རཱ་ཛ་ནི་ན་རྒྱུ་བའི་ལྷ་དེ་དག་རྣམས་ཁ་ཅིག་ནི་འབྲས་བུ་རྣམས་ཟ་བ་ཡིན་ནོ། །ཁ་ཅིག་ནི་འབྲས་བུའི་ཁུ་བ་རྣམས་འཐུང་ངོ་། །ཁ་ཅིག་ནི་ལྷན་ཅིག་སྤྱོད་པ་རྣམས་དང་བཅས་ནས་མེ་ཏོག་གི་རྩེད་མོ་བྱེད་དོ། །ཁ་ཅིག་ནི་ནགས་ཀྱི་ནང་གི་ས་དག་ལ་ཉེ་བར་གནས་ནས་རྣམ་པ་སྣ་ཚོགས་པའི་མྱོས་བྱེད་རྣམས་འཐུང་ཞིང་གླུ་ཡང་ལེན་པར་བྱེད་དོ། །ཁ་ཅིག་ནི་ལྷན་ཅིག་སྤྱོད་པ་རྣམས་དང་བཅས་ནས་གླུ་དབྱངས་དག་ལེན་པར་བྱེད་དོ། །ཁ་ཅིག་ནི་གར་བྱེད་དོ། །ཁ་ཅིག་ནི་པད་མའི་རྫིང་བུ་ལ་འབོག་པར་བྱེད་དོ། །ཁ་ཅིག་ནི་བདུད་རྩི་མིད་པར་བྱེད་དོ། །ཁ་ཅིག་ནི་ལྷན་ཅིག་སྤྱོད་པ་རྣམས་ཀྱིས་ཡོངས་སུ་བསྐོར་ནས་ནམ་མཁའི་དཀྱིལ་དུ་འཕགས་སོ། །གཞན་དག་ཁ་ཅིག་ནི་རིན་པོ་ཆེ་བདུན་གྱི་རང་བཞིན་གྱི་ཁང་བུར་ཞུགས་ནས་ལྷའི་བུ་མོའི་ཚོགས་རྣམས་ཀྱིས་ཀུན་ནས་ཡོངས་སུ་བསྐོར་ནས་རྣམ་པ་སྣ་ཚོགས་པའི་འདོད་པའི་ལོངས་སྤྱོད་ལ་རྗེས་སུ་སྤྱོད་པར་བྱེད་དོ། །དེ་ལྟར་ལྷ་དེ་དག་རྣམས་པད་མའི་རྫིང་བུ་དེ་ན་དགའ་བར་བྱེད་དོ། །འདོད་པའི་ཡོན་ཏན་ལྔ་དང་ཡང་དག་པར་ལྡན་པས་དགའ་བར་བྱེད་པ་དང་རྩེ་བར་བྱེད་ཀྱང་ཡུལ་རྣམས་ཀྱིས་ཉེ་བར་ལོངས་སྤྱོད་པས་ངོམས་པར་ཡང་མི་འགྱུར་རོ། །སྲེད་པ་དང་ལྡན་པ་རྣམས་ནི་ངོམས་པར་འགྱུར་བ་ནམ་ཡང་ཡོད་པ་མ་ཡིན་ཏེ། དཔེར་ན་མར་གྱིས་ལེགས་པར་བཏབ་པར་གྱུར་པའི་ཤིང་རྣམས་ཀྱིས་མེ་ལ་ངོམས་པའི་མཐར་ཐུག་པ་མེད་དོ། །དེ་བཞིན་དུ་སྲེད་པ་དང་ལྡན་པའི་མི་རྣམས་ཀྱང་ཡུལ་རྣམས་ཀྱིས་ཡིན་ནོ། །དེ་ནས་རྫིང་བུ་དེའི་པད་མའི་ངོས་ཀྱི་དབུས་ཀྱི་པད་མའི་ནགས་མཆོག་ཏུ་དགའ་བ་དང་མཆོག་ཏུ་བདེ་བ་དང་མཆོག་ཏུ་རྒྱ་ཆེ་བར་གྱུར་པ་སྣ་ཚོགས་པའི་བྱའི་ཚོགས་རྣམས་ཀྱིས་ཀུན་ཏུ་གང་བར་གྱུར་པ་ན། རང་གི་སྨོན་ལམ་གྱིས་སྐྱེས་པའི་བྱང་ཆུབ་སེམས་དཔའ་དུས་བཟངས་ཞེས་བྱ་བའི་ངང་པའི་རྒྱལ་པོ་ངང་པ་བརྒྱ་སྟོང་གིས་ཡོངས་སུ་བསྐོར་བར་གྱུར་པ་ནི། ཇི་ལྟར་འཛམ་བུའི་གླིང་གི་གཟའ་དང་སྐར་མ་རྣམས་ཀྱིས་ཟླ་བ་ལ་བཞིན་ནོ། །དེ་བཞིན་དུ་དེ་ཡང་ཉེ་འཁོར་རྣམས་ཀུན་ཏུ་སྣང་བར་བྱེད་དོ། །པད་མའི་ཚལ་རྣམས་ཀྱང་བུང་བའི་ཚོགས་རྣམས་ཀྱིས་ཀུན་ནས་ཉེ་བར་མཛེས་པར་གྱུར་པའོ། །ཉེ་འཁོར་ཀུན་ནས་ཡོངས་སུ་བསྐོར་བའི་ལྷ་དེ་དག་རྣམས་ལེགས་པར་མངོན་པར་མཐོང་ནས་གཞན་ལ་ཕན་པ་ལ་རབ་ཏུ་ཞུགས་པས་ཚིགས་སུ་བཅད་པ་བརྗོད་པ།