དེ་གང་དང་གང་དུ་བདག་ལ་རྒྱས་པར་འགྱུར་བ་དེ་དང་དེ་དག་གིས་བདག་གི་འདུ་བྱེད་རྣམས་རྙིངས་པར་འགྱུར་ཞིང་རྒན་གོག་ཏུ་འགྱུར་རོ། །འགྲོ་བ་དང་འོང་བའི་གནས་རྣམས་ལ་ཡང་སྟོབས་དང་ལྡན་པར་མི་འགྱུར་རོ། །བདག་ཡུད་ཙམ་ཅིག་ཉེ་བར་བསྡད་པས་ཀྱང་ནད་པར་འགྱུར་རོ། །བདག་མལ་སྟན་གྱི་གནས་སུ་ཕྱིན་ན་ཡང་ནད་པར་འགྱུར་རོ། །ཡན་ལག་དང་ཉིང་ལག་རྣམས་ལ་ཡང་བདག་དབང་སྒྱུར་ནུས་པ་ཡང་མི་འགྱུར་རོ། །བདག་ཉིད་མང་བར་ཡང་འགྱུར་རོ། །གལ་ཏེ་ཡང་བདག་གི་རྒན་གོག་ཏུ་བྱེད་པའི་རླུང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པར་གྱུར་པའི་ནད་དེ་དག་རྣམས་རབ་ཏུ་འབྱུང་བར་མི་འགྱུར་རོ། །དེས་རྒས་འཁོགས་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་ལུས་ལ་གནས་པའི་རླུང་གང་དག་གིས་འཁྲུགས་པ་དང་མ་འཁྲུགས་པའི་ལས་ཅི་དག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ལྒང་པག་རེངས་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པར་གྱུར་པ་ཡིན་པ་ཡང་། དེས་མཐོང་བ་ནི་ལྒང་པག་རེངས་པ་ཞེས་བྱ་བའི་རླུང་དེ་གལ་ཏེ་འཁྲུགས་པར་གྱུར་ན། བདག་གི་ཡན་ལག་དང་ཉིང་ལག་རྣམས་ཐམས་ཅད་ལ་ཡང་འཕྲོ་བར་བྱེད་དོ། །དབུགས་རྔུབ་པར་བྱེད་པ་དང་། སྙིང་གི་ནད་དང་། ལྒང་པག་ཏུ་གྱུར་པ་ཡང་གཡེང་བར་བྱེད་པ་དང་། བདག་གི་རྟུག་པ་དང་གཅིན་རྣམས་ཐམས་ཅད་ཀྱང་རེངས་པར་བྱེད་པའམ། རེངས་པར་མི་བྱེད་པ་ཡང་རུང་སྟེ། བདག་གི་རྟུག་པ་བདེ་བར་མི་ཐོན་ནོ། །ཅོ་འདྲི་བར་བྱེད་པ་དང་ཟུག་གཟེར་དུ་བྱེད་དོ། །སེམས་ཀྱི་རྒྱུན་རྣམ་པར་གཡེང་བར་བྱེད་པར་འགྱུར་རོ། །བདག་གི་རྣམ་པར་ཤེས་པ་སྟོབས་དང་ལྡན་པར་ཡང་མི་འགྱུར་རོ། །ཆོས་ཀྱི་དབང་དུ་བྱས་ནས་སེམས་རབ་ཏུ་དང་བར་འགྱུར་བ་དང་། ལས་ལ་མངོན་པར་འདོད་པ་ཡང་མ་ཡིན་ཏེ། ལུས་སྡུག་བསྔལ་བར་གྱུར་ན་ཆོས་ལ་མངོན་པར་འདོད་པར་མི་འགྱུར་རོ།