Degé Kangyur volume 76, F.11.a

།དེ་ཡང་འདི་སྙམ་དུ་ཁྱིམ་འདིར་ལོངས་སྤྱོད་འབྱོར་པ་བྱུང་བ་འདི་ནི་སྔོན་མ་མཐོང་བའི་སེམས་ཅན་འདི་བདག་གི་ཁྱིམ་དུ་འོངས་པ་དེའི་མཐུ་ཡིན་ནོ་སྙམ་དུ་སེམས་སོ། །​དེ་ནས་གཞོན་ནུ་བསོད་ནམས་སྟོབས་ཀྱིས་ལོངས་སྤྱོད་འབྱོར་པ་དེ་དག་མི་དབུལ་པོ་དེ་ལ་ཅི་བདེར་སྤྱོད་དུ་བཅུག་སྟེ། དེའི་ཚེ་མི་དབུལ་པོ་དེ་ཕྱུག་ཅིང་ནོར་མང་ལ་ལོངས་སྤྱོད་ཆེ་བར་གྱུར་ཏོ། །​དེ་ནས་འདི་སྙམ་དུ་རྟོག་སྟེ། བདག་སྔོན་ཤིན་ཏུ་དབུལ་ཞིང་འདུག་འདུག་པ་ལས། ད་བདག་གི་དཔལ་དང་སྐལ་བ་བཟང་པོ་འབྱོར་བར་གྱུར་པ་དེ་དག་ཐམས་ཅད་ནི་གཞོན་ནུ་འདི་ལ་བརྟེན་ཏོ། །​གང་གི་ཕྱིར་གང་གི་ཉིན་མོ་གཞོན་ནུ་འདི་བདག་གི་ཁྱིམ་དུ་འོངས་པ་དེའི་ཉིན་པར་ཉིད་དུ་བདག་གི་ཁྱིམ་དུ་དཔལ་བྱུང་བར་གྱུར་པ་ལས་ན། སེམས་ཅན་འདི་ནི་བསོད་ནམས་ཀྱིས་ཆེ་བར་གྲགས་པ་ཞིག་གིས་བཀུར་སྟི་བྱ་བའི་རིགས་སོ་སྙམ་སྟེ། དེ་ནས་དེས་དེ་ལ་རྒྱུན་མི་འཆད་པར་བཀུར་སྟི་ཤིན་ཏུ་ཆེན་པོས་བཀུར་སྟི་བྱས་ནས་མི་དབུལ་པོ་ཆེ་གེ་མོ་ཞིག་གི་ཁྱིམ་དུ་གཞོན་ནུ་སྔོན་མ་བྱུང་བ་ཞིག་འོངས་ཏེ། དེའི་མཐུས་ཁྱིམ་དེར་དཔལ་བྱུང་བར་གྱུར་ཏོ་ཞེས་ཀུན་ཏུ་སྒྲ་གྲགས་སོ། །​སྐྱེ་བོ་མང་པོ་དག་གིས་དེ་ཐོས་ནས། གཞོན་ནུ་བསོད་ནམས་སྟོབས་ལ་མངོན་པར་དགའ་བར་གྱུར་ཏེ། ཀྱེ་མ་བསོད་ནམས་དག་གི་མཐུས་ཞེས་ཆེད་དུ་བརྗོད་པ་ཆེད་དུ་བརྗོད་དོ། །​དེའི་ཚེ་ལྗོངས་དེར་ཡང་གཞོན་ནུ་བསོད་ནམས་སྟོབས་ཀྱི་མཐུས་མེ་ཏོག་དང་། འབྲས་བུའི་ཤིང་རྣམས་རྟག་ཏུ་རྒྱས་པར་གྱུར་ཏོ། །​ལྷ་ཡང་དུས་དུས་སུ་ལེགས་པར་འཐུན་པར་ཆར་གྱི་རྒྱུན་འབེབས་ཏེ། འབྲུ་ཤིན་ཏུ་ཕུན་སུམ་ཚོགས་པ་བྱུང་བར་གྱུར་ཏོ། །​དེ་ནས་སྐྱེ་བོ་མང་པོ་བསོད་ནམས་དག་གིས་སེམས་དགའ་བར་བྱས་ཏེ། ལྟད་མོ་ལྟ་འདོད་པར་གྱུར་ནས་དེ་ལྟ་བའི་ཕྱིར་དོང་ངོ་། །​དེ་ནས་གཞོན་ནུ་བསོད་ནམས་སྟོབས་ཀྱིས་སྐྱེ་བོ་ལྷགས་པ་དེ་དག་བསྡུ་བར་འདོད་དེ། ཀྱེ་མ་བདག་ལ་ཁྱིམ་རིན་པོ་ཆེ་ཐམས་ཅད་ཀྱིས་གང་ཞིང་འཚོག་ཆས་རྣམ་པ་སྣ་ཚོགས་དང་ལྡན་ལ། བྲན་དང་བྲན་མོ་དང་ལས་བྱེད་པས་གང་བ་རྣམ་པ་སྣ་ཚོགས་བལྟ་ན་ཡིད་དུ་འོང་བ་ཞིག་བྱུང་ན་ཅི་མ་རུང་སྙམ་དུ་སེམས་བསྐྱེད་དོ། །​དགེ་སློང་དེ་དག་སེམས་བསྐྱེད་མ་ཐག་ཏུ་གཞོན་ནུ་བསོད་ནམས་སྟོབས་ཀྱི་ཁྱིམ་ཆེན་པོ་རིན་པོ་ཆེ་ཐམས་ཅད་ཀྱིས་གང་ཞིང་འཚོག་ཆས་རྣམ་པ་སྣ་ཚོགས་དང་ལྡན་ལ། བྲན་དང་བྲན་མོ་དང་ལས་བྱེད་པས་གང་བ་རྣམ་པ་སྣ་ཚོགས་བལྟ་བ་ཡིད་དུ་འོང་བ་གློ་བུར་དུ་བྱུང་ངོ་།



The English translation of this folio by 84000 - Translating the words of the Buddha can be found at:
https://read.84000.co/translation/toh347.html?part=UT22084-076-001-395#UT22084-076-001-395