།གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ངའི་ལུས་འདི་ནི་སྐད་ཅིག་དང་སྐད་ཅིག་ལ་སྐྱེ་བ་དང་། རྒས་པ་དང་། འཆི་བ་དང་། ཤི་འཕོ་བ་དང་། སྐྱེ་བར་ཡང་འགྱུར་བས། འདི་ནི་སྒྱུ་མ་ལྟ་བུ་དང་གསོག་གསོབ་སྙིང་པོ་མེད་པ་དབུ་བ་དང་ཆུ་བུར་རྡོས་པ་ལྟ་བུར་གྱུར་པ་སྡུག་བསྔལ་དང་། སྡུག་བསྔལ་རྣམས་སྐྱབས་གནས་སུ་གྱུར་པ་དང་། སྡུག་བསྔལ་གྱི་སྐྱེ་གནས་ཀྱི་ལུས་ཡིན་ནོ། །སྡུག་བསྔལ་མ་ཡིན་པར་འགྱུར་བའམ། མི་རྟག་པ་མ་ཡིན་པ་དང་། ཡོངས་སུ་འགྱུར་བའི་ཆོས་ཉིད་མ་ཡིན་པ་དང་། འཇིག་པའི་ཆོས་ཉིད་མ་ཡིན་པ་གང་ཡིན་པའི་གནས་སྐབས་ནི་ལུས་འདི་ལས་ཅུང་ཟད་ཅིག་ཀྱང་ཡོད་པ་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། སྐྱབས་ནི་གང་ཡིན་སྐྱོབ་པ་ནི་གང་ཡིན། འདི་ན་ནི་ཇི་ལྟར་ཞེས་དེས་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རྟོག་པར་བྱེད་དོ། །དེ་དག་ནི་འདི་ལྟར་ཡིན་ཏེ། ལུས་འདི་ནི་ལས་ཀྱི་རྩ་བ་ལས་ཡིན་ཞིང་ལས་ཀྱི་སྐྱབས་གནས་པ་ལས་ཀྱི་སྐྱོབ་པ་ཡིན་པས། དགེ་བའི་ལས་རྣམས་དང་ལྡན་ན་ལྷ་དང་མི་རྣམས་སུའོ། །མི་དགེ་བའི་ལས་རྣམས་དང་ལྡན་ན་དམྱལ་བ་ཡི་དགས་དུད་འགྲོ་རྣམས་སུའོ། །ལུས་འདི་ལ་ནི་རྫས་སམ་གཙང་བའམ་སྙིང་པོའམ་རྟག་པའམ། བརྟན་པར་གྱུར་པ་ནི་མེད་དོ་ཞེས་དེས་འདི་ཡང་དག་པར་སོ་སོར་རྟོག་པར་བྱེད་པ་གང་ཡིན་པ་ལས་དགའ་བའི་འདོད་ཆགས་དང་ལྷན་ཅིག་གནས་པའི་སྲེད་པ་ཡང་འབྱུང་བ་ཅན་གྱི་སྲེད་པ་རྣམས་ཡོངས་སུ་སྤོང་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་མིག་དེ་ཉིད་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དེ། ཇི་ལྟར་འཛམ་བུའི་གླིང་པ་རྣམས་ཀྱི་མིའི་མིག་གིས་གཟུགས་རྣམས་སྣང་བ་དང་། ནམ་མཁའ་དག་ལས་རྗེས་སུ་འཐུན་པ་མཐོང་བར་འགྱུར་བ་དེ་ཁོ་ན་བཞིན་དུ་གནས་གཞན་ན་གནས་པའི་མིའི་མིག་གིས་གཟུགས་རྣམས་མཐོང་བ་ཡིན་ནམ་ཞེས་བྱ་བར་ཏེ། དེ་ནས་ལེགས་པར་བསམས་ཤིང་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་ཀྱང་ཀུན་དུ་ལྟ་བར་བྱེད་པ་ལ་ཇི་ལྟར་འཛམ་བུའི་གླིང་པ་རྣམས་ཀྱི་མིག་དང་གཟུགས་དང་སྣང་བ་དང་ནམ་མཁའ་དང་ཡིད་ལ་བྱེད་པའི་རྐྱེན་དེ་དག་རྣམས་ལས་གཟུགས་རྣམས་ལེགས་པར་མཐོང་བ་ཡིན་ནོ།