།དེ་ལྟར་ཡན་ལག་དང་ཉིང་ལག་རྣམས་ཐམས་ཅད་ལ་རྒྱུ་བ་དང་རྩ་རྣམས་ཐམས་ཅད་ལ་རྒྱུ་བ་དང་དབང་པོ་རྣམས་ཐམས་ཅད་རྨོངས་ཤིང་ཞེན་པར་བྱེད་པའི་རླུང་མྱུར་བ་ནི་བདག་གིས་གཅིག་ཀྱང་མ་མཐོང་ངོ་། །འབྱེད་པ་དང་འཛུམས་པར་བྱེད་པའི་རླུང་གལ་ཏེ་འཁྲུགས་པར་མ་གྱུར་ན་ནི། ཇི་སྐད་དུ་བཤད་པའི་ནད་དེ་དག་རྣམས་རབ་ཏུ་འབྱུང་བར་མི་འགྱུར་རོ། །འབྱེད་པ་དང་འཛུམས་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རྟོགས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ་བདག་གི་རླུང་གཞན་གང་དག་གིས་འཁྲུགས་པར་གྱུར་པའམ་འཁྲུགས་པར་མ་གྱུར་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཕན་ཚུན་ཀུན་དུ་དཀྲུག་པར་བྱེད་པའི་རླུང་ལྔ་བདག་ལ་འཆི་བའི་དུས་ན་འབྱུང་བར་འགྱུར་ཏེ། དེ་འཁྲུགས་པར་གྱུར་པའམ་འཁྲུགས་པར་མ་གྱུར་པ་ན། བདག་འཆི་བར་གྱུར་པའི་དུས་ན་ལས་ཅི་ཞིག་བྱེད་པར་འགྱུར་བ་ཡིན་ན། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་རྣམས་ཀུན་དུ་འགག་པར་བྱེད་དོ། །རང་རང་གི་ཡུལ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་རྣམས་ཀྱང་སྟེ་གལ་ཏེ་འཁྲུགས་པར་མ་གྱུར་ན་ནི་དེས་བདག་མྱུར་བར་འཆི་བར་བྱེད་པར་མི་འགྱུར་རོ། །དེས་ཕན་ཚུན་འཁྲུགས་པར་བྱེད་པར་ལྔའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མངལ་ཀུན་དུ་ཆགས་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་བདག་དང་པོ་མངལ་དུ་སྐྱེ་བར་གྱུར་པ་ན། གལ་ཏེ་ཐ་མལ་པའི་ལས་ཀྱི་རྐྱེན་གྱིས་བདག་ནུར་ནུར་པོའི་ནང་དུ་དེས་སྲོག་དང་འབྲལ་བར་བྱེད་དོ། །ནུར་ནུར་པོ་ལ་གནས་པར་གྱུར་པ་ན། གལ་ཏེ་ཡང་སྲོག་དང་བྲལ་བར་མ་གྱུར་ན་མེར་མེར་པོ་ལ་གནས་པ་ན་འབྲལ་བར་མི་བྱེད་དོ། །ནར་ནར་པོ་ལ་གནས་པར་གྱུར་ན་ཡང་འབྲལ་བར་མི་བྱེད་དོ།