འདོད་པ་སྡུག་པ་འཐུན་པ་ཡིད་དུ་འོང་བའི་བུད་མེད་རྣམས་ཐམས་ཅད་དང་། ལྷའི་རིགས་ཀྱི་སྐལ་བ་འཐུན་པ་དེ་ཉིད་དུ་སླར་ཡང་ཀུན་ཏུ་མི་ཕྲད་པ་སྟེ། དེ་ལ་འདི་ནི་རྣམ་པར་འབྲལ་བས་བྱས་པའི་སྡུག་བསྔལ་ཆེན་པོ་དང་པོ་ཡིན་ནོ། །གཞན་ཡང་ལྷ་རྣམས་འཆི་འཕོ་བར་གྱུར་པའི་དུས་ན་སྡུག་བསྔལ་གཉིས་པ་འདི་ལྟ་སྟེ། འདོད་པ་སྡུག་པ་ཡིད་དུ་འོང་བའི་ལྷ་རྫས་ཀྱི་ཡུལ་རྣམས་དང་ཕྱི་ནས་ཡང་མི་ཕྲད་པ་ཞེས་བྱ་བ་འདི་ནི་ལྷ་རྣམས་འཆི་འཕོ་བའི་དུས་ན་སྡུག་བསྔལ་ཆེན་པོ་གཉིས་པ་ཡིན་ནོ། །གཞན་ཡང་ལྷ་རྣམས་ལ་སྡུག་བསྔལ་གསུམ་པ་ཡོད་དེ། ལྷ་གཞན་གང་དག་དང་རྩེ་བར་བྱེད་པ་ན་དེ་དག་གིས་འདིའི་མངོན་སུམ་དུ་གྱུར་པ་གང་གི་ཚེ། སྣུམ་ཟད་པའི་མར་མེ་འཆི་བ་བཞིན་དུ་མཐོང་བར་འགྱུར་རོ། །དེའི་ཚེ་དེ་ལ་སྡུག་བསྔལ་གང་དག་སྐྱེ་བར་འགྱུར་བ་དེ་དག་འདི་ལྟར་འབྱུང་བ་ཡིན་ཏེ། ངེས་པའི་ལས་ཀྱི་རླུང་གིས་བདག་ངེས་པར་བརླག་པར་འགྱུར་བ་ཡིན་ནོ་ཞེས་དེ་ལ་རྣམ་པར་འབྲལ་བར་བྱས་པའི་སྡུག་བསྔལ་སྐྱེ་བ་གང་ཡིན་པ་དེ་དམྱལ་བའི་སྡུག་བསྔལ་གྱིས་ཀྱང་ཆར་མི་བཟོད་དོ། །གཞན་ཡང་ལྷ་རྣམས་ཀྱི་སྡུག་བསྔལ་བཞི་པ་ཡོད་དེ། གང་གི་ཚེ་འཆི་འཕོ་བར་གྱུར་པ་དང་ཉེ་བར་གྱུར་པ་ན། འགྲོ་བ་གང་ནས་སྐྱེ་བར་འགྱུར་བ་དང་། གང་ལ་འདི་སྐྱེ་བ་འབྱུང་བར་འགྱུར་བ་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་འགྲོ་བ་དེ་དེས་ཇི་ལྟ་བ་བཞིན་དུ་མཐོང་བར་གྱུར་པ་ན། དེའི་ཚེ་འདི་འགྱོད་པར་གྱུར་པས་བྱས་པའི་མེར་འོས་པ་རྣམ་པ་དུ་མའི་སྡུག་བསྔལ་འབྱུང་བར་འགྱུར་རོ། །གཞན་ཡང་ལྷ་རྣམས་ལ་སྡུག་བསྔལ་ཆེན་པོ་ལྔ་པ་ཡོད་དེ། གང་དག་དགེ་བའི་བཤེས་གཉེན་དུ་གྱུར་པ་རྣམས་ཀྱིས་ཆོས་བསྟན་པར་གྱུར་པ་ན་དེ་ཡང་ཉན་པར་མི་བྱེད་པ་དང་། དམ་པའི་ཆོས་རྗེས་སུ་སྒྲུབ་པར་མི་བྱེད་པར་བག་མེད་པས་བག་མེད་པར་རྒྱུ་བ་ཡུལ་གྱིས་ཀུན་ནས་ཕྲོགས་པར་གྱུར་པའི་སེམས་ཀྱིས་ཏེ། འཆི་འཕོ་བར་འགྱུར་བའི་དུས་དེའི་ཚེ་དེ་ཡང་རྗེས་སུ་དྲན་ནས། ཧཱ་མི་བཟད་པའི་སྡུག་བསྔལ་ངས་ཅི་ཞིག་བྱས་ན། ཆོས་གང་ཡིན་པ་ནི་མ་མཉན་ནོ། །ཚུལ་ཁྲིམས་ལ་ཡང་རྗེས་སུ་མ་བསྒྲུབས་པས་ཤེས་རབ་ཀྱང་གོམས་པར་མ་བྱས་པ་དེའི་སེམས་དང་པོ་ཁོ་ནར་རྣམ་པར་འགྱོད་པར་འགྱུར་བའི་མེས་སྲེག་པར་བྱེད་དོ།