འདོད་པའི་ཡོན་ཏན་ལྔ་དང་ཡང་དག་པར་ལྡན་པ་ཇི་ལྟར་གང་ཁོ་ནར་ལྷ་དེ་སྐྱེས་པར་གྱུར་པ་རྣམས་ལས། རེ་ཞིག་དང་པོ་ཁོ་ནར་ཐམས་ཅད་ནས་རིན་པོ་ཆེའི་འོད་ཟེར་གྱིས་ཐམས་ཅད་རྣམ་པར་བཀྲ་བར་གྱུར་པ་དེའི་མཐོ་རིས་ཀྱི་ཡུལ་དེ་དག་ཡིན་ནོ། །དེ་ལ་ལྷ་དེའི་ལེགས་པར་བྱས་པའི་ལས་ཀྱིས་གསར་དུ་རིན་པོ་ཆེ་འདི་དག་རྣམས་རབ་ཏུ་འབྱུང་བ་ཡིན་ནོ། །འདི་ལྟ་སྟེ། ཉེ་འཁོར་རྣམས་ན་རྡོ་རྗེ་རྣམ་པ་དུ་མ་དང་། རིའི་རྩེ་མོ་ལ་རྣམ་པ་སྣ་ཚོགས་པའི་འོད་ཟེར་གྱི་ཕྲེང་བ་དང་ལྡན་པ་རྣམས་ལ། ཇི་ལྟར་བཻ་ཌཱུརྱ་དང་སྔོན་པོ་དང་སྔོན་པོ་ཆེན་པོ་དང་ཤེལ་དང་མུ་སཱ་ར་གལྦ་དང་པད་མ་རཱ་ག་དང་མ་ར་ག་ཏ་མཆུ་ལྟུང་བ་རྣམས་དང་། དེ་བཞིན་དུ་གཞན་དག་ཀྱང་ལྷ་རྫས་ཀྱི་ལས་ཀྱི་ཁྱད་པར་རྣམས་ཀྱིས་ཁྱད་པར་དུ་སྐྱེས་པར་གྱུར་པའི་རིན་པོ་ཆེའི་རྣམ་པ་བརྒྱ་སྟོང་ཕྲག་རྣམས་ཀྱི་འོད་ཀྱིས་གནས་དེར་ཤིན་ཏུ་ཡང་ཁྱབ་པར་གྱུར་ཏོ། །དེ་རེ་ཞིག་དང་པོ་ཉིད་ཁོ་ནར་ཁ་དོག་སྣ་ཚོགས་པའི་འོད་རྣམ་པར་རྒྱས་པ་རྣམས་ཡང་དག་པར་མངོན་པར་མཐོང་ནས་མིག་གི་རྣམ་པར་ཤེས་པ་ཀུན་ཏུ་འཇུག་པར་བྱེད་དོ། །གང་དག་དེས་སྔོན་ནམ་ཡང་མ་མཐོང་བ་དེ་ལ་དེའི་མིག་གི་རྣམ་པར་ཤེས་པ་ཤིན་ཏུ་འཕེན་པར་བྱེད་དོ། །དེའི་རྗེས་ཐོགས་ལ་རྣམ་པ་སྣ་ཚོགས་པར་གྱུར་པ་མཚུངས་པ་མེད་པའི་ལྷ་རྫས་རྣམས་ཀྱི་གླུ་དང་རྔ་དང་རོལ་མོའི་སྒྲ་རྣམས་ཀྱི་སྒྲ་ཉན་པར་བྱེད་དོ། །དེའི་རྗེས་ཐོགས་ལ་འདི་ལྷ་རྫས་ཀྱི་དྲི་རྣམ་པ་སྣ་ཚོགས་པ་དཔེ་མེད་པའི་རྣམ་པ་རྣམས་ལ་སྣ་ཀུན་ཏུ་འཇུག་པར་ཡང་བྱེད་དོ། །དང་པོར་སྐྱེས་པ་དེ་གསུམ་གྱིས་ཐོག་མ་ཁོ་ནར་ཀུན་ཏུ་གཡེང་བར་ཤེས་པར་བྱ་སྟེ། སྔ་ན་མ་མཐོང་བ་དང་མཚུངས་པ་མེད་པ་རྣམས་ཀྱིས་བག་མེད་པའི་ས་ལ་ཀུན་ནས་འཇུག་པར་བྱེད་དོ། །དེ་དག་རྣམས་མངོན་པར་མཐོང་ནས་གང་དག་ལྷ་ཉིད་དུ་གྱུར་པ་དེ་དག་ནི་སྐལ་བ་དང་ལྡན་པ་ཡིན་པས་ལེགས་པར་བྱས་པའི་ལས་ཀྱིས་རྩེ་མོར་གྱུར་པ་དེ་དག་ནི་ནགས་ཀྱི་ནང་གི་གསེབ་དག་ནས་ཀུན་ཏུ་འོང་བར་བྱེད་དོ། །ནགས་དེ་ཡང་འོད་སྣང་བ་ཞེས་བྱ་བ་སྟེ་ཉེ་འཁོར་ཀུན་ན་འོད་ཟེར་རྣམ་པ་སྣ་ཚོགས་པ་མཚུངས་པ་མེད་པ་རྣམས་རབ་ཏུ་སྣང་བར་བྱེད་དོ། །ནགས་དེ་ལ་ལྷ་དེ་དག་གིས་ཀུན་ནས་བགྲོད་ནས་གང་ན་ལྷ་གསར་དུ་སྐྱེས་པ་ཡོད་པ་དེར་ཉེ་བར་རྒྱུགས་པར་བྱེད་པ་རྣམས་ནི། ཆ་བྱད་སྣ་ཚོགས་པ་འཆང་བ་གཟུགས་སྣ་ཚོགས་པ་དང་ལྡན་པ་རྣམ་པ་སྣ་ཚོགས་པའི་གླུ་དང་རྔ་སྒྲ་དང་རོལ་མོའི་སྒྲ་སྙན་པ་རྣམས་དང་གླུ་ཀུན་ཏུ་སྒྲོགས་པར་བྱེད་པ་དང་གླུ་དབྱངས་སྙན་པ་དཔེ་མེད་པ་དགའ་བར་གྱུར་པ་རྣམས་ཉེ་བར་བྱུང་ནས་སྐད་རྣམས་ཀུན་ཏུ་འདོན་ནོ།