ཆ་བྱད་སྣ་ཚོགས་པ་འཆང་བ་གཟུགས་སྣ་ཚོགས་པ་དང་ལྡན་པ་རྣམ་པ་སྣ་ཚོགས་པའི་གླུ་དང་རྔ་སྒྲ་དང་རོལ་མོའི་སྒྲ་སྙན་པ་རྣམས་དང་གླུ་ཀུན་ཏུ་སྒྲོགས་པར་བྱེད་པ་དང་གླུ་དབྱངས་སྙན་པ་དཔེ་མེད་པ་དགའ་བར་གྱུར་པ་རྣམས་ཉེ་བར་བྱུང་ནས་སྐད་རྣམས་ཀུན་ཏུ་འདོན་ནོ། །དེ་ནས་ལྷ་དེ་ཡང་དེ་དག་རྣམས་མངོན་པར་མཐོང་བ་དང་ཐོག་མ་མེད་པའི་དུས་ནས་གོམས་པར་གྱུར་པའི་འདོད་ཆགས་ཀྱི་བློས་ཀུན་ནས་འཕངས་པས། གང་ན་ལྷ་དེ་དག་ཡོད་པ་དེར་རབ་ཏུ་དགའ་བའི་ཡིད་ཀྱིས་འདྲེ་བར་བྱེད་དོ། །དེ་དག་རྣམས་ཀྱང་གང་ན་ལྷ་འདི་ཡོད་པ་དེར་ཉེ་བར་རྒྱུ་སྟེ། ཁ་ཅིག་ནི་ནམ་མཁའི་དཀྱིལ་དུ་ཤིན་ཏུ་འཕགས་པར་གྱུར་ནས་པི་བང་ལག་ན་ཐོགས་པས་གླུ་ལེན་པར་གྱུར་པས་སོ། །གཞན་དག་ཁ་ཅིག་ནི་ཁང་བུའི་སྟེང་ན་ཆེས་རབ་ཏུ་རྒོད་པར་བྱེད་པའི་མིག་གིས་མེ་ཏོག་ཀུན་ཏུ་སྦྲེལ་བས་མཚུངས་པ་མེད་པ་རྣམས་ཀྱི་དྲི་སྣོམ་པར་བྱེད་དོ། །ལྷ་གཞན་དག་རྣམས་ཁ་ཅིག་ནི་ས་གཞི་ཉིད་ལ་ཚོགས་པ་འདུས་པ་རྣམས་ཀྱིས་སྣ་ཚོགས་པའི་རོལ་མོ་དང་ལག་ན་མེ་ཏོག་ཐོགས་པར་གྱུར་པས་གང་ན་ལྷ་འདི་ཡོད་པ་དེར་རྒྱུག་པར་བྱེད་དོ། །ལྷ་གཞན་དག་ཁ་ཅིག་ནི་ལག་ན་མེ་ཏོག་རྣམས་ཐོགས་པས་གང་ན་ལྷའི་བུ་འདི་ཡོད་པ་དེར་ཉེ་བར་རྒྱུག་པར་བྱེད་དོ། །ལྷ་གཞན་དག་ཁ་ཅིག་གིས་ནི་སྣ་ཚོགས་པའི་ཁ་དོག་དང་རོ་དང་དྲི་ཕུན་སུམ་ཚོགས་པར་གྱུར་པའི་མྱོས་བྱེད་མྱོས་པའི་སྐྱོན་དང་བྲལ་བ་དག་ཐོགས་ནས་གང་ན་ལྷ་འདི་ཡོད་པ་དེར་ཉེ་བར་རྒྱུག་པར་བྱེད་དོ། །དེ་ནས་ལྷ་གང་དག་གིས་མྱོས་བྱེད་དེ་བཟུང་ནས་རྒྱུག་པར་བྱེད་དེ་བཟུང་ནས་རྒྱུག་པར་བྱེད་པ་དེ་དག་གི་ལག་པ་དག་ལ་དེས་ཀུན་ཏུ་འཇུས་ནས་ལྷ་འདི་མྱོས་བྱེད་དེ་དག་བླངས་ནས་ལྷའི་ཁ་དོག་དང་རོ་ཕུན་སུམ་ཚོགས་པར་གྱུར་པ་རྣམས་འཐུང་བར་བྱེད་དོ། །དེ་ནས་འཐུངས་པར་གྱུར་ནས་དེ་བཅུ་འགྱུར་གྱི་བླ་ལྷག་པར་རབ་ཏུ་དགའ་བ་འཐོབ་པར་འགྱུར་རོ། །དེ་ཡུལ་བཞི་པས་ཀྱང་རྣམ་པར་གཡེངས་པ་ཡིན་ཏེ། སྔར་ནི་གཟུགས་དང་སྒྲ་དང་དྲི་རྣམས་ཀྱིས་ཡིན་ལ་ཕྱི་ནས་ནི་རོས་ཀྱང་ཀུན་ནས་གཡེངས་པར་གྱུར་ཏོ། །ལུས་ཀྱིས་ཀྱང་རྣམ་པ་སྣ་ཚོགས་པར་གྱུར་པའི་མཆོག་ཏུ་བདེ་བ་དང་ལྡན་པའི་ཡིད་ཀྱི་རྗེས་སུ་འཐུན་པར་བྱེད་པའི་རེག་བྱ་རྣམས་ལ་རེག་པར་བྱེད། ཡིད་ཀྱིས་ཀྱང་གང་ཁོ་ན་ཀུན་ཏུ་རྟོག་པར་བྱེད་པ་དེ་ཁོ་ན་འབད་པ་མེད་ཅིང་ངལ་བ་མེད་པའི་ཕུན་སུམ་ཚོགས་པར་ལྷན་ཅིག་ཉིད་དུ་འབྱུང་བར་འགྱུར་རོ།