Degé Kangyur volume 76, F.10.b

།དེ་ནས་བསོད་ནམས་སྟོབས་ཀྱིས་དེ་དག་ལ་ཡང་སྨྲས་པ། ཀྱེ་ཚུར་ཤོག་བདག་ཅག་ཤིན་ཏུ་རིང་བ་གཞན་གྱི་ཡུལ་ཞིག་ཏུ་དོང་སྟེ། ཆ་ལུགས་མི་མངོན་པར་འཁོད་ན། འདི་ལྟར་ཅི་གཟུགས་མི་རྣམས་ཀྱི་ཉམས་སུ་དཔེན་པ་ཡིན་ནམ། འོན་ཏེ་བརྩོན་འགྲུས་སམ། བཟོའམ། ཤེས་རབ་བམ། བསོད་ནམས་ཉམས་སུ་དཔེན་པ་ཤེས་པར་འགྱུར་རོ། །​དེ་ནས་གཞོན་ནུ་དེ་དག་གིས་དེ་ལྟར་བྱའོ་ཞེས་བྱས་ནས་གཞོན་ནུ་བསོད་ནམས་སྟོབས་ཀྱི་ལྟར་མཉན་ཏེ། ཡབ་ལ་མ་གསོལ་བར་ཚམ་ཚོམ་མེད་པར་ཤིན་ཏུ་རིང་བ་རྒྱལ་ཁམས་གཞན་དང་། ཡུལ་གཞན་དུ་དོང་ནས་རྒྱལ་པོའི་ཕོ་བྲང་འཁོར་གཞན་ཞིག་ཏུ་ཞུགས་ཏེ། ཆ་ལུགས་མི་མངོན་པར་འཁོད་དོ། །​དེ་ནས་གཟུགས་དང་ལྡན་པ་ནི་མཐོང་ན་ཡིད་དུ་འོང་བས་བསྡུས་པའི་སྐྱེ་བོ་དག་གིས་བཤུགས་པའི་ལོངས་སྤྱོད་ཙམ་གྱིས་འཚོའོ། །​བརྩོན་འགྲུས་ཅན་གྱིས་ནི་ཆུ་ཀླུང་ཤུགས་དྲག་ཅིང་མགྱོགས་ལ་ཤིན་ཏུ་ཟབ་ཅིང་མཐོང་ནས་འཇིགས་པས་ཙན་དན་གྱི་ཤིང་ཆེན་པོ་ཁྱེར་བ་ན། གཞན་དག་གིས་བླང་བར་མི་ནུས་པ་བརྩོན་འགྲུས་ཀྱི་སྟོབས་ཆེན་པོས་དྲངས་ནས་འཚོང་ཞིང་དེ་ལས་བྱུང་བའི་ལོངས་སྤྱོད་ཙམ་གྱིས་འཚོའོ། །​བཟོ་དང་ལྡན་པ་ཡང་བཟོ་སྟོན་པ་ལས་བྱུང་བའི་ལོངས་སྤྱོད་ཙམ་གྱིས་འཚོའོ། །​ཤེས་རབ་ཅན་གྱིས་ཀྱང་ཚོང་དཔོན་གཉིས་འཁོན་བྱུང་ནས་ཡུན་རིང་དུ་ལོན་པ་ཤེས་རབ་ཀྱི་མཁས་པས་མཛའ་བར་བྱས་ཏེ། དེ་ནས་དེ་གཉིས་ཡོངས་སུ་མགུ་བས་ནོར་བྱིན་པ་ཙམ་གྱིས་བདེ་བར་འཚོའོ། །​གཞོན་ནུ་བསོད་ནམས་སྟོབས་ཀྱང་བདག་གིས་བསོད་ནམས་བྱས་པ་རྣམས་ཀྱི་ཆེ་བ་ཉིད་བསྒྲགས་པའི་ཕྱིར་མི་ཤིན་ཏུ་དབུལ་པོ་ཞིག་གི་ཁྱིམ་དུ་ཞུགས་ནས། དེ་གང་གི་ཉིན་པར་ཁྱིམ་དེར་ཞུགས་པ་དེའི་ཉིན་པར་ཉིད་དུ་གཞོན་ནུ་བསོད་ནམས་སྟོབས་ཀྱི་བསོད་ནམས་ཀྱི་མཐུས་ཁྱིམ་དེ་ཉིད་ཀྱི་ནང་དུ་འབྱོར་པ་ཆེན་པོ་བྱུང་སྟེ། ཁྱིམ་དེར་ནོར་དང་། འབྲུ་དང་། གསེར་དངུལ་མང་པོས་ཡོངས་སུ་གང་བར་གྱུར་ཏོ། །​དེ་ནས་མི་དབུལ་པོ་དེ་འདི་ཅི་ཞིག་སྙམ་དུ་ཡ་མཚན་དང་མཆོག་ཏུ་དགའ་བ་སྐྱེས་ཏེ། སྔོན་མ་བྱུང་བའི་འབྱོར་པ་འདི་ག་ལས་འོངས་སྙམ་དུ་སེམས་སོ། །​དེ་ཡང་འདི་སྙམ་དུ་ཁྱིམ་འདིར་ལོངས་སྤྱོད་འབྱོར་པ་བྱུང་བ་འདི་ནི་སྔོན་མ་མཐོང་བའི་སེམས་ཅན་འདི་བདག་གི་ཁྱིམ་དུ་འོངས་པ་དེའི་མཐུ་ཡིན་ནོ་སྙམ་དུ་སེམས་སོ།



The English translation of this folio by 84000 - Translating the words of the Buddha can be found at:
https://read.84000.co/translation/toh347.html?part=UT22084-076-001-394#UT22084-076-001-394