Degé Kangyur volume 72, F.165.a

དེའི་ཚེ་དགེ་སློང་གསལ་བ་ཞེས་བྱ་བ་ལྷ་དང་མིས་མཆོད་པའི་མཆོག་ཏུ་གྱུར་པ་དེའི་གནས་ཀྱང་འདི་ལགས་ཏེ། ཡུལ་དབུས་ལས་བྱང་ཕྱོགས་ཀྱི་ས་མཚམས་ཀྱི་རི་དུང་གི་ལྟེ་བ་ཞེས་བྱ་བ་ནི་རི་དེ་ལ་རྩྭའི་རིགས་དུང་གི་ལྟེ་བ་འདྲ་བ་སྐྱེ་བས་དུང་གི་ལྟེ་བའི་རི་ཞེས་བྱ་བར་བཏགས་པར་གྱུར། རི་དེ་དང་ཉེ་བ་ན་ནགས་ཤིག་ན་ཀླུ་མོ་ཨེ་ནི་ཞེས་བྱ་བ་གནས་པས་ཨཻ་ནིའི་ནགས་ཞེས་བྱ་བར་བཏགས་པར་གྱུར། དེ་ན་ཕུག་ཅིག་ཡོད་པ་དང་ཉེ་བར་ཤིང་པ་ཏི་ལི་ཞེས་བྱ་བ་སྐྱེ་བས་པ་ཏི་ལིའི་ཕུག་ཅེས་བཏགས་པར་གྱུར་པ་དེ་ཉིད་དུ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཞེས་བྱ་བ། འཁོར་དགྲ་བཅོམ་པ་བརྒྱད་ཁྲི་དང་གཤེགས་ཤིང་ཐབས་ཅིག་ཏུ་བཞུགས་པར་གྱུར། དགེ་སློང་གསལ་བ་ཡང་དེ་ཉིད་ནའོ། །​དེ་ནས་བཅོམ་ལྡན་འདས་འཁོར་དང་བཅས་པ་དག་ཀྱང་རིམ་པ་བཞིན་དུ་མྱ་ངན་ལས་འདས། བསྟན་པ་ནུབ་ནས་རང་སངས་རྒྱས་བདུན་ཁྲི་དག་མངོན་པར་ཤེས་པ་དྲུག་དང་ལྡན་པ་དག་མཉམ་དུ་བྱུང་སྟེ་གཤེགས་ཤིང་བཞུགས་པར་གྱུར། རང་སངས་རྒྱས་དེ་དག་ཀྱང་མྱ་ངན་ལས་འདས་ནས་དྲང་སྲོང་དྲུག་ཁྲི་མངོན་པར་ཤེས་པ་ལྔ་དང་ལྡན་པ་དག་ཀྱང་དེ་ཉིད་དུ་གནས་པར་གྱུར་ཏོ། །​བཙུན་པ་རབ་མཐོང་ཆེན་པོ་དེ་ནས་ཡང་བསྐལ་པ་དྲུག་ཅུ་རྩ་གཅིག་ན་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་སྟེ། དེའི་དགེ་སློང་རབ་གསལ་ཞེས་བྱ་བ་ལྷ་དང་མིས་མཆོད་པའི་མཆོག་ཏུ་གྱུར་པ་ཡང་དེ་ཉིད་ནའོ། །​མཚམས་ཀྱི་རི་དེ་ཉིད་ལ་རྩྭའི་རིགས་རོ་ཧི་ཏཱི་ཞེས་བྱ་བ་སྐྱེ་བས་རོ་ཧི་ཏཱིའི་རི་ཞེས་བྱ་བར་བཏགས་པར་གྱུར། ཀླུ་མོ་གོས་མེད་ཅེས་བྱ་བ་གནས་པས་གོས་མེད་ཀྱི་ནགས་ཞེས་བྱ་བར་བཏགས་པར་གྱུར། ཤིང་ཤིར་ཤ་སྐྱེ་བས་ཤིང་ཤིར་ཤའི་ཕུག་ཅེས་བཏགས་པར་གྱུར། ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་འཁོར་དགྲ་བཅོམ་པ་བདུན་ཁྲི་དང་ཡང་དེར་གཤེགས་ཤིང་ཐབས་ཅིག་ཏུ་བཞུགས་པར་གྱུར། དེ་དག་ཀྱང་མྱ་ངན་ལས་འདས་བསྟན་པ་ནུབ་ནས། རང་སངས་རྒྱས་དྲུག་ཁྲི་ཡང་དེར་གཤེགས་ཤིང་བཞུགས་པར་གྱུར།



The English translation of this folio by 84000 - Translating the words of the Buddha can be found at:
https://read.84000.co/translation/toh314.html?part=UT22084-072-014-298#UT22084-072-014-298