།རླུང་གིས་འཕར་བར་ཡང་བྱེད་དོ། །ཡན་ལག་དང་ཉིང་ལག་རྣམས་ཐམས་ཅད་ལ་ཡང་འཕར་བར་བྱེད་དོ། །ནང་དུ་རྒྱུ་བར་ཡང་འགྱུར་རོ། །ཡུལ་དང་ཡུལ་རྣམས་སུ་སྡོམ་པར་ཡང་བྱེད་དོ། །འོན་ཀྱང་ནད་ནི་མི་སྐྱེད་དོ། །གལ་ཏེ་ལུས་ཐམས་ཅད་ལ་རྒྱུ་བའི་རླུང་དེ་འཁྲུགས་པར་མ་གྱུར་ན་ཇི་སྐད་དུ་བཤད་པའི་ནད་དེ་དག་རྣམས་འབྱུང་བར་མི་འགྱུར་རོ། །དེས་ཡན་ལག་ཐམས་ཅད་འཕར་བའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རྟོགས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལུས་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྲེག་པར་བྱེད་པའི་རླུང་བདག་གི་ལུས་ལ་གནས་པ་ཡིན་ཏེ། དེས་བདག་ལ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡང་། དེས་མཐོང་བར་གྱུར་པ་སྲེག་བྱེད་ཀྱི་རླུང་འཁྲུགས་པར་གྱུར་ན་ནི་དེས་བདག་གིས་མིད་པར་གྱུར་པའི་ཟས་རྣམས་མགུལ་པའི་སྦུ་གུ་ལ་རབ་ཏུ་བརྟེན་པར་བྱས་ནས་མྱུར་དུ་སྲེག་པར་བྱེད་དོ། །ཟས་ལ་གནས་པར་གྱུར་པས་བདག་གི་འབྱུང་བ་ཆེན་པོ་རྣམས་རྒྱས་པར་མི་འགྱུར་རོ། །བཟའ་བར་བྱ་བ་དང་བཅའ་བར་བྱ་བ་ཟོས་པར་གྱུར་པ་རྣམས་ཀྱང་རྣམ་པ་གཉིས་སུ་འགྱུར་བ་ཡིན་ཏེ། རབ་ཏུ་དང་བར་གྱུར་པ་དང་། རྙོག་པར་གྱུར་པའོ། །དེ་ལ་རབ་ཏུ་དང་བར་གྱུར་པ་རྣམས་ཀྱིས་ནི་འབྱུང་བ་ཆེན་པོ་རྣམས་རྒྱས་པར་བྱེད་དོ། །རྙོག་པར་གྱུར་པས་ནི་ནད་རྣམས་རབ་ཏུ་འབྱུང་བར་འགྱུར་རོ། །བདག་གི་སྲེག་བྱེད་ཀྱི་རླུང་དེ་འཁྲུགས་པར་གྱུར་ན་ཕལ་ཆེར་ཟས་ཀྱི་རིགས་རྣམས་རྙོག་པ་ཅན་དུ་བྱེད་དོ། །ཉུང་ངུ་ཉུང་ངུ་ཙམ་ཞིག་རབ་ཏུ་དང་བར་འགྱུར་རོ། །དེས་བདག་གི་ནད་རྣམས་རབ་ཏུ་འཁྲུགས་པར་བྱེད་དོ། །གལ་ཏེ་ཡང་སྲེག་བྱེད་ཀྱི་རླུང་འཁྲུགས་པར་མ་གྱུར་ན་ནི་དེས་བདག་གི་ཟས་རྣམས་རྣམ་པ་གཉིས་སུ་བྱེད་དོ། །རབ་ཏུ་དང་བར་གྱུར་པ་དང་རྙོག་པ་སྟེ། དེས་ཀྱང་ངའི་འབྱུང་བ་ཆེན་པོ་རྣམས་སྙོམས་པར་འགྱུར་རོ། །ནད་རྣམས་དཀྲུག་པར་ཡང་མི་འགྱུར་རོ། །དེས་སྲེག་བྱེད་ཀྱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་སོར་རིག་པར་བྱེད་དོ།