དེ་ནས་ལེགས་པར་བསམས་ཤིང་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་ཀྱང་ཀུན་དུ་ལྟ་བར་བྱེད་པ་ལ་ཇི་ལྟར་འཛམ་བུའི་གླིང་པ་རྣམས་ཀྱི་མིག་དང་གཟུགས་དང་སྣང་བ་དང་ནམ་མཁའ་དང་ཡིད་ལ་བྱེད་པའི་རྐྱེན་དེ་དག་རྣམས་ལས་གཟུགས་རྣམས་ལེགས་པར་མཐོང་བ་ཡིན་ནོ། །དེ་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཀྱི་སྐྱེས་བུ་སོང་ཞིང་ནམ་མཁའ་ལ་གནས་ནས་གཟུགས་རྣམས་མཐོང་བ་ཡིན་ཏེ། དཔེར་ན་ཆུ་ན་ཆུ་ལ་སྤྱོད་པའི་ཉ་ལ་སོགས་པ་རྣམས་ཀྱི་གཟུགས་མཐོང་བ་དེ་བཞིན་དུ་བྱང་ཕྱོགས་སྒྲ་མི་སྙན་པའི་སྐྱེས་བུ་རིས་བསྒྲིབས་པར་གྱུར་པའི་གཟུགས་རྣམས་ཀྱང་མཐོང་ངོ་། །གཞན་ཡང་རྣལ་འབྱོར་སྤྱོད་པ་བདག་ཉིད་འཛམ་བུའི་གླིང་པའི་ལུས་ཀྱིས་བྱང་གི་སྒྲ་མི་སྙན་པའི་ལུས་ལ་སོ་སོར་རྟོག་པར་བྱེད་དེ། ཇི་ལྟ་བུ་ཁོ་ནར་བདག་གི་རྣ་བས་མི་འདོད་པའི་སྒྲ་དང་རབ་ཏུ་གསལ་བ་རྣམས་ཐོས་ལ། བར་ཆོད་པ་རྣམས་ནི་མ་ཡིན་ཞིང་དེ་བཞིན་དུ་སྒྲ་ཆེན་པོ་རྣམས་ནི་བདག་ཅག་གིས་ཐོས་པ་ཡིན་ན། དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཡིན་ནམ་ཅི་སྟེ་མ་ཡིན་ཞེས། དེ་ཡང་དག་པ་ཇི་ལྟ་བ་བཞིན་དུ་རྣ་བས་སོ་སོར་རྟོག་པར་བྱེད་དེ། ཐག་ཉེ་བ་རྣམས་དང་། རྒྱང་རིང་བ་རྣམས་དང་། དམན་པ་རྣམས་དང་། སྙན་པ་རྣམས་དང་། མི་སྙན་པའི་སྒྲ་རྣམས་ཀྱང་ཆོས་ཉིད་ཀྱི་ཁྱད་པར་གྱིས་བྱང་ཕྱོགས་སྒྲ་མི་སྙན་པའི་སྐྱེས་བུས་ཐོས་པ་ཡིན་ཏེ། ཇི་ལྟར་ཉི་མས་ཐག་ཉེ་བ་དང་། རྒྱང་རིང་བ་དང་། ཕལ་ཆེ་བ་དང་། གཟུགས་དམན་པ་དང་། གཙང་བ་དང་། མི་གཙང་བ་རྣམས་ཀྱང་གསལ་བར་བྱེད་དོ། །དེ་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་ཀྱིས་ཀྱང་སྒྲ་ཐོས་སོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱི་སྣའི་དབང་པོ་དེ་ཁོ་ན་བཞིན་དུ་བྱང་གི་སྒྲ་མི་སྙན་པ་རྣམས་ཀྱི་ཡང་ཡིན་ནམ་ཅི་སྟེ་མ་ཡིན་ཞེས། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་སོ་སོར་རྟོག་པར་བྱེད་དེ། སྣས་དྲི་ཞིམ་པོ་རྣམས་ནི་སྣོམ་པར་བྱེད་ལ་དྲི་ཞིམ་པོ་མ་ཡིན་པ་རྣམས་སྣོམ་པར་མི་བྱེད་དེ་ཆོས་ཉིད་ཀྱི་ཁྱད་པར་གྱིས་ཇི་ལྟར་འོ་མ་དང་ཆུ་དག་འདྲེས་པར་གྱུར་པ་ལ་ངང་པས་ཆུ་མི་འཐུང་བར་འོ་མ་འཐུང་བར་བྱེད་པ་ཡིན་ནོ། །དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་ཀྱིས་དྲི་ཞིམ་པོ་སྣོམ་པར་བྱེད་ཅིང་དྲི་མི་ཞིམ་པ་རྣམས་ནི་མི་སྣོམ་མོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་རོ་མྱོང་བར་བྱེད་པ་དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཀྱི་ཡིན་ནམ་ཅི་སྟེ་ན་མ་ཡིན་ཞེས།