།བར་དང་ཐ་མར་བྱེད་པའང་མིན། །ཞི་ཡིད་རྗེས་སུ་ཐོབ་པར་མིན། །ཉམས་དང་ཞི་བའི་རྒྱུ་རྣམས་ནི། །དབང་པོ་དང་ནི་དབང་དོན་ལ། །རྨོངས་ནས་རྣམ་པ་ཐ་དད་པར། །བྱིས་པའི་ཡིད་འཕྲོག་འདོད་པ་འདིས། །དམྱལ་བར་འགྲོ་བར་བྱེད་པ་ཡིན། །གང་དང་ལྷན་ཅིག་བྱིས་པ་དགའ། །དེ་ཉིད་འདི་ནི་མི་བཟད་མཆོག །དགྲ་བོ་གྲོགས་པོའི་གཟུགས་ཀྱིས་ནི། །ཁྱད་པར་གྱིས་ནི་རབ་ཏུ་རྒྱུ། །དེ་ལྟར་དུས་བཟངས་དེས་བག་མེད་པ་བག་མེད་པར་སྤྱོད་པ་རྣམས་མངོན་པར་མཐོང་ནས་ཚིགས་སུ་བཅད་པ་བརྗོད་དོ། །དེ་ནས་ལྷ་དེ་དག་འདོད་པ་དེ་དག་གིས་རྣམ་པར་རྨོངས་པའི་ཕྱིར་ཕན་པར་འགྱུར་བ་གང་ཡིན་པ་དེ་བརྗོད་པ་ན་ཀུན་ཏུ་མི་རྟོགས་སོ། །དེ་ནས་སླར་ཉིད་ཀྱང་པད་མའི་རྫིང་བུ་དེ་ཉིད་ཀྱི་འགྲམ་དུ། རཱ་ཛ་ནི་ན་རྒྱུ་བའི་ལྷ་དེ་དག་རྣམས་ནགས་དང་ཉེ་བའི་ནགས་རྣམས་དང་། པད་མའི་རྫིང་བུ་དག་དང་འཁྲི་ཤིང་འཕྱར་བར་ལེགས་པར་ཀུན་ཏུ་གཡོགས་པའི་མཆོག་ཏུ་དྲི་ཞིམ་པའི་འཁྲི་ཤིང་གི་ཁང་པ་རྣམས་ལ་བུང་བ་བརྒྱ་སྟོང་དུ་མ་སྐད་སྙན་པ་རྣམས་འདོན་པས་རྣ་བར་སྙན་པ་རྣམས་ལ། ལྷ་དེ་དག་རྣམས་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་དགའ་བར་བྱེད་ཅིང་རྩེ་བར་བྱེད་དེ། །རྔ་སྐད་ཡན་ལག་ལྔ་དང་ལྡན་པས་ཤིན་ཏུ་སྙན་པ་དང་བརྒྱུད་མར་དམའ་ཞིང་སྙན་པ་དང་། མཐོན་པོར་འཇམ་ཞིང་སྙན་པའི་སྒྲ་དང་ཡང་དག་པར་ལྡན་པར་དཔེ་མེད་པ་རྣམས་ཀྱིས་དགའ་བར་བྱེད་དོ། །གཞན་དག་ནི་ཁང་བུའི་སྟེང་ན་ཀུན་ཏུ་གནས་ཏེ་མཆོག་ཏུ་དགའ་བའི་པད་མའི་རྫིང་བུ་དེ་ཉིད་ལ་ཀུན་ཏུ་ལྟ་བར་བྱེད་དོ། །རཱ་ཛ་ནི་ན་རྒྱུ་བའི་ལྷ་དེ་དག་རང་གི་ལས་ལ་སྤྱོད་པས་རྗེས་སུ་འབྲང་བ་རྣམས་དང་བཅས་པས་ཉེ་འཁོར་ཀུན་ཏུ་ལྟ་བར་བྱེད་དོ། །དེ་ནས་ཀུན་ཏུ་ལྟ་བར་བྱེད་པ་དེ་དག་རྣམས་ལ་གཞན་ཡང་དུས་བཟངས་དེ་འདི་སྙམ་དུ་སེམས་ཏེ། ལྷ་དེ་དག་རྣམས་ཀྱི་ཡིད་ལ་ཅི་ཞིག་ཡོད་པར་གྱུར་ན། ངེས་པར་ཉམས་སུ་མྱོང་བར་འགྱུར་བའི་སྡུག་བསྔལ་འབྱུང་བར་འགྱུར་བ་རྣམས་གང་ཡིན་པ་གང་དག་གིས་གོ་བར་མི་འགྱུར་བ། ལྷ་རྣམས་འཆི་བའི་དུས་ན་འཇིགས་པ་ནི་ལྔ་ཡོད་དེ། ལྔ་པོ་རྣམས་གང་ཞེ་ན།