།དེ་མཐོང་བར་གྱུར་པས་ཀྱང་བདུད་ཀྱི་དྲུང་ན་མི་གནས་སོ། །མྱ་ངན་ལས་འདས་པའི་མཐའ་ལ་གནས་པ་ཡིན་ནོ། །དེ་ཀུན་ནས་ཉོན་མོངས་པ་ཅན་དུ་འགྱུར་བའི་འདོད་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ཀྱིས་འཁྲིད་པར་བྱེད་པ་ཉིད་ཀྱང་མ་ཡིན་ནོ། །དགའ་བའི་འདོད་ཆགས་དང་ལྷན་ཅིག་འགྲོགས་པར་གྱུར་པའི་སྲེད་པ་རྣམས་ཀྱིས་འཆིང་བར་མི་བྱེད་དོ། །ཉོན་མོངས་པའི་རྡུལ་རྣམས་དང་རྣམ་པར་བྲལ་བར་འགྱུར་རོ། །ངམ་གྲོག་རྣམས་དང་རྣམ་པར་བྲལ་བ་དང་། གཟུགས་དང་དྲིས་ཀྱང་ཕྲོགས་པ་མ་ཡིན་ནོ། །གཟུགས་ཀྱིས་རྒྱགས་པས་རྒྱགས་པར་ཡང་མི་འགྱུར་རོ། །ལང་ཚོའི་རྒྱགས་པས་རྒྱགས་པར་ཡང་མི་འགྱུར་རོ། །གསོན་པའི་རྒྱགས་པས་རྒྱགས་པར་ཡང་མི་འགྱུར་རོ། །ཚོགས་པ་འདུས་པ་ལ་དགའ་བར་ཡང་མི་འགྱུར་རོ། །རྟག་ཏུ་གྲོང་ཁྱེར་རྣམས་སུ་འཇུག་པར་ཡང་མི་འགྱུར་རོ། །གང་དེ་ལ་མངོན་པར་དགའ་བར་ཡང་མི་བྱེད་དོ། །འཆི་བར་འགྱུར་བའི་འཇིགས་པས་ཀྱང་འཇིགས་པར་འགྱུར་རོ། །ཁ་ན་མ་ཐོ་བ་ཕྲ་རབ་ཙམ་རྣམས་ལ་ཡང་འཇིགས་པར་ལྟ་བར་འགྱུར་རོ། །ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་འགྱུར་རོ། །སྐྱེ་བ་དང་འཇིག་པའི་ཆོས་རྣམས་ཀྱང་ཤེས་པར་འགྱུར་རོ། །དེ་ནི་ཀུན་ནས་ཉོན་མོངས་པ་ཅན་དུ་གྱུར་པའི་འདོད་པ་རྣམས་ཐམས་ཅད་ལས་འདོད་ཆགས་དང་བྲལ་བར་འགྱུར་རོ། །སྙོམ་ལས་ཅན་དུ་མི་འགྱུར་རོ། །དམ་པའི་ཆོས་ལ་ཡང་རྒྱུན་དུ་དགའ་བར་འགྱུར་རོ། །དེ་ལྟར་ནཱ་ལ་ཏིའི་གྲོང་གི་བྲམ་ཟེ་དང་། ཁྱིམ་བདག་རྣམས་དང་། དགེ་སྦྱོང་རྣམས་ཀྱང་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །རྣལ་འབྱོར་སྤྱོད་པ་རྣམས་ཇི་ལྟར་གནས་པ་ཡིན་ཞེ་ན། དགེ་སློང་དག་འདི་ན་ཕྱི་རོལ་གྱི་ཆོས་ཀྱིས་རྣལ་འབྱོར་སྤྱོད་པ་རྣམས་ནང་གི་བདག་ཉིད་ཀྱི་ལུས་ལ་སོ་སོར་རྟོག་པར་བྱེད་དོ། །འདི་ལྟ་སྟེ། ཕྱི་རོལ་གྱི་ཆོས་རྣམས་མཐོང་ནས་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ལས་དང་པོ་ས་བོན་གྱི་ཚོགས་རྣམས་ལ་སོ་སོར་རྟོག་པར་བྱེད་དེ། ས་བོན་ལས་ནི་མྱུ་གུ་འབྱུང་ངོ་། །མྱུ་གུ་ལས་ནི་སྡོང་བུ་འབྱུང་ངོ་། །