།ཉེ་འཁོར་ཀུན་ནས་ཡོངས་སུ་བསྐོར་བའི་ལྷ་དེ་དག་རྣམས་ལེགས་པར་མངོན་པར་མཐོང་ནས་གཞན་ལ་ཕན་པ་ལ་རབ་ཏུ་ཞུགས་པས་ཚིགས་སུ་བཅད་པ་བརྗོད་པ། ཇི་ལྟར། འགྲོ་བ་དང་ནི་གནས་ཉིད་དང་། །རྩེ་བ་དང་ནི་རྒོད་པ་ཡང་། །བཟོད་པར་མི་ནུས་ཤུགས་པོ་ཆེ། །མི་བཟད་པ་ཡི་འཆི་བདག་འབྱུང་། །གང་ལ་འདི་ཡིས་མི་སྒྲུབ་པའི། །འདི་དང་ཕྱི་མར་གནས་དེ་མེད། །དེ་ལྟ་ན་ཡང་ཀུན་རྨོངས་པས། །འགྲོ་བ་འདི་དག་གིས་མི་རྟོགས། །དབུལ་པོ་དང་ནི་དབུལ་མིན་དང་། །གཞོན་པ་དང་ནི་གནས་བརྟན་དང་། །ཁྱིམ་པ་དང་ནི་ཁྱིམ་པ་མིན། །གང་ཡང་འདི་ཡིས་མི་འཇོམས་མེད། །སྐྱིད་དེན་པ་དང་སྡུག་ཕོངས་དང་། །ཡོན་ཏན་ཅན་དང་དེ་ལས་གཞན། །སྤོང་ལ་གནས་དང་སྤོང་གནས་མིན། །གང་ཡང་འདི་ཡིས་མི་འཁྲིད་མེད། །ཚུལ་ཁྲིམས་འཆལ་དང་ཚུལ་ཁྲིམས་ལྡན། །ཤེས་རབ་ཅན་དང་རྨོངས་པ་དང་། །རྒྱལ་པོ་དང་ནི་དེ་ལས་གཞན། །གང་དག་འདིས་ནི་མི་འཁྲིད་མེད། །ལྷ་རྣམས་དང་ནི་དམྱལ་བའམ། །ཡི་དགས་དུད་འགྲོ་སྐྱེས་དེ་བཞིན། །བག་མེད་པ་དང་བག་ཡོད་དང་། །གང་དག་འདི་ཡིས་མི་འཁྲིད་མེད། །འདོད་པའི་ཁམས་སུ་སྐྱེས་པའམ། །གཟུགས་ཀྱི་ཁམས་ཀྱང་དེ་བཞིན་དེ། །གཟུགས་མེད་པར་ཡང་སྐྱེས་པའམ། །གང་དག་འདི་ཡིས་མི་འཁྱེར་མེད། །ལས་ཀྱི་ཞགས་པས་རྒ་བའི་ཆད། །ནད་ཀྱི་ལུས་སོ་སྟོབས་པོ་ཆེ། །སྲིན་པོ་ལྟ་བུའི་འཆི་བདག་འདིས། །སེམས་ཅན་བླངས་ནས་འགྲོ་བ་ཡིན། །དེ་ལྟར་འཇིགས་སུ་རུང་བ་ཡི། །འཆི་བདག་མཆོག་ཏུ་མི་བཟད་པ། །འདོད་པས་རྣམ་པར་རྨོངས་པའི་ལྷ། །ངུ་བར་འོས་ལ་དགའ་བར་བྱེད། །ཇི་ལྟ་ཇི་ལྟར་བསྟེན་བྱས་པ། །འདོད་པ་སྡུག་བསྔལ་རྒྱུ་རྣམས་ནི། །དེ་ལྟ་དེ་ལྟར་རྣམ་འཕེལ་བ། །མར་བླུགས་པ་ཡི་མེ་ཇི་བཞིན། །མི་དགེ་དེ་དག་སླུ་བྱེད་ཡིན། །བྱས་པ་ཆུད་གཟོན་སྡུག་བསྔལ་རྒྱུ། །དང་པོར་མངར་བར་འདོད་པ་ནི། །ཡོངས་སུ་སྨིན་ནས་མི་བཟད་པ། །འདོད་པས་དང་པོར་བདེ་ལེགས་དང་། །བར་དང་ཐ་མར་བྱེད་པའང་མིན།