།བདག་གི་ལུས་རྐྱོང་བར་ཡང་མི་ནུས་ལ་བསྐུམས་པར་གྱུར་པ་ན་ཡང་བདག་གིས་རྐྱོང་བར་བྱེད་མི་ནུས་སོ། །དོང་རྣམས་དང་གཡང་སར་གྱུར་པ་དང་རྩུབ་པའི་མདོག་རྣམས་རྨི་ལམ་དུ་ཡང་བདག་གིས་མཐོང་བར་འགྱུར་རོ། །བཟའ་བར་བྱ་བ་རྣམས་དང་བཅའ་བར་བྱ་བ་རྣམས་དྲོན་མོར་གྱུར་པ་མིད་པ་ཡང་ཐམས་ཅད་གྲང་མོར་ཡང་བདག་གིས་རྟོགས་སོ། །བདག་གི་ལྕེ་ཡང་རྡོལ་བར་འགྱུར་ཞིང་། བདག་གི་ཟས་རྣམས་མིད་པར་ཡང་མི་ནུས་སོ། །གལ་ཏེ་ཡང་པགས་པ་ཀུན་ནས་སུན་འབྱིན་པར་བྱེད་པའི་རླུང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པར་གྱུར་པའི་ནད་དེ་དག་རྣམས་འབྱུང་བར་མི་འགྱུར་རོ། །དེས་པགས་པ་ཀུན་དུ་འཇོམས་བྱེད་ཀྱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་གྱུར་པ་ན། གཞན་དག་གི་རླུང་གང་དག་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཁྲག་ཀུན་ནས་སུན་འདོན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏེ་འཁྲུགས་པར་གྱུར་ན་དེས་བདག་གི་མཆིན་པའི་གནས་ཀྱི་ནང་གི་གསེབ་ན་རྒྱུ་བར་གྱུར་པའི་ཁྲག་རྣམས་གཉིས་སུ་རྣམ་པར་འབྱེད་པར་བྱེད་དེ། མ་འགྲུངས་པ་སྟེང་དུ་འགྲོ་བ་དང་འོག་ཏུ་འགྲོའོ། །དེ་ལ་སྟེང་དུ་འགྲོ་བ་རྣམས་ནི་སྣ་བུག་དང་། མིག་དང་། རྣ་བ་རྣམས་སུ་རྒྱུ་བར་བྱེད་ཅིང་ཁྲག་རྒྱུ་བའི་རྒྱུན་རྣམས་ཀུན་དུ་སུན་འདོན་ནོ། །དེ་སུན་བཏོན་པར་གྱུར་པས་ཀྱང་ནང་གི་ཁམས་རྣམས་ཐམས་ཅད་འཁྲུགས་པར་བྱེད་དོ། །དེ་ཡིས་བདག་གི་ཡན་ལག་དང་ཉིང་ལག་རྣམས་ཐམས་ཅད་ཀྱང་རྩོལ་བ་མེད་པར་འགྱུར་རོ། །རྣ་བ་ལས་སུ་མི་རུང་བ་དང་འགྲོ་བ་དང་འོང་བ་ཡང་བདག་གིས་མི་ནུས་པར་འགྱུར་རོ། །རྟག་ཏུ་ཡང་བདག་གི་སྣ་བུག་གཉིས་དྲི་མི་ཞིམ་པར་འགྱུར་རོ། །ཚངས་པར་སྤྱོད་པར་འགྱུར་བ་བདག་ཉིན་མོ་སྤྱོད་པའི་སར་འགྲོ་བ་ན་མངོན་པར་སྤྲོ་བར་མི་འགྱུར་བ་དང་ཀུན་དུ་འདྲེ་བར་ཡང་མི་བྱེད་དོ།