ནམ་མཁའ་རིང་བ་ཞེས་བྱ་བ་དཔག་ཚད་སུམ་བརྒྱ་པ་ཡོད་དོ། །དེའི་ཉེ་འཁོར་རྣམས་ན་སྐྱེས་བུ་གང་དག་རབ་ཏུ་གནས་པར་གྱུར་པ་དེ་དག་རྣམས་ནི་གོས་ཀྱིས་གནས་པ་ཞེས་བྱ་བ་ཡིན་ནོ། །ལྗོན་ཤིང་དང་། ཁྲུས་ཀྱི་རྫིང་བུ་དང་། མེ་ཏོག་དང་། འབྲས་བུ་དང་། ཉེ་བའི་ནགས་དང་། ཤིང་གེལ་བ་དང་། འཁྲི་ཤིང་དང་། ཆུ་ཀླུང་རྣམས་ཀྱང་ཕུན་སུམ་ཚོགས་པ་ནི་འདི་ལ་ཡང་སྔ་མ་བཞིན་ནོ། །ནམ་མཁའ་རིང་བ་ལས་འདས་པར་གྱུར་ནས་གཞལ་དུ་མེད་པ་ཞེས་བྱ་བའི་ཆུ་བོ་དཔག་ཚད་བདུན་བརྒྱ་པར་གྱུར་པ་ཡོད་དེ། ཆུ་ཀླུང་དང་། ལྗོན་ཤིང་དང་། ནགས་དང་། ཉེ་བའི་ནགས་དང་། རྫིང་བུ་ཕུན་སུམ་ཚོགས་པ་རྣམས་ནི་སྔར་གྱི་བཞིན་ནོ། །གཞལ་དུ་མེད་པའི་ཆུ་བོའི་ཉེ་འཁོར་ན་ཡུལ་ལྗོངས་ལྔ་གནས་སོ། །འདི་ལྟ་སྟེ། དབུ་རྒྱན་འཛིན་པ་དང་། པ་ལ་ཤ་ཡིས་ཀུན་ཏུ་ཁྱབ་པ་དང་། ཕྲེང་བ་གནས་པ་དང་། རྨ་བྱའི་སྒྲ་དང་། ཀ་ར་ནའི་མཐའ་ན་གནས་པའོ། །དབུ་རྒྱན་འཛིན་ནི་དཔག་ཚད་ཕྱེད་དང་ཉིས་བརྒྱ་ཡིན་ནོ། །པ་ལ་ཤས་ཀུན་ཏུ་ཁྱབ་པ་དང་གཉིས་ནི་དཔག་ཚད་ཕྱེད་དང་ཉིས་བརྒྱ་ཡིན་ནོ། །རྨ་བྱའི་སྒྲ་ནི་དཔག་ཚད་བརྒྱ་ཡིན་ནོ། །ཀ་ར་ནའི་མཐའ་ན་གནས་པ་ནི་དཔག་ཚད་བརྒྱ་ཡིན་ནོ། །གཉིས་པ་ཡང་དེ་ལ་དཔག་ཚད་བརྒྱ་ཕྲག་བཅུར་གནས་ཏེ། དཔག་ཚད་བརྒྱ་པ་དང་། དཔག་ཚད་བརྒྱ་ཕྲག་བཅུར་གནས་པ་ཡིན་ནོ། །འདི་ལྟ་སྟེ། ཀུཌྚཱཾ་ག་ཏི་ན་གནས་པ་དང་། དྲི་རྒྱུ་བ་དང་། ནག་པོ་གསུས་པ་དང་། མིག་ལ་ཀུན་ཏུ་རྒྱུ་བ་དང་། རིའི་ཀླུང་ན་ཀུན་ཏུ་སྤྱོད་པ་དང་། གྲུ་གསུམ་པ་དང་། ཀུན་ནས་ཟླུམ་པར་སྐྱེས་པ་དང་། གསུས་པ་ཉིད་དང་། གཡོས་པ་དང་། ཚོགས་པའོ། །གཞན་ཡང་ཡུལ་ལྗོངས་དེ་དག་རྣམས་ཉིད་ལྟ་བར་བྱེད་དེ། ཆུ་ཀླུང་དང་། ལྗོན་ཤིང་དང་། རྫིང་བུ་དང་། ཉེ་བའི་ནགས་རྣམས་ཀྱང་ཕུན་སུམ་ཚོགས་པ་ནི་སྔ་མ་བཞིན་ནོ། །གླིང་འདི་ནི་གྲུ་བཞི་པ་ཡིན་ཏེ། སྐྱེས་བུ་རྣམས་ཀྱི་བཞིན་ཡང་དེ་དང་འདྲ་བ་ཡིན་ནོ། །དཔེར་ན་གྲུ་གསུམ་དུ་གྱུར་པའི་རྣམ་པ་ནི་འཛམ་བུའི་གླིང་ངོ་། །འཛམ་བུའི་གླིང་གི་སྐྱེས་བུ་རྣམས་ཀྱི་བཞིན་ཡང་དེ་དང་འདྲ་བ་ཡིན་ནོ། །དེ་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཡིན་ནོ།