སྲིན་གང་དག་གིས་ཁམས་ལ་དམིགས་པར་བྱེད་པའི་དབང་པོ་ལས་དང་ཉོན་མོངས་པ་དང་བཅས་པའི་ལུས་འཛིན་པར་བྱེད་པ་དང་། མཐོ་འཚམ་པར་བྱེད་པ་རྣམས་ནི་དེ་དག་ལས་མེད་དོ། །རྣལ་འབྱོར་སྤྱོད་པ་དེས་ཐ་མའི་རླུང་ལ་སོ་སོར་བརྟགས་ཤིང་ལུས་ཀྱི་གོང་བུ་འདི་མཐོང་བར་གྱུར་ནས་འདོད་པ་རྣམས་ལས་འདོད་ཆགས་དང་བྲལ་བར་འགྱུར་རོ། །དགའ་བའི་འདོད་ཆགས་དང་ལྷན་ཅིག་ཏུ་གྱུར་པའི་སྲེད་པ་རྣམས་ཀྱིས་མི་འཆིང་ངོ་། །བདུད་ཀྱི་ཡུལ་ལ་མི་གནས་སོ། །མྱ་ངན་ལས་འདས་པའི་མཐའ་ལ་གནས་པ་ཡིན་ནོ། །ཐོག་མ་མེད་པའི་དུས་ནས་རབ་ཏུ་ཞུགས་པར་གྱུར་པའི་འདོད་ཆགས་དང་། ཞེ་སྡང་དང་། གཏི་མུག་གི་མུན་པ་རྣམས་འཇོམས་པར་བྱེད་དོ། །ཡེ་ཤེས་ཀྱི་ཉི་མའི་མཐར་ཡང་འབྱུང་བར་འགྱུར་རོ། །སོམ་ཉི་མེད་པ་དང་། ངམ་གྲོག་རྣམས་དང་རྣམ་པར་བྲལ་བར་ཡང་འགྱུར་རོ། །ཀུན་ནས་ཉོན་མོངས་པ་ཅན་དུ་གྱུར་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ཀྱིས་འཁྲིད་པ་ཡང་མ་ཡིན་ནོ། །ཡུལ་གྱི་དེ་ཁོ་ན་ཉིད་མ་མཐོང་བ་ཡིན་པར་མི་འགྱུར་རོ། །ཁམས་གསུམ་མ་ལུས་པ་རྣམས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་ཇི་ལྟ་བ་བཞིན་དུ་མཐོང་ངོ་། །ནཱ་ལ་ཏིའི་གྲོང་གི་བྲམ་ཟེ་དང་། ཁྱིམ་བདག་རྣམས་དང་དགེ་སྦྱོང་རྣལ་འབྱོར་སྤྱོད་པ་རྣམས་ཀྱིས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་གྱུར་ཏོ། །ལུས་དྲན་པ་ཉེ་བར་གཞག་པ་ལ་མངོན་པར་དགའ་བར་འགྱུར་རོ། །སྐྱེ་བ་དང་འཇིག་པར་འགྱུར་བའི་ཆོས་རྣམས་ཤེས་པ་དང་། གཞན་རྣམས་ཀྱིས་འཁྲིད་པར་མི་འགྱུར་བ་དང་། ལུས་ཐམས་ཅད་ལ་སོ་སོར་རྟོག་པར་གྱུར་པ་ན་བཅིང་བ་དང་ཐར་པ་རྣམས་ཐམས་ཅད་ཤེས་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་དེ་ཉིད་ལ་རྣམ་པར་འཇིག་པའི་མཐར་དང་། ཟད་པ་དང་། འགྲིབ་པ་དང་། རྣམ་པར་འཇིག་པའི་རྣམ་པ་གཞན་དག་རྣམས་ཀྱི་རྣམ་པ་གཞན་རྣམས་ཀྱིས་སོ་སོར་རྟོག་པར་བྱེད་དེ། ཇི་ལྟར་ན་ལུས་འདི་རྣམ་པར་འཇིག་པ་ཡིན། འཆི་བའི་དུས་ན་མེད་པར་འགྱུར་བ་ཡིན། ཇི་ལྟར་ན་སྲིན་རྣམས་རླུང་རྣམས་ཀྱིས་ཀུན་དུ་བཅོམ་ནས་རླག་པར་བྱེད་པ་ཡིན།