སྡོང་བུ་ལས་ནི་འདབ་མ་འབྱུང་ངོ་། །འདབ་མ་རྣམས་ལས་ནི་མེ་ཏོག་འབྱུང་ངོ་། །མེ་ཏོག་ལས་ནི་འབྲས་བུ་འབྱུང་བར་འགྱུར་རོ། །དེ་ཁོ་ན་བཞིན་དུ་རྣལ་འབྱོར་སྤྱོད་པ་པ་རྣམས་ཀྱིས་ནང་གི་བདག་ཉིད་རྣམས་ལ་ཡང་མཐོང་བ་ཡིན་ཏེ། དང་པོ་ས་བོན་དུ་གྱུར་པའི་རྣམ་པར་ཤེས་པ་ལས་དང་ཉོན་མོངས་པ་རྣམས་དང་བཅས་པ་ཁུ་ཆུར་ལྟུང་བ་ཡིན་ནོ། །ཁུ་ཆུ་ལས་ནི་མེར་མེར་པོར་འགྱུར་རོ། །མེར་མེར་པོ་ལས་ནུར་ནུར་པོར་འགྱུར་རོ། །ནུར་ནུར་པོ་ལས་ནི་གོར་གོར་པོར་འགྱུར་རོ། །གོར་གོར་པོ་ལས་ནི་ནར་ནར་པོར་འགྱུར་རོ། །ནར་ནར་པོ་ལས་ནི་འབུར་འབུར་ལྔ་འབྱུང་བར་འགྱུར་ཏེ། རྐང་པའི་འབུར་འབུར་གཉིས་དང་། ལག་པའི་འབུར་འབུར་གཉིས་དང་། མགོའི་འབུར་འབུར་གཅིག་གོ། །དེ་ལྟར་འབུར་འབུར་ལྔ་པོ་རྣམས་ལས་ནི་དབང་པོ་རྣམས་གསལ་བར་སྐྱེ་བར་འགྱུར་རོ། །དེ་ལྟར་སྔ་ཕྱིའི་རིམ་པས་རྒ་ཤིའི་མཐར་ཐུག་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ས་བོན་གྱི་ཚོགས་རྣམས་ནི་དང་པོ་སྔོན་པོ་ཉིད་དུ་འགྱུར་རོ། །ཕྱི་ནས་ནི་སྐྱ་བོར་འགྱུར་ཞིང་རྙིངས་པར་འགྱུར་རོ། །ཐམས་ཅད་ཉིད་དུ་མེད་པར་ཡང་འགྱུར་རོ། །དེ་ཁོ་ན་བཞིན་དུ་ལུས་འདི་ཡང་དང་པོ་ནི་བྱིས་པར་འགྱུར་རོ། །བྱིས་པ་ལས་ནི་དར་ལ་བབ་པར་འགྱུར་རོ། །དར་ལ་བབ་པ་ལས་ནི་རྒས་པར་འགྱུར་རོ། །རྒས་པར་གྱུར་ནས་ནི་རྣམ་པ་ཐམས་ཅད་དུ་མེད་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ན་ཕྱི་རོལ་གྱི་ས་བོན་གྱི་ཚོགས་རྣམས་འབྱུང་བར་འགྱུར་བ་ཡིན་ཞིང་ཅི་ལྟར་ཡང་ས་གཞི་ལས་སྨན་དང་ནགས་ཚལ་རྣམས་མངོན་པར་འཕེལ་བར་འགྱུར་བ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཆོས་འདི་དག་རྣམས་ཐམས་ཅད་ནི་ཕན་ཚུན་གྱི་རྒྱུ་ཅན་དང་ཕན་ཚུན་གྱི་རྐྱེན་ཅན་ཡིན་ཞིང་། ཕྱི་རོལ་དུ་གྱུར་པ་དང་ནང་གི་བདག་ཉིད་དུ་གྱུར་པའི་འདུས་བྱས་ཐམས་ཅད་ནི་ཕན་ཚུན་གྱི་སྟོབས་ཀྱིས་སྐྱེ་བར་འགྱུར་བ་ཡིན་ལ་ཆོས་གསུམ་ནི་མ་གཏོགས་སོ། །འདི་ལྟ་སྟེ།