ཇི་ལྟར་ན་སྲིན་རྣམས་རླུང་རྣམས་ཀྱིས་ཀུན་དུ་བཅོམ་ནས་རླག་པར་བྱེད་པ་ཡིན། ཇི་ལྟར་ན་ཁམས་རྣམས་ཐམས་ཅད་འཁྲུགས་པར་འགྱུར་བ་ཡིན། ཇི་ལྟར་ན་ཐ་མའི་དུས་ཀྱི་བྱ་བར་འགྱུར་བ་ཡིན། སྲིན་རྣམས་རླུང་གིས་འཇོམས་པར་གྱུར་པ་ན་ཇི་ལྟར་ན་སྟེང་འོག་ཏུ་འགྱུར་བ་ཡིན། དེ་ལྟར་ན་ནང་གི་བདག་ཉིད་དུ་གྱུར་པའི་ལུས་ཀྱི་ལུས་ལ་རྟག་པར་རྒྱུན་དུ་རྣམ་པར་ལྟ་བར་བྱེད་དོ། །འཆི་བའི་དུས་ན་ཁམས་རྣམས་ཐམས་ཅད་ཀྱི་སྲིན་ཀུན་ཏུ་འཁྲུགས་པར་གྱུར་པ། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། སྔོན་དུ་ན་སྲིན་རྣམས་རླུང་གིས་འཇོམས་པར་གྱུར་ལ། ཕྱི་ནས་ནི་བདག་འཆི་བར་འགྱུར་བ་ཡིན་ནོ། །བདག་གི་འདུ་བྱེད་རྣམས་ཐམས་ཅད་ཀྱང་རྣམ་པར་འཇིག་པར་འབྱུང་བར་འགྱུར་ཞིང་བདག་འཆི་བར་འགྱུར་བའི་མཐར་ནི་མི་བཟད་ཅིང་རྩུབ་པའི་ཚོར་བ་རྣམས་འབྱུང་བར་འགྱུར་རོ། །དེས་རྣམ་པར་ལྟ་བར་བྱེད་དེ། གླད་པ་ལ་གནས་ནས་རྒྱུ་བའི་སྲིན་རྣམས་ནི་སེན་མོ་ལ་བརྟེན་པའི་རླུང་གིས་མགོ་ལས་ཀུན་དུ་བགྲོད་ནས་འཇོམས་པར་བྱེད་དོ། །འཆི་བར་བྱེད་དོ། །མགོ་བོ་དང་མགུལ་པ་ལ་རྒྱུ་བའི་སྲིན་རྣམས་ནི་རྐང་པའི་ལོགས་ལ་བརྟེན་པའི་རླུང་གིས་འཇོམས་པར་བྱེད་དོ། །ཐོད་པ་ལ་རྒྱུ་བའི་སྲིན་རྣམས་ནི་སེམས་མེད་པར་བྱེད་པའི་རླུང་གིས་འཇོམས་པར་བྱེད་དོ། །སྐྲ་ཟ་བའི་སྲིན་རྣམས་ནི་རུས་པ་གཅོག་པར་བྱེད་པའི་རླུང་གིས་འཇོམས་པར་བྱེད་དོ། །རྣ་བ་ལ་རྒྱུ་བའི་སྲིན་རྣམས་ནི་འགྲོ་བ་འཇོམས་པར་བྱེད་པའི་རླུང་གིས་འཇོམས་པར་བྱེད་དོ། །སྣབས་ཀྱིས་གཡོགས་པའི་སྲིན་རྣམས་ནི་ལོང་བུའི་ཚིགས་པ་འབྱེད་པའི་རླུང་གིས་འཇོམས་པར་བྱེད་དོ། །ཚིལ་གྱི་མཐའ་ན་རྒྱུ་བའི་སྲིན་རྣམས་ནི་ལྗང་ངར་འབྱེད་པར་བྱེད་པའི་རླུང་གིས་འཇོམས་པར་བྱེད་དོ། །ཚིགས་པ་རྣམས་དང་། འགྲམ་པར་གྱུར་པ་དང་། ལུད་པ་ཟ་བའི་སྲིན་རྣམས་ནི་ཚིགས་པ་འབྱེད་པར་བྱེད་པའི་རླུང་གིས་འཇོམས་པར་བྱེད་དོ། །སོའི་རྩ་བ་ནས་ཟ་བའི་སྲིན་རྣམས་ནི་བྱིན་པ་རབ་ཏུ་འབྱེད་ཅིང་ཉལ་བའི་རླུང་གིས་འཇོམས་པར་བྱེད་དོ། །བདག་གི་སྲིན་གྱི་རིགས་གཞན་བཅུ་མགྲིན་པ་དང་། བྲང་གི་གསེབ་ན་རྒྱུ་བ་རྣམས་རླུང་གི་སྔ་ཕྱི་རིམ་པས་འཇོམས་པར་བྱེད་པ་རྣམས་ནི་འདི་ལྟ་སྟེ། ཟས་སུ་ངར་སྣབས་ཟ་བའི་སྲིན་རྣམས་ནི་སྤྲོ་བ་འཕེལ་བའི་རླུང་གིས་འཇོམས་པར་བྱེད་དོ།