བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཁྲུགས་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏེ་འཁྲུགས་པར་གྱུར་ན། བདག་གིས་རྨི་ལམ་ན་རྨི་ལམ་གྱི་བྱ་བ་རྣམས་བྱེད་པར་མཐོང་ངོ་། །བདག་ཉལ་བར་གྱུར་པ་ཡང་རྣམ་པར་འཁྲུལ་བར་བྱེད་དོ། །བདག་གི་དྲོད་རྣམས་ཐམས་ཅད་ཤིན་ཏུ་གྲང་བའི་སྟོབས་དང་ལྡན་པར་འགྱུར་རོ། །གྲོང་ཁྱེར་དང་ཁང་པ་རྣམས་ཀྱང་བདག་གིས་ཤིན་ཏུ་སྟོང་པར་མཐོང་ངོ་། །བདག་གི་མདོག་སྐྱ་བོར་འགྱུར་རོ། །བདག་གི་ལུས་ངག་གི་བྱེད་པ་རྣམས་ཉུང་བར་འགྱུར་རོ། །མལ་སྟན་ལ་བདག་གི་བདེ་བ་རྙེད་པར་མི་འགྱུར་རོ། །གང་ཡང་བདག་གིས་ཆོས་རྣམས་མངོན་སུམ་དུ་བྱས་པ་དེ་དག་རྣམས་ཀྱང་བདག་ཤིན་ཏུ་མངོན་པར་འདོད་པར་མི་འགྱུར་རོ། །བདག་གི་འབྱུང་བ་ཆེན་པོ་རྣམས་ཐམས་ཅད་ཀྱང་ཀུན་དུ་འཁྲུགས་པར་བྱེད་དོ། །ཟོས་པར་གྱུར་པའི་བདག་གི་འབྱུང་བ་ཆེན་པོ་རྣམས་ཐམས་ཅད་དང་། བརྗོད་པ་རྣམས་ཀྱང་བདག་གི་སྙིང་གི་ཕྱོགས་ན་ཀུན་དུ་གནས་པར་འགྱུར་བ་དང་། བདག་གློ་བུར་དུ་ཚོར་བ་མེད་པར་ཡང་འགྱུར་རོ། །བདག་གིས་ཐལ་བའི་ཕུང་པོ་ཡང་གློ་བུར་དུ་མཐོང་བར་འགྱུར་རོ། །གལ་ཏེ་ཡང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་འབྱུང་བར་མི་འགྱུར་རོ། །དེས་ཀུན་དུ་འཁྲུགས་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མིག་འབྱེད་པ་དང་འཛུམས་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏེ་འཁྲུགས་པར་གྱུར་ན་དེས་བདག་གི་མིག་འབྱེད་པ་དང་འཛུམས་པར་ཡང་མི་བྱེད་དོ། །དེ་ལྟར་ཡན་ལག་དང་ཉིང་ལག་རྣམས་ཐམས་ཅད་ལ་རྒྱུ་བ་དང་རྩ་རྣམས་ཐམས་ཅད་ལ་རྒྱུ་བ་དང་དབང་པོ་རྣམས་ཐམས་ཅད་རྨོངས་ཤིང་ཞེན་པར་བྱེད་པའི་རླུང་མྱུར་བ་ནི་བདག་གིས་གཅིག་ཀྱང་མ་མཐོང་ངོ་།