བརྟན་པ་འཇིག་པར་བྱེད་པ་ཞེས་བྱ་བའི་རླུང་ལུས་ལ་འཁྲུགས་པར་གྱུར་ན། དེས་བདག་འཇིགས་པ་ཆུང་ངུ་ལ་ཡང་བདག་གི་སྙིང་དངངས་པར་འགྱུར་རོ། །ཡན་ལག་དང་ཉིང་ལག་རྣམས་ཐམས་ཅད་ལ་ཡང་ལྷང་ཀྱོག་འབྱུང་ངོ་། །རེངས་པར་འགྱུར་བ་དང་། དངང་བར་ཡང་འགྱུར་རོ། །རྨོངས་པར་ཡང་འགྱུར་རོ། །བདག་གི་དབུགས་ཀྱང་སྟོབས་ཤིན་ཏུ་ཕུལ་དུ་ཕྱིན་པར་འགྱུར་རོ། །འོན་ཀྱང་དབུགས་ཀྱང་ཕྱིར་རྔུབ་པར་ཡང་མི་ནུས་པར་འགྱུར་རོ། །བདག་གིས་ཆོས་གོས་ཀྱང་མི་བཟོད་དོ། །བདག་ལ་མགོ་བོའི་ནད་རྣམས་འབྱུང་བར་འགྱུར་རོ། །བསམ་གཏན་ལ་གནས་པར་གྱུར་པ་ན་ཡང་སེམས་ཀྱི་དམིགས་པ་གཅིག་ཏུ་མི་འགྱུར་རོ། བདག་གིས་རྨི་ལམ་དུ་ཡང་རྣམ་པར་འགྱུར་བ་རྣམས་མཐོང་བར་འགྱུར་རོ། །བདག་ལ་སྐྱུག་པ་ཡང་འབྱུང་བར་འགྱུར་རོ། །བདག་གིས་ཞི་བར་འགྱུར་བའི་གཟུགས་རྣམས་ཀྱང་དྲག་པོར་གྱུར་པར་མཐོང་ངོ་། །ཐག་ཉེ་བར་གྱུར་པའི་གཟུགས་རྣམས་ཀྱང་བདག་གིས་རྒྱང་རིང་བར་མཐོང་བར་འགྱུར་རོ། །བདག་གི་སྲེད་པ་ཡང་རབ་ཏུ་ཆེ་བར་འགྱུར་རོ། །གལ་ཏེ་ཡང་བརྟན་པ་འཇིག་པར་བྱེད་པའི་རླུང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་འབྱུང་བར་མི་འགྱུར་རོ། །དེས་བརྟན་པ་འཇིག་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ལུས་ཐམས་ཅད་ལ་འཕར་བ་ཞེས་བྱ་བའི་རླུང་ལུས་ལ་གནས་པ་ཡིན་ཏེ། དེས་བདག་ལ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་བདག་གི་ལུས་ཐམས་ཅད་ལ་འཕར་བ་ཞེས་བྱ་བའི་རླུང་ལུས་ལ་འཁྲུགས་པར་གྱུར་ན་དེས་བདག་འཕར་བར་བྱེད་དོ། །རྣ་བ་འུར་འུར་བྱེད་ཅིང་རྣམ་པར་འཕར་བར་བྱེད་དོ། །རླུང་གིས་འཕར་བར་ཡང་བྱེད་དོ།