།དེ་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། དེས་བྲག་དང་། ནགས་དང་། རྫིང་བུ་དང་། མེ་ཏོག་གི་ཉེ་བར་ལེན་པ་རྣོ་བའི་མེ་ཏོག་རྣམས་དང་། འབྲས་བུ་ཕུན་སུམ་ཚོགས་པ་རྣམས་ལ་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་ལ་ཀུན་ཏུ་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་དང་བ་ལང་སྤྱོད་གཉིས་ཀྱི་བར་ན་གཞན་རྒྱ་མཚོའི་རིགས་སུ་གྱུར་པའམ། རིའི་རིགས་སུ་གྱུར་པ་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྱང་ཕྱོགས་སྒྲ་མི་སྙན་དང་བ་ལང་སྤྱོད་དག་གི་བྱང་ཕྱོགས་ན་ཉེ་འཁོར་གྱི་མིག་ཅེས་བྱ་བ་རྒྱ་མཚོ་དཔག་ཚད་སྟོང་ཕྲག་བཅུ་པ་ཡོད་དོ། །ཉེ་འཁོར་དུ་དཔག་ཚད་གཅིག་དང་། གཞན་ཡང་དཔག་ཚད་གཉིས་པའོ། །གཞན་ཡང་ས་འོག་གི་ཀླུ་མངའ་བྱེད་པའི་དབང་གིས་ཆུ་མིག་ཡོད་དོ། །ཉེ་འཁོར་གྱི་མིག་གི་རྒྱ་མཚོ་དེ་ལས་འདས་པར་གྱུར་ནས་རྩེད་མོའི་ཕྲེང་བ་ཞེས་བྱ་བའི་རི་གཞན་དཔག་ཚད་སྟོང་ཕྲག་བཅུ་པ་ཡོད་དེ། ཀླུ་རྣམས་ཀྱི་དབུགས་ཀྱིས་བསྲེགས་པས་རྩེ་མོ་མིག་རྩི་ལྟར་ནག་པ་ཡིན་ནོ། །རྩེད་མོའི་ཕྲེང་བའི་རི་དེ་ལས་འདས་པར་གྱུར་ནས་དུང་གི་སྒྲ་སི་མི་སི་མི་ཞེས་བྱ་བའི་རྒྱ་མཚོ་དཔག་ཚད་སྟོང་ཕྲག་བཅུ་ཐམས་ཅད་ཀྱང་གང་བར་ཉ་དང་། ཉ་ཆེན་པོ་དང་། རུས་སྦལ་དང་། ཆུ་སྲིན་ན་ཀྲ་དང་། ཆུ་སྲིན་མ་ཀ་ར་དང་། ཉ་ཕྱིས་དང་རྣམས་ཀྱིས་ཀུན་ཏུ་གང་བར་གྱུར་པས་མཆོག་ཏུ་བགྲོད་དཀའ་བ་བལྟ་བར་འཇིགས་པ་གང་ལ་ལོངས་སྤྱོད་དང་ལྡན་པའི་ཀླུ་ངེས་པར་གནས་པ་ཡིན་ཏེ། ཁྲོ་བས་གཟིར་བ་ཁྲོ་བ་འབྱིན་པར་བྱེད་དོ། །དུང་གི་སྒྲ་སི་མི་སི་མིའི་རྒྱ་མཚོ་དེ་ལས་རིང་དུ་འདས་ནས་ཆུས་ཁྱབ་པ་ཞེས་བྱ་བའི་རྒྱ་མཚོ་དཔག་ཚད་སྟོང་ཕྲག་བཅུ་པ་ཡོད་དེ། གང་གི་ས་རྣམས་རླུང་གིས་དཔག་ཚད་བཅུའམ། དཔག་ཚད་ཉི་ཤུའམ། དཔག་ཚད་སུམ་ཅུ་ཡང་ལྷག་པར་བྱེད་དོ། །ཆུས་ཁྱབ་པར་བྱེད་པའི་རྒྱ་མཚོ་དེ་ལས་རིང་དུ་འདས་ནས་མུ་ཏིག་གི་ཤུ་ཀ་ཏི་ཞེས་བྱ་བའི་གླིང་མུ་ཏིག་གིས་ཀུན་ཏུ་གང་བར་གྱུར་པ་ཡོད་དེ།