ཡིད་དུ་འོང་བ་རྣམས་ཐམས་ཅད་དང་ཡང་ཐ་དད་དུ་གྱུར་པ་དང་། མེད་པར་གྱུར་པ་དང་། བྱེ་བར་གྱུར་པ་དང་། བྲལ་བར་གྱུར་པ་དང་། གཞན་དུ་གྱུར་པ་དང་ལྡན་པར་མ་གྱུར་པ་དང་། གང་ཡང་ལས་ཀྱི་བགོ་སྐལ་ལ་སྤྱོད་པ་ལས་ཀྱི་སྐྱེ་གནས་པ། ལས་བརྟན་པར་བྱས་པ་རང་གི་ལས་ཀྱི་འབྲས་བུ་མྱོང་བར་གྱུར་པས་འཆི་འཕོ་བ་དང་སྐྱེ་བར་མ་གྱུར་པ་དེ་ནི་རྒྱ་མཚོའི་ཡུལ་ཕྱོགས་སམ། རིའི་ཡུལ་ཕྱོགས་སམ། ལྗོན་ཤིང་གི་ཕྱོགས་རྣམས་ལ་ཡང་གཅིག་ཀྱང་མ་མཐོང་ངོ་། །ལན་བརྒྱ་ཕྲག་དང་། དེ་ནས་སྟོང་ཕྲག་དང་། ལན་སྟོང་ཕྲག་བརྒྱ་དང་། ལན་བྱེ་བ་ཕྲག་འབུམ་དུ་ཡང་གང་ལ་བདག་ཅག་རྣམས་སྐྱེས་པ་དང་། ཤི་བ་དང་། སྐྱེས་པར་གྱུར་པ་མ་ཡིན་པ་ནི་ཁབ་ཀྱིས་ཕུག་པ་ཙམ་ཡང་མེད་དོ། །འཐུན་པ་དང་ཡིད་དུ་འོང་བར་གྱུར་པ་རྣམས་ཐམས་ཅད་ཀྱང་ཐ་དད་དུ་གྱུར་པ་དང་། མེད་པར་གྱུར་པ་དང་། གྱེས་པར་གྱུར་པ་དང་། རྣམ་པར་བྲལ་བར་གྱུར་པ་དང་། གཞན་དུ་གྱུར་པར་ནི་ལན་བརྒྱ་ཕྲག་དང་། ལན་སྟོང་ཕྲག་དང་། ལན་བརྒྱ་སྟོང་ཕྲག་བྱེ་བར་གྱུར་པ་བརྒྱ་སྟོང་ཕྲག་ཏུ་གྱུར་ཅིང་། འཁོར་བ་ཐོག་མ་མེད་པ་ནས་འདོད་ཆགས་དང་། ཞེ་སྡང་དང་། གཏི་མུག་གི་ཞགས་པས་ཀུན་ནས་བཅིངས་ནས་འཁོར་བ་ན་ཡང་དམྱལ་བ་དང་། ཡི་དགས་དང་། དུད་འགྲོའི་གནས་རྣམས་སུ་སྐྱེ་བ་དང་། འཆི་བ་དང་། སྐྱེ་བར་འགྱུར་བ་ཡིན་ནོ། །དེའི་ཕྱིར་ན་མྱུར་བ་མྱུར་བར་འཁོར་བ་ལས་ཡིད་འབྱུང་བར་གྱིས་ཤིག །འཁོར་བ་ལ་བརྐམ་ཞིང་ཆགས་པར་འགྱུར་བར་མ་བྱེད་དང་། འཁོར་བ་འདི་ནི་སྡུག་བསྔལ་བ་ཡིན་ནོ། །ཚ་བར་གྱུར་པའི་ཚོར་བ་དང་ལྡན་པ་ཡིན་ཞིང་། རྩུབ་པར་གྱུར་པའི་ཚོར་བ་དང་ལྡན་པ་ཡིན་ཏེ། སྡུག་བསྔལ་དང་ལྷན་ཅིག་ཏུ་གྱུར་པའི་ཚོར་བ་ཡིན་ནོ། །རྒ་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་མང་བ་ཡིན་ནོ། །ལྟུང་བའི་མཐའ་དང་ཟད་པར་གྱུར་པའི་སྒོ་ཡིན་ནོ། །འདི་ན་ནི་ཤིན་ཏུ་ཕྲ་བར་གྱུར་པའི་རྟག་པ་དང་བདེ་བ་ཡང་ཡོད་པ་མ་ཡིན་ནོ། །དཔེར་ན་ཉི་མ་ལ་མུན་པ་ཤིན་ཏུ་ཕྲ་བ་ཡང་མེད་དོ། །དེ་ལྟར་རྣལ་འབྱོར་སྤྱོད་པ་དེ་ཕྱི་རོལ་གྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །