིད་དང་འཐད་པའི་སྒྲ་ཡང་ཐོས་སོ། །དེ་ལྟས་ཀྱི་དཔྱད་ལ་མཁས་པ་ཡིན་ཏེ། དེ་འདི་སྙམ་དུ་འདི་ལྟར་བདག་ལ་ལྟས་རྣམས་བྱུང་བས་དེང་ནི་གདོན་མི་ཟ་བར་བདག་རྒྱལ་པོ་ཆེན་པོར་དབང་བསྐུར་བར་འགྱུར་རོ་སྙམ་དུ་བསམས་སོ། །དེ་ནས་དེ་མཐར་གྱིས་སྐྱེད་མོས་ཚལ་གྱི་ནང་དུ་སོང་སྟེ། སྐྱེད་མོས་ཚལ་གྱི་བདེ་བ་ཉམས་སུ་མྱོང་ནས་ཤིང་མྱ་ངན་འཚང་མེ་ཏོག་ཤིན་ཏུ་རྒྱས་པ་ཞིག་གི་དྲུང་དུ་ཉལ་ཏེ་གཉིད་ཀྱིས་ལོག་གོ། །དེའི་གྲོགས་པོ་དེ་དག་ཀྱང་མེ་ཏོག་དང་འབྲས་བུ་ལ་སེམས་གཡེངས་ནས་སྐྱེད་མོས་ཚལ་དེ་ཕན་ཚུན་ཀུན་ཏུ་འཁྱམ་པ་ལ་ཞུགས་སོ། །དེའི་བར་སྐབས་སུ་གཞོན་ནུ་བསོད་ནམས་སྟོབས་ཀྱི་བསོད་ནམས་ཀྱི་མཐུས་ཀླུ་རྣམས་ཀྱིས་ལྷའི་པད་མ་ཆེན་པོ་ཤིན་ཏུ་མཆོག་ཏུ་ཡིད་དུ་འོང་ལ་ཁ་དོག་དང་དྲི་དང་ལྡན་པ་འདབ་མ་སྟོང་པ་ཤིན་ཏུ་དགའ་བར་བྱེད་པ་ཞིག་ས་ལ་བརྟོལ་ཏེ་འཐོན་པར་བྱས་ནས། པད་མ་ཆེན་པོ་དེ་ལ་གཞོན་ནུ་བསོད་ནམས་སྟོབས་མཐར་གྱིས་དལ་ནས་བཏེག་སྟེ་བཞག་ནས་དེ་ཅི་ནས་སད་པར་མི་འགྱུར་བ་དེ་ལྟ་བུར་ཡང་བྱིན་གྱིས་བརླབས་སོ། །དེ་ནས་ཉི་མ་གུང་ལས་ཡོལ་ཏེ་ཟན་ཟ་བའི་དུས་ལས་འདས་ནས་ཤིང་གཞན་དག་གི་གྲིབ་མ་ནི་ཤར་ཕྱོགས་སུ་གཞོལ་ཞིང་། ཤར་ཕྱོགས་སུ་འབབ་སྟེ། ཤར་ཕྱོགས་སུ་བབ་ན། ཤིང་མྱ་ངན་འཚང་དེའི་གྲིབ་མ་ནི་གཞོན་ནུ་བསོད་ནམས་སྟོབས་ཀྱི་ལུས་མི་གཏོང་ངོ་། སྐྱེད་མོས་ཚལ་དེའི་མེ་ཏོག་དང་འབྲས་བུའི་ཤིང་གང་ཡིན་པ་དེ་དག་ཐམས་ཅད་ཀྱང་ཤིང་མྱ་ངན་འཚང་དེ་གང་ན་འདུག་པ་དེ་ལོགས་སུ་མངོན་པར་འདུད་པར་གྱུར་ཏོ།