།ཚངས་པར་སྤྱོད་པར་འགྱུར་བ་བདག་ཉིན་མོ་སྤྱོད་པའི་སར་འགྲོ་བ་ན་མངོན་པར་སྤྲོ་བར་མི་འགྱུར་བ་དང་ཀུན་དུ་འདྲེ་བར་ཡང་མི་བྱེད་དོ། །གལ་ཏེ་ཡང་འོག་ཏུ་འགྲོ་བར་འགྱུར་བའི་ཁྲག་རྣམ་པར་འབྱེད་པར་བྱེད་ན། དེ་གཞང་དང་ཕོ་མཚན་དག་རྣམ་པར་འཇིག་པར་བྱེད་དེ། དེས་ཀྱང་བདག་གི་ཁྲག་རྣམས་མཚན་མ་ནས་ཤིན་ཏུ་རབ་ཏུ་རྒྱུ་བར་བྱེད་དོ། །བདག་གི་གཞང་ཡང་ཁྲོ་གཉེར་གསུམ་དུ་སུན་འབྱིན་པར་བྱེད་ལ། བཤང་བ་རྒྱུ་བར་གྱུར་པའི་སྦུབས་ཀུན་དུ་སུན་ཕྱུང་བར་ཡང་གྱུར་ཅིང་ཁུ་བས་ཀྱང་བདག་ལ་གཞང་འབྲུམ་སྐྱེད་པར་གྱུར་ནས་དེས་བདག་ཤིན་ཏུ་ཡང་ན་ཚ་བར་བྱེད་དོ། །དེས་ཡང་ན་ཁྲག་གིས་ཤིན་ཏུ་ཡང་འཁྲུ་བར་བྱེད་དོ། །དེས་ཁྲག་ཀུན་དུ་སུན་འདོན་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤ་ཀུན་ནས་སུན་འདོན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་བདག་ལ་འཁྲུགས་པ་དང་མ་འཁྲུགས་པ་ན་ལས་ཅི་ཞིག་བྱེད་ཅེ་ན། གལ་ཏེ་ཤ་ཀུན་ནས་སུན་འདོན་པར་བྱེད་པའི་རླུང་བདག་ལ་རབ་ཏུ་འཁྲུགས་པར་གྱུར་ན་དེ་ཡིས་བདག་རྩུབ་པ་དང་། སྣུམ་བག་ཅན་མ་ཡིན་པ་དང་། མདོག་ངན་པ་དང་། ཧྲུད་ཧྲུད་པོ་དང་། ནད་ཆེན་པོར་གྱུར་པ་དང་། དྲི་མི་ཞིམ་པ་དང་། ལུས་སུ་གྱུར་པ་རྣམས་ཐམས་ཅད་ལ་ཡང་ཀབ་ཀོབ་ཏུ་གྱུར་པའི་ཐིག་ལེ་རྣམས་སྐྱེད་དོ། །ཀུན་དུ་སྐྱེས་པར་གྱུར་པ་རྣམས་ཀྱང་དྲི་མི་ཞིམ་པར་འགྱུར་རོ། །བདག་ཤིན་ཏུ་ཡང་ཆུ་ངན་མང་བར་འགྱུར་བ་དང་། གྲང་བ་རྣམས་བཟོད་པ་དང་། དྲོ་བ་རྣམས་དང་ཆུ་དྲོན་གྱི་གཏམ་ཙམ་ཡང་བཟོད་པར་མི་འགྱུར་བ་དང་། རོ་ཚ་བར་གྱུར་པ་རྣམས་མི་བཟོད་པ་དང་། བསིལ་བ་དང་། མངར་བ་དང་། ཡང་བ་རྣམས་བཟོད་པར་འགྱུར་རོ། །བདག་གི་ལུས་ཐམས་ཅད་ཀྱི་ཤ་ཡང་འདྲུལ་བ་དང་། དྲི་མི་ཞིམ་པ་དང་། རྣག་འཛག་པར་ཡང་འགྱུར་རོ། །དེས་ཤ་སུན་འདོན་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བར་ལུས་རྣམས་སོ་སོར་རིག་པར་བྱེད་དོ།