།ལུས་ཀྱི་རྗེས་སུ་འགྲོ་བའི་འདུ་བྱེད་རྣམས་ཐམས་ཅད་རིག་པར་གྱུར་ནས། རྣལ་འབྱོར་སྤྱོད་པ་དེས་འཕེལ་བ་དང་འགྲིབ་པའི་ཆོས་རྣམས་ཤེས་པར་འགྱུར་རོ། །དེས་སྤུ་དང་། སེན་མོ་དང་། རྟུག་པ་རྣམས་འབྱེད་པར་བྱེད་པའི་རླུང་རིག་པར་གྱུར་ནས་ཡང་དག་པ་ཇི་ལྟ་བ་བཞིན་དུ་ལུས་རིག་པར་གྱུར་ནས། གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལུས་ལས་གྱུར་པའི་ལས་ཅི་དག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཁུ་ཆུ་རྣམ་པར་རླུག་བྱེད་ཅེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེས་བདག་ལ་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལ། ཆུའི་ཆུ་བུར་འདྲ་བར་ཁུ་ཆུ་རྣམ་པར་རླུག་བྱེད་ཅེས་བྱ་བའི་བདག་གི་རླུང་ཡོད་དོ། །དེས་བདག་གི་གཅིན་གྱི་ལམ་ནས་རྣམ་པར་རྟོག་པ་མ་བྱས་པར་གྱུར་དུ་ཟིན་ཀྱང་གཅིན་དང་ལྷན་ཅིག་ཏུ་ཁུ་བ་རབ་ཏུ་འབྱུང་བར་འགྱུར་རོ། །འདི་ལྟ་སྟེ། ཡུངས་ཀར་གྱི་ཚད་ཙམ་དང་། ནས་ཙམ་དུ་འཐས་པར་བྱས་ནས་བདག་གི་ལུས་ལ་འབབ་པའོ། །བཤང་བའི་གནས་ཀྱང་དེས་ཟུག་གཟེར་དུ་བྱེད་པར་འགྱུར་རོ། །དེ་ནི་ནད་དང་མཐོ་འཚམ་པའི་རིགས་ཅན་ཡིན་ཏེ། བདག་གི་སེམས་ཀྱི་རྒྱུན་གཅིག་ཏུ་གནས་པར་ཡང་མི་འགྱུར་རོ། །དེས་ཁུ་བ་རྣམ་པར་རླུག་བྱེད་ཀྱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་ལུས་ལ་གནས་པར་གྱུར་པའི་རླུང་གཞན་གང་དག་གིས་འཁྲུགས་པར་གྱུར་པ་དང་། མི་འཁྲུག་པ་ན་ལས་ཅི་དག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་རྒན་གོག་ཏུ་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གང་དང་གང་དུ་བདག་ལ་རྒྱས་པར་འགྱུར་བ་དེ་དང་དེ་དག་གིས་བདག་གི་འདུ་བྱེད་རྣམས་རྙིངས་པར་འགྱུར་ཞིང་རྒན་གོག་ཏུ་འགྱུར་རོ།