གཞན་ཡང་རྣལ་འབྱོར་སྤྱོད་པ་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་ལུས་རྣམས་རིག་པར་བྱེད་དེ། ཆུ་མཉམ་པའི་རྒྱ་མཚོ་དེ་ལས་རིང་དུ་འདས་ནས། ཆུ་ཀླུང་གི་རིགས་སུ་གྱུར་པའམ། རྒྱ་མཚོའི་རིགས་སུ་གྱུར་པའམ། རིའི་རིགས་སུ་གྱུར་པ་གཞན་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ལུས་འཕགས་པོ་ཞེས་བྱ་བའི་གླིང་ཡོད་དེ། དཔག་ཚད་སྟོང་ཕྲག་བརྒྱད་པ་ཉེ་འཁོར་ཡོངས་སུ་ཟླུམ་པར་གྱུར་པ་གྲོང་དང་། གྲོང་ཁྱེར་དང་། ཚོང་འདུས་རྣམས་ཕུན་སུམ་ཚོགས་པ་དང་། ཆུ་ཀླུང་དང་། ལྗོན་ཤིང་དང་། ནགས་དང་། ཉེ་བའི་ནགས་དང་། ཁྲུས་ཀྱི་རྫིང་བུ་དང་། གླིང་དང་། རི་དང་། འབབ་ཆུ་དང་། ཤིང་ཚང་ཚིང་རྣམས་དཀྲིགས་པ་དང་ལྡན་པའི་ནགས་དང་བཅས་པ་དང་། མེ་ཏོག་དང་། འབྲས་བུ་དང་། རི་དགས་དང་། བྱ་རྣམས་ཀྱང་ཕུན་སུམ་ཚོགས་པ་ཡིན་ནོ། །དེ་ལ་རི་དྲུག་པོ་འདི་དག་རྣམས་ནི་ཐམས་ཅད་ལ་ཆེ་བར་གྱུར་པ་ཡིན་ཏེ། འདི་ལྟ་སྟེ། ལོགས་ཆེན་པོ་དང་། ནགས་ཀྱི་ཕྲེང་བ་དང་། རྨ་བྱའི་ཚོགས་དང་། ཡི་དགས་ཀྱི་ཁྲོད་དང་། རྒྱ་མཚོ་གྱེན་དུ་འགྲོ་བ་དང་། མིག་གི་ཕྲེང་བ་དང་རྣམས་སོ། །རི་དེ་དག་རྣམས་ཀྱིས་ཤར་ཕྱོགས་ལུས་འཕགས་པོའི་གླིང་ཡོངས་སུ་བསྐོར་བ་ཡིན་ཏེ། འཛམ་བུའི་གླིང་རི་བཞིས་ཇི་ལྟ་བར་ཏེ་སྔར་བཞིན་ནོ། །དེ་ལ་ལོགས་ཆེན་པོའི་རི་རྒྱར་ནི་དཔག་ཚད་སུམ་སྟོང་ཡིན་ཏེ། རི་དེ་ལ་དཔག་ཚད་སྟོང་སྟོང་གི་ནགས་གསུམ་ཡོད་དོ། །འདི་ལྟ་སྟེ། སུ་བེ་ལང་གི་ནགས་དང་། འབབ་ཆུའི་སྒྲ་དང་ལྡན་པའི་ནགས་དང་། མཱ་ལི་ཀ་གངྐ་རའི་ནགས་སོ། །ནགས་ན་ལྗོན་ཤིང་རྣམས་ཕུན་སུམ་ཚོགས་པར་གྱུར་པ་ལ་འདི་ལྟ་སྟེ། ལྭི་ལི་ཀའི་ལྗོན་ཤིང་དང་། རིའི་ཁྲོད་ནས་སྐྱེས་པའི་ལྗོན་ཤིང་དང་། ཡལ་ག་མཉམ་པའི་ལྗོན་ཤིང་དང་། བགྲོད་དཀའ་བར་གྱུར་ནས་སྐྱེས་པར་གྱུར་པའི་ལྗོན་ཤིང་དང་། ཀླུང་ན་སྐྱེས་པའི་ལྗོན་ཤིང་དང་། ཨུཏྤ་ལ་སྐྱེས་པའི་ལྗོན་ཤིང་དང་། རི་བྲགས་ན་སྐྱེས་པའི་ལྗོན་ཤིང་དང་། འཛམ་བུའི་གླིང་གི་ལྗོན་ཤིང་རྣམས་ནི་སྔར་བཞིན་ནོ། །རི་ཆེན་པོའི་ཉེ་འཁོར་ན་སྐྱེས་བུ་གང་དག་གནས་པ་དེ་དག་རྣམས་ནི་མེའི་གཙུག་ཅན་ཞེས་བྱ་བའི་མིང་དུ་འགྱུར་རོ།